Read ქართული ბიბლია, სრული ვერსია Joshua 7 Bible Online

Joshua 7 - ქართული ბიბლია, სრული ვერსია bible

Joshua 7

¹მაგრამ ისრაელიანებმა დანაშაული ჩაიდინეს და დარისხებულიდან აიღეს. და წილი აიღო ყაქანმა, ძემ ქარმისა, ძისა ზაბდისა, ძისა ზერახისა, იუდაელმა, დარისხებულიდან და აღიგზნო რისხვა უფლისა ისრაელიანებზე.

²და გააგზავნა იესომ კაცები იერიხოდან ღაისაკენ, ბეთ-ავენის მახლობლად რომ არის, ბეთელის აღმოსავლეთით, და უთხრა მათ: „ადით და დაზვერეთ ქვეყანა.“ და ავიდნენ ის კაცები და დაზვერეს ღაი.

³და დაბრუნდნენ იესოსთან, და უთხრეს მას: „ნუ ავა მთელი ხალხი. 2-3 ათასი კაცი ავიდეს და საკმარისი იქნება, რომ შემუსრონ ღაი. ნუ გარჯი იქ მთელ ხალხს, რადგან ცოტანი არიან ისინი.“

⁴და წავიდა იქ 3 ათასამდე კაცი, მაგრამ უკუექცნენ ღაის მცხოვრებთ.

⁵და დახოცეს მათგან ღაის კაცებმა 36 კაცი, და დაედევნენ ისინი ისრაელიანთ ქალაქის კარიბჭიდან შებარიმამდე და ხოცავდნენ გზადაგზა. და შეუდრკა ხალხს გული, შიშით მიელიათ.

⁶და შემოიხია იესომ სამოსელი, და დაემხო მიწაზე პირქვე უფლის კიდობნის წინ საღამომდე, ისრაელის უხუცესებთან ერთად, და თავზე მტვერსა და ნაცარს იყრიდნენ.

⁷და თქვა იესომ: „ვაი, უფალო ღმერთო! რისთვის გადმოალახინე ამ ხალხს ეს იორდანე, ნუთუ იმისთვის, რომ ამორეველთა ხელში ჩაგვეგდო თავი დასაღუპად? ნეტა იორდანეს გაღმა დავმკვიდრებულიყავით!

⁸ოჰ, უფალო, რაღა მეთქმის, როცა ისრაელმა თავის მტრებს ზურგი უჩვენა?!

⁹გაიგებენ ქანაანელნი და ქვეყნის ყველა მკვიდრი, და გარს შემოგვერტყმიან და ქვეყანაზე მოსპობენ ჩვენს სახსენებელს! და რა ელის შენს დიად სახელს?“

¹⁰და უთხრა უფალმა იესოს: „ადექი, რას დამხობილხარ პირქვე?

¹¹შესცოდა ისრაელმა და დაარღვია ჩემი აღთქმა, რაც ვუბრძანე მათ: აიღეს დარისხებულიდან, მოიპარეს, დამალეს და დადეს თავის ჭურჭელთან.

¹²და ამიტომაც წინ ვერ აღუდგნენ ისრაელის ძენი თავიანთ მტრებს, ზურგი უჩვენეს მტერს, რადგან თავად გახდნენ დარისხებულნი. და აღარ ვიქნები მე თქვენთან, თუ არ მოსპობთ თქვენს შორის დარისხებულს.

¹³ადექი, განწმიდე ხალხი და უთხარი: განიწმიდენით ხვალისათვის, რადგან ასე ამბობს უფალი, ღმერთი ისრაელისა: ‘დარისხებულია შენს შორის, ისრაელ! წინ ვერ აღუდგები შენს მტრებს, ვიდრე დარისხებულს არ მოიშორებ თავიდან!’

¹⁴ხვალ დილით თითო-თითო ტომი მოდექით თქვენი ტომებიდან; და იმ ტომიდან, რომელზეც უფალი მიანიშნებს, თითო-თითო საგვარეულო მოდგეს; და იმ საგვარეულოდან, რომელზეც უფალი მიანიშნებს, თითო-თითო სახლი მოდგეს; და რომელ სახლზეც უფალი მიანიშნებს, თითო-თითო კაცი მოდგეს მისგან.

¹⁵და დარისხებულის აღებაში დაჭერილი დაიწვას ცეცხლში, ის და მთელი მისი საბადებელი, რადგან დაარღვია უფლის აღთქმა და უკეთურება ჩაიდინა ისრაელში.“

¹⁶და ადგა იესო დილაადრიან და უბრძანა ისრაელიანთ მასთან მოსვლა ტომების მიხედვით, — და გამოჩნდა იუდას ტომი.

¹⁷უბრძანა იუდას ტომის საგვარეულოებს მოსვლა, და გამოჩნდა ზერახის საგვარეულო. და უბრძანა ზერახის საგვარეულოს კაცებს მოსვლა, და გამოჩნდა ზაბდი.

¹⁸და უბრძანა მისი სახლიდან კაცებს და გამოჩნდა ყაქანი, ძე ქარმისა, ძისა ზაბდისა, ძისა ზერახისა იუდას ტომიდან.

¹⁹და უთხრა იესომ ყაქანს: „ჩემო შვილო, პატივი მიაგე უფალს, ისრაელის ღმერთს, და მადლი შესწირე მას და მიამბე, რა ჩაიდინე, ნუ დამიმალავ.“

²⁰და მიუგო ყაქანმა იესოს და უთხრა: „ჭეშმარიტად შევცოდე უფალს, ისრაელის ღმერთს, ასე და ასე გავაკეთე.

²¹და დავინახე ნადავლში ერთი მშვენიერი შინყარული მოსასხამი, და 200 შეკელი ვერცხლი და 50 შეკელიანი ერთი ოქროს ზოდი, და დავხარბდი და ავიღე. და, აჰა, მიწაში მაქვს დაფლული ჩემს კარავში, ვერცხლი კი მის ქვეშაა.“

²²და გაგზავნა იესომ მაცნეები და ისინიც გაიქცნენ კარვისაკენ. და აჰა, ნახეს დამალული მის კარავში, და ვერცხლი მის ქვეშ.

²³და წამოიღეს ეს კარვიდან და მიუტანეს იესოს და ყველა ისრაელის ძეს, და დაყარეს იგი უფლის წინაშე.

²⁴და წაიყვანა იესომ ყაქანი, ძე ზერახისა, ვერცხლით და მოსასხამით და ოქროს ზოდითურთ და მისი ძენი, და მისი ასულნი, და მისი ხარი, და მისი სახედარი, და მისი ცხვარი, და მისი კარავი, და მთელი მისი საბადებელი. და მთელი ისრაელი მასთან იყო, და წაიყვანეს ისინი ყაქორის ველზე.

²⁵და უთხრა იესომ: „რად დაგვატეხე უბედურება? დღესვე დაგატეხოს შენ უფალმა უბედურება!“ და დაუშინა მას მთელმა ისრაელმა ქვა; და დაწვეს ისინი ცეცხლით და ჩაქოლეს ქვით.

²⁶და აღმართეს მასზე დიდი გროვა ქვებისა, რომელიც დღემდეა შემორჩენილი. და დაიცხრო უფალმა რისხვა. ამიტომაც ეწოდება დღემდე იმ ადგილს სახელად ყაქორის ველი.