Read ქართული ბიბლია, სრული ვერსია 1 Timothy 2 Bible Online

1 Timothy 2 - ქართული ბიბლია, სრული ვერსია bible

1 Timothy 2

¹შეგაგონებ, რომ უწინარეს ყოვლისა აღასრულო ვედრებანი, ლოცვანი, შუამდგომლობანი და მადლობანი ყოველი ადამიანისათვის,

²მეფეებისა და ყველა მბრძანებლისათვის, რათა მშვიდად და წყნარად ვიცხოვროთ სრულ ღვთისმოსაობასა და პატიოსნებაში,

³ეს კეთილია და სათნოა ჩვენი მაცხოვრის, ღმერთის წინაშე,

⁴რომელსაც სურს, რომ ყველა ადამიანი გადარჩეს და მისწვდეს ჭეშმარიტების შემეცნებას.

⁵რადგან ერთია ღმერთი და ერთია შუამავალი ღმერთსა და ადამიანთა შორის — ადამიანი ქრისტე იესო,

⁶რომელმაც თავი გასწირა ყველას გამოსასყიდად, ეს იყო მოწმობა, რომელიც განხორციელდა თავის დროზე,

⁷რისთვისაც მე დადგენილი ვარ მქადაგებლად და მოციქულად — ჭეშმარიტებას ვამბობ ქრისტეში, არ ვცრუობ, — წარმართთა მოძღვრად რწმენასა და ჭეშმარიტებაში.

⁸ამგვარად, ჩემი სურვილია, რომ ყველა ადგილას ლოცულობდნენ კაცები, წმიდა ხელების აპყრობით, რისხვისა და კამათის გარეშე.

⁹ასევე ქალებმაც თავი შეიმკონ უბრალო სამოსითა და წესიერებით, და არა თმის დაწვნით და ოქროთი, ან მარგალიტებით, ან ძვირფასი ტანსაცმლით,

¹⁰არამედ კეთილი საქმეებით, როგორც შეჰფერით ქალებს, რომლებმაც ღვთისმოსაობა არჩიეს.

¹¹ქალი უნდა სწავლობდეს მდუმარედ, სრული მორჩილებით.

¹²ქალს არ ვაძლევ სწავლების ნებას, არც ქმარზე ბატონობისას, არამედ მდუმარედ იყოს.

¹³რადგან პირველად ადამი შეიქმნა და მერე ევა.

¹⁴და ადამი კი არ შემცდარა, არამედ ქალი შეცდა და ცოდვაში ჩავარდა.

¹⁵თუმცა გადარჩება შვილიერებით, თუ იდგება რწმენაში, სიყვარულსა და სიწმიდეში წესიერებით.