Read ქართული ბიბლია, სრული ვერსია Hebrews 9 Bible Online

Hebrews 9 - ქართული ბიბლია, სრული ვერსია bible

Hebrews 9

¹პირველ აღთქმასაც ჰქონდა მსახურების წესდებები და ამქვეყნიური ტაძარი,

²რადგან გამზადებული იყო პირველი კარავი, რომელშიც იყო სასანთლე, ტაბლა და პურების წინადაგება; რომელსაც წმიდა ეწოდებოდა;

³ხოლო მეორე ფარდის მიღმა იყო კარავი, სახელწოდებით წმიდათა წმიდა,

⁴რომელსაც ჰქონდა ოქროს სასაკმევლე და ყოველი მხრიდან ოქროთი მოჭედილი აღთქმის კიდობანი, სადაც იყო მანანით სავსე ოქროს ქოთანი, აარონის გამწვანებული კვერთხი და აღთქმის დაფები.

⁵ხოლო მათ ზემოთ დიდების ქერუბიმნი, რომელნიც უჩრდილავდნენ სალხინებელს. რაზეც ახლა დაწვრილებით ლაპარაკი საჭირო არ არის.

⁶ასე გამზადებულ პირველ კარავში მუდამ შედიან მღვდლები მსახურებათა აღსასრულებლად.

⁷ხოლო მეორეში — მხოლოდ მღვდელმთავარი, წელიწადში ერთხელ, ოღონდ არა სისხლის გარეშე, რომელსაც სწირავს თავისი და ხალხის უნებური ცოდვისათვის.

⁸ამით წმიდა სული აჩვენებს, რომ ჯერ კიდევ არაა გახსნილი გზა წმიდათა წმიდაში, სანამ დგას პირველი კარავი,

⁹რომელიც აწმყო ჟამის იგავია, როცა სწირავენ ძღვენთა და მსხვერპლთ, რასაც არ შეუძლია შემწირველის სინდისის სრულყოფა,

¹⁰რადგან მას მხოლოდ საჭმელ-სასმელითა და სხვადასხვა განბანვით, — ხორციელი წესებით — აქვს გამოსწორების ძალა ჟამამდე.

¹¹ქრისტე კი, კეთილი მომავლის მღვდელმთავარი, მოვიდა დიდი და უფრო სრულყოფილი კარვით — ხელთუქმნელით, ესე იგი, არა ამნაირად მოწყობილით,

¹²არა ვაცთა და ზვარაკთა სისხლით, არამედ საკუთარი სისხლით შევიდა ერთხელ წმიდათა წმიდაში და მოგვიპოვა საუკუნო გამოსყიდვა.

¹³რადგან თუ ვაცთა და კუროთა სისხლი და დეკეულის ფერფლის პკურება წმიდაჰყოფს შებილწულთ, რათა განიწმიდოს სხეული,

¹⁴მით უმეტეს, სისხლი ქრისტესი, რომელმაც მარადიული სულით შესწირა ღმერთს თავისი უბიწო თავი, განწმედს ჩვენს სინდისს მკვდარი საქმეებისაგან ცოცხალი ღმერთის მსახურებისათვის.

¹⁵ამიტომ არის ის ახალი აღთქმის შუამდგომელი, რათა მისი სიკვდილის შემდეგ, რაც პირველი აღთქმის დანაშაულთა გამოსასყიდად მოხდა, საუკუნო მემკვიდრეობისათვის მოწოდებულებმა მიიღონ აღთქმული.

¹⁶რადგან, სადაც ანდერძია, იქ აუცილებელია მოანდერძის სიკვდილის დადგენა.

¹⁷ანდერძი ხომ სიკვდილისას არის ვარგისი, რადგან მას ძალა არა აქვს, ვიდრე მოანდერძე ცოცხალია.

¹⁸ამიტომ არც პირველი იყო დამტკიცებული სისხლის გარეშე.

¹⁹რადგან მოსემ, როცა გამოუცხადა მთელ ხალხს ყველა მცნება რჯულისამებრ, აიღო ზვარაკთა და ვაცთა სისხლი წყალთან, მეწამულ მატყლთან და უსუპთან ერთად და აპკურა წიგნს და მთელ ხალხს.

²⁰და თქვა: „ესაა სისხლი აღთქმისა, რომელიც გამცნო თქვენ ღმერთმა.“

²¹და კარავსაც და მთელ სამსახურებელ ჭურჭელსაც ასხურა სისხლი.

²²რჯულის თანახმად თითქმის ყველაფერი სისხლით განიწმიდება და სისხლის დაუღვრელად არ ხდება მიტევება.

²³ამგვარად, აუცილებელია, რომ ზეცაში მყოფთა მიწიერი სახეები ასე განიწმიდონ, თვით ზეციურნი კი ამაზე უმჯობესი მსხვერპლებით.

²⁴რადგან ქრისტე შევიდა არა ხელთქმნილ წმიდათა წმიდაში, ჭეშმარიტის წინარესახეში, არამედ თვით ზეცაში, რათა წარდგეს ახლა ღმერთის წინაშე ჩვენთვის.

²⁵არა იმისათვის, რომ მრავალგზის შეეწიროს, როგორც შედის მღვდელმთავარი ყოველწლიურად წმიდათა წმიდაში სხვისი სისხლით, —

²⁶მაშინ მას სამყაროს დასაბამიდან მრავალგზის მოუხდებოდა ტანჯვა, ახლა კი ერთხელ, საუკუნეთა დასასრულს, გამოჩნდა თავისი თავის მსხვერპლად შეწირვით ცოდვათა წარსახოცად.

²⁷და როგორც ადამიანებს დადგენილი აქვთ ერთხელ სიკვდილი და შემდეგ გასამართლება,

²⁸ასევე ქრისტეც, რომელიც ერთხელ შეიწირა, რომ მრავალთა ცოდვა ეტვირთა, მეორედ გამოჩნდება არა ცოდვების გამო, არამედ მის მომლოდინეთა სახსნელად.