Read ქართული ბიბლია, სრული ვერსია Judges 13 Bible Online

Judges 13 - ქართული ბიბლია, სრული ვერსია bible

Judges 13

¹ისრაელიანები კვლავაც უკუღმართად იქცეოდნენ უფლის თვალში; და უფალმა ფილისტიმელთა ხელში ჩაყარა ისინი ორმოც წელიწადს.

²და იყო მაშინ ერთი კაცი ცორყადან, დანის ტომიდან, და სახელად მანოახი ერქვა; და ცოლი ბერწი ჰყავდა, შვილს ვერ აჩენდა.

³და გამოეცხადა უფლის ანგელოზი ამ ქალს და უთხრა: „აჰა, შენ, ბერწი ხარ და შვილი არ გაგიჩენია, მაგრამ დაორსულდები და ვაჟს გააჩენ;

⁴და ახლა გაფრთხილდი, არ სვა ღვინო და თაფლუჭი, უწმიდური არაფერი ჭამო.

⁵რადგან დაორსულდები და ვაჟი გაგიჩნდება, და სამართებელი არ უნდა მიეკაროს მის თავს, რადგან ღვთის მოწმიდარი იქნება ის ყრმა საშოდანვე, და შეუდგება ისრაელის დახსნას ფილისტიმელთა ხელიდან.“

⁶და მოვიდა ცოლი და უთხრა თავის ქმარს: „ღვთისკაცი მოვიდა ჩემთან, ღვთის ანგელოზის იერი ჰქონდა, ძალზე საპატიო; არ მიკითხავს მისთვის სადაურობა, და არც თვითონ მითხრა თავისი სახელი.

⁷და მითხრა: დაორსულდები და ვაჟს გააჩენო. არ სვა ღვინო და თაფლუჭი, და უწმიდური არაფერი ჭამოო, რადგან ღვთის მოწმიდარი იქნება ის ყრმა მუცლად ყოფნიდან სიკვდილამდეო.“

⁸და ლოცვა აღუვლინა მანოახმა უფალს, და თქვა: „გევედრები, უფალო! ღვთისკაცი, რომელიც შენ მოავლინე, კიდევ ერთხელ გვეწვიოს და გვასწავლოს, თუ რა ვუყოთ იმ ყრმას, რომელიც გაჩნდება.“

⁹და უსმინა ღმერთმა მანოახს, და ხელახლა მოვიდა ღვთის ანგელოზი ამ ქალთან, როცა ის ყანაში იყო, და მანოახი, მისი ქმარი, მასთან არ იყო.

¹⁰და სწრაფად გაიქცა ქალი შეატყობინა თავის ქმარს: „აჰა, გამომეცხადა ის კაცი, ამასწინათ რომ მოვიდა ჩემთან.“

¹¹და ადგა მანოახი, წაჰყვა თავის ცოლს და მივიდა იმ კაცთან და უთხრა: „შენ ხარ ის კაცი, ამ ქალს რომ ელაპარაკე?“ და უთხრა: „მე ვარ.“

¹²და უთხრა მანოახმა: „ახლა, შენი სიტყვა რომ ახდება, როგორი უნდა იყოს ამ ყრმის ცხოვრების წესი და საქმე?“

¹³და უფლის ანგელოზმა უთხრა მანოახს: „ერიდოს ყველაფერ იმას, რაც ქალს ვუთხარი.

¹⁴და ვაზისაგან მოწეულს არაფერს გაეკაროს, ღვინო არა სვას და თაფლუჭი, უწმიდური არაფერი ჭამოს. ყველაფერი, რაც ქალს ვამცნე, შეასრულოს.“

¹⁵და უთხრა მანოახმა უფლის ანგელოზს: „ნება გვიბოძე დაგაყოვნოთ და თიკანი მოგიმზადოთ.“

¹⁶და უთხრა უფლის ანგელოზმა მანოახს: „რომც დამაყოვნო, შენს პურს მაინც არ გავტეხ. თუ სრულადდასაწველის გამზადება გინდა, აღავლინე.“ არ იცოდა მანოახმა, რომ უფლის ანგელოზი იყო ის.

¹⁷და ჰკითხა მანოახმა უფლის ანგელოზს: „სახელად რა გქვია? რომ, როცა შენი სიტყვა ახდება, განგადიდოთ.“

¹⁸და უთხრა მას უფლის ანგელოზმა: „რისთვის მეკითხები სახელს? საკვირველია იგი.“

¹⁹და აიღო მანოახმა თიკანი და პურეულის ძღვენი და ქვაზე აღუვლინა უფალს, და მან სასწაული მოახდინა მანოახისა და მისი ცოლის თვალწინ.

²⁰როცა სამსხვერპლოდან ალი ზეცისკენ ავარდა, უფლის ანგელოზი ზეაჰყვა სამსხვერპლოს ალს. და, ეს რომ დაინახეს, მანოახი და მისი ცოლი პირქვე დაემხნენ მიწაზე.

²¹გაუჩინარდა უფლის ანგელოზი მანოახსა და მის ცოლს. და მაშინ მიხვდა მანოახი, რომ უფლის ანგელოზი იყო იგი.

²²და უთხრა მანოახმა თავის ცოლს: „სიკვდილით მოვკვდებით, რადგან ღმერთი ვიხილეთ.“

²³და უპასუხა ცოლმა: „უფალს ჩვენი სიკვდილი რომ ნდომოდა, არ მიიღებდა ჩვენი ხელიდან სრულადდასაწველსა და პურეულის ძღვენს, და არ დაგვანახვებდა და არ მოგვასმენინებდა ყველაფერ ამას.“

²⁴და შობა იმ ქალმა ძე, და უწოდა მას სახელად სამსონი. და წამოიზარდა ყრმა და აკურთხა იგი უფალმა.

²⁵და იწყო უფლის სულმა მისი აღძვრა დანის ბანაკში — ცორყასა და ეშთაოლს შორის.