Read ქართული ბიბლია, სრული ვერსია Joshua 5 Bible Online

Joshua 5 - ქართული ბიბლია, სრული ვერსია bible

Joshua 5

¹როცა გაიგეს იორდანეს დასავლეთი ნაპირის ამორეველთა მეფეებმა, და ზღვისპირეთის ქანაანელმა მეფეებმა, რომ დააშრო უფალმა იორდანეს წყალი ისრაელიანთა წინაშე, ვიდრე ისინი გადალახავდნენ მას, გული შეუდრკათ და სული გაეპარათ ისრაელიანთა შიშით.

²იმ დროს უთხრა უფალმა იესოს: „გააკეთე კაჟის დანები და ერთხელ კიდევ წინადაცვითე ისრაელიანთ.“

³და გააკეთა იესომ კაჟის დანები, და წინადაცვითა ისრაელიანთ გიბეყათ-ჰაყარალოთთან.

⁴აი მიზეზი, რატომაც წინადაცვითა იესომ ისინი: ეგვიპტიდან გამოსული ყველა მამაკაცი, ვისაც ბრძოლა შეეძლო, უდაბნოს გზაზე, დაეცა ხეტიალისას

⁵ეგვიპტიდან გამოსული მთელი ხალხი წინადაცვეთილი იყო, ხოლო ის ვინც უდაბნოში დაიბადა ეგვიპტიდან გამოსვლის შემდგომ, არ იყო წინადაცვეთილი.

⁶რადგან ორმოც წელიწადს ხეტიალობდნენ ისრაელიანები უდაბნოში, ვიდრე არ გაწყდა ეგვიპტიდან გამოსული მთელი ბრძოლისუნარიანი ხალხი, რომელთაც არ შეისმინეს უფლის ხმა, რომელმაც დაფიცა, რომ ისინი ვერ იხილავდნენ იმ ქვეყანას, რომელიც რძესა და თაფლს გამოადინებს, და რომელიც ფიცით აღუთქვა ჩვენს მამებს, რომ მოგვცემდა ჩვენ.

⁷და მათი ძენი, რომლებიც მათ ნაცვლად დაადგინა, წინადაცვითა იესომ, რაკი წინადაუცვეთელნი იყვნენ ისინი, რადგან გზაში წინადაცვეთა არ ხდებოდა.

⁸და როცა წინადაიცვითა მთელმა ხალხმა, იქვე დარჩნენ ბანაკში ჭრილობის მოშუშებამდე.

⁹და უთხრა უფალმა იესოს: „დღეს მე მოგაშორეთ ეგვიპტის სირცხვილი!“ რის გამოც იმ ადგილს დღემდე ეწოდება გილგალი.

¹⁰და დაიბანაკეს ისრაელის ძეთ გილგალში, და შეასრულეს პასექი თვის მეთოთხმეტე დღეს, საღამოს, იერიხოს ველებზე.

¹¹და ჭამეს პასექის მეორე დღეს ამ ქვეყნის ნაყოფთაგან ხმიადი და ქუმელი იმავე დღეს.

¹²და შეწყდა მანანა მეორე დღეს, რაც ჭამეს მიწის ნაყოფი, და აღარ იყო ისრაელის ძეთათვის მანანა, და ჭამდნენ ქანაანის მიწის მოსავალს იმ წელს.

¹³და ერთხელ, როცა იესო იერიხოსთან იყო, აახილა თვალი და დაინახა მის წინ მდგომი კაცი, გაშიშვლებული მახვილით ხელში. და წავიდა იესო მისკენ, და ჰკითხა მას: „ჩვენი ხარ, თუ ჩვენი მტრებისა?“

¹⁴და მან უთხრა: „არა, მე უფლის მხედრობის თავი ვარ, ახლა მოვედი მე აქ.“ და დაემხო იესო მიწაზე, და თაყვანი სცა და უთხრა მას: „რას ეტყვის ჩემი ბატონი თავის მსახურს?“

¹⁵და უთხრა უფლის მხედრობის თავმა იესოს: „გაიძვრე ფეხზე ხამლები, რადგან ადგილი, რომელზეც შენ დგახარ, წმიდაა.“ და ასეც მოიქცა იესო.