Read ქართული ბიბლია, სრული ვერსია Joshua 2 Bible Online

Joshua 2 - ქართული ბიბლია, სრული ვერსია bible

Joshua 2

¹და გაგზავნა იესო ნავეს ძემ შიტიმიდან ფარულად ორი მსტოვარი და უთხრა: „წადით და დაზვერეთ ის ქვეყანა და იერიხო.“ და წავიდნენ ისინი და მივიდნენ ერთი მეძავის, სახელად რახაბის, სახლში და ღამე იქ გაათიეს.

²ამბავი მოუვიდა იერიხოს მეფეს: წუხელის ისრაელიანთაგან კაცები მოსულანო ქვეყნის დასაზვერად.

³და შეუთვალა იერიხოს მეფემ რახაბს: გამოიყვანე კაცები, შენთან რომ მოვიდნენ და შენს სახლში რომ შემოვიდნენ, რადგან ჩვენი ქვეყნის დასაზვერად არიან მოსულნიო.

⁴მაგრამ ქალმა დამალა ის ხალხი და მეფის კაცებს უთხრა: „მართლაც მოვიდნენ ჩემთან ვიღაც კაცები, მაგრამ მე არ ვიცი, სადაურები იყვნენ ისინი.

⁵და როცა კარიბჭე უნდა დაკეტილიყო, დაბინდებისას, წავიდნენ ისინი. მე არ ვიცი, საით წავიდნენ ისინი. თუ დროზე დაედევნებით, შესაძლოა, მალე წამოეწიოთ.“

⁶მან კი ისინი ერდოზე აიყვანა იქ დაზვინულ სელის ჩალაში დამალა.

⁷მეფის მდევრები მათ დაედევნენ იორდანესაკენ მიმავალი გზით, ფონებისაკენ. კარიბჭე კი მდევრების გასვლისთანავე დახურეს.

⁸და ვიდრე ისინი დაიძინებდნენ, ავიდა მათთან ერდოზე,

⁹და უთხრა იმ კაცებს: „მე ვიცი, რომ თქვენ მოგცათ უფალმა ეს ქვეყანა, და თქვენმა შიშმა მოგვიცვა, და ამ ქვეყნის მკვიდრნი შეძრწუნებულნი არიან თქვენს წინაშე.

¹⁰რადგან გაგონილი გვაქვს, როგორ დააშრო უფალმა მეწამული ზღვის წყლები თქვენს წინ, როცა ეგვიპტიდან გამოდიოდით, და რა უყავით იორდანეს გაღმელ ამორეველთა ორ მეფეს, სიხონს და ყოგს, როგორ შემუსრეთ ისინი.

¹¹და როცა გავიგეთ, შედრკა ჩვენი გული და მხნეობა აღარავის შერჩა წინ რომ აღგიდგეთ, რადგან უფალი, თქვენი ღმერთი, ეს არის ღმერთი მბრძანებელი მაღლა ცათა, და დაბლა მიწაზე.

¹²და ახლა შემომფიცეთ უფალი, რომ როგორც მე მოგექეცით წყალობით, ასევე წყალობით მოექცევით მამაჩემის სახლს; და მომეცით მე სარწმუნო ნიშანი,

¹³რომ ცოცხლად დატოვებთ მამაჩემსა და დედაჩემს, ჩემს ძმებსა და ჩემს დებს, და ყველა მათ შინაურს, და ჩვენ გვიხსნით სიკვდილისაგან.“

¹⁴და უთხრეს იმ კაცებმა: „თუ არ გათქვამ ამ ჩვენს ამბავს, ჩვენი სული თქვენს მაგიერ მიეცეს სიკვდილს, თუ როცა უფალი მოგვცემს ამ ქვეყანას, წყალობითა და ერთგულებით არ მოგექცეთ.“

¹⁵და სარკმლიდან თოკით ჩაუშვა ისინი, რადგან ქალაქის გალავანში იყო მისი სახლი და გალავანში ცხოვრობდა ის.

¹⁶და უთხრა მათ: „მთისკენ წადით, მდევრები რომ არ გადაგაწყდნენ. სამი დღე იქ დაიმალენით, ვიდრე მდევრები არ დაბრუნდებიან უკან, და შემდეგ წადით თქვენს გზაზე.“

¹⁷და უთხრეს მას იმ კაცებმა: „ჩვენ თავისუფალნი ვიქნებით ამ შენი ფიცისაგან, რითაც დაგვაფიცე,

¹⁸თუ, როცა ჩვენ ამ ქვეყანაში შემოვალთ, ეს მეწამული თოკი, რომლითაც ძირს ჩაგვიშვი, სარკმელს არ ექნება გამობმული. მამაშენი და დედაშენი და შენი ძმები და მთელი შენი მამისსახლეული შეკრიბე შენთან სახლში.

¹⁹და ყველა, ვინც გარეთ გამოვა შენი სახლის კარიდან, მისი სისხლი მის თავზე იქნება, ხოლო ჩვენ თავისუფალი ვიქნებით. და ყველა, ვინც შენთან იქნება, შენს სახლში, მისი სისხლი ჩვენს თავზე იყოს, თუ ვისიმე ხელი შეეხოს მას.

²⁰და თუ შენ გათქვამ ამ ჩვენს ამბავს, მაშინ თავისუფალნი ვიქნებით შენი ფიცისაგან, რომლითაც შენ დაგვაფიცე.“

²¹და მან თქვა: „იყოს თქვენი სიტყვისამებრ!“ და გაისტუმრა ისინი. და დაადგნენ ისინი გზას, და მან მიაბა მეწამული თოკი სარკმელს.

²²და წავიდნენ და მივიდნენ მთაში და დაჰყვეს იქ სამი დღე, ვიდრე მდევარი გაბრუნდებოდა. და ეძებდა მდევარი მთელ გზაზე და ვერ იპოვეს ისინი.

²³და დაბრუნდა ეს ორი კაცი, და ჩამოვიდნენ მთიდან და გავიდნენ და მივიდნენ იესო ნავეს ძესთან, და უამბეს მას ყველაფერი, რაც შეემთხვათ.

²⁴და უთხრეს იესოს: „უფალმა ჩაგვიგდო ხელში მთელი ქვეყანა და ქვეყნის ყველა მკვიდრი შეძრწუნებულია ჩვენს წინაშე.“