Read ქართული ბიბლია, სრული ვერსია Judges 14 Bible Online

Judges 14 - ქართული ბიბლია, სრული ვერსია bible

Judges 14

¹და ჩავიდა სამსონი თიმნათში, და ნახა თიმნათში ერთი ქალი ფილისტიმელთა ასულთაგან.

²შინ დაბრუნდა და უთხრა თავის მამასა და დედას: „ქალი ვნახე თიმნათში, ფილისტიმელთა ასული; მომიყვანეთ იგი ცოლად.“

³და უთხრეს მას მამამისმა და დედამისმა: „ნუთუ ქალი დაილია შენს საგვარტომოში და მთელს შენს ერში, რომ მიდიხარ ცოლის მოსაყვანად წინადაუცვეთელ ფილისტიმელთაგან?“ და უთხრა სამსონმა მამას: „მომიყვანე, რადგან ის მომივიდა თვალში.“

⁴და მამამისმა და დედამისმა არ იცოდნენ, რომ უფლისაგან იყო ეს, და რომ ის საბაბს ეძებდა ფილისტიმელთა წინააღმდეგ; და იმ დროს ფილისტიმელნი ბატონობდნენ ისრაელზე.

⁵და ჩავიდნენ სამსონი, მამამისი და დედამისი თიმნათში, და თიმნათის ზვრებს რომ მიადგნენ, აჰა, ლომის ბოკვერი ბუხუნით მორბის მათკენ.

⁶და გადმოვიდა სამსონზე უფლის სული, და მან ისე გახლიჩა ბოკვერი, როგორც კაცმა თიკანი გახლიჩოს, და ხელში არაფერი სჭერია. მამამისისა და დედამისისათვის არ უთქვამს, რა გააკეთა.

⁷და ჩავიდა და ელაპარაკა იმ ქალს, და თვალში მოუვიდა იგი სამსონს.

⁸და რამდენიმე ხნის შემდეგ ისევ ჩააკითხა, რომ ცოლად მოეყვანა; და გადაუხვია ლომის მძორის სანახავად და აჰა, ლომის ტანში ფუტკრის გუნდი და თაფლია.

⁹და პეშვით გამოიღო თაფლი. და მიდიოდა და გზადაგზა ჭამდა. და წამოეწია თავის მამას და დედას, და მისცა მათ ეს თაფლი და ჭამეს. და არ უთქვამს, ლომის ჩონჩხიდან რომ იყო გამოღებული.

¹⁰და მივიდა მამამისი ქალთან, და სამსონმა იქვე ლხინი გამართა, როგორც ჭაბუკები იქცევიან ხოლმე.

¹¹და როცა ნახეს, რომ სამსნი მოვიდა, მოყვრებმა 30 კაცი მოიწვიეს სამსონის მაყრად.

¹²და უთხრა მათ სამსონმა: „გამოსაცნობად ერთ გამოცანას გეტყვით; თუ ამ შვიდდღიანი ლხინის განმავლობაში გამოიცნობთ და ამოხსნით მას, 30 არდაგსა და 30 კვართს მოგცემთ.

¹³და თუ ვერ გამოიცნობთ, მაშინ თქვენ მომეცით 30 არდაგი და 30 ხელი ტანსაცმელი.“ და უთხრეს მას: „თქვი შენი გამოცანა და მოგისმენთ.“

¹⁴და უთხრა მათ: „მჭამელისაგან გამოვიდა საჭმელი; ძლიერისაგან გამოვიდა ტკბილი.“ და სამი დღის განმავლობაში ვერ გამოიცნეს გამოცანა.

¹⁵და მეოთხე დღეს უთხრეს სამსონის ცოლს: „დაიყოლიე შენი ქმარი, გვითხრას ამ გამოცანის ახსნა, თორემ შენც დაგწვავთ და მამაშენის სახლსაც. ნუთუ გასაძარცვავად მოგვიპატიჟეთ?“

¹⁶და ატირდა სამსონის ცოლი მის წინაშე, და უთხრა: „შენ გძულვარ და არ გიყვარვარ, ჩემი ხალხის ძეებისათვის გამოცანა მიგიცია, ახსნას კი არ მეუბნები.“ და მან უპასუხა: „მამაჩემისა და დედაჩემისათვის არ მითქვამს და შენ გითხრა?“

¹⁷და ტიროდა ცოლი მის წინაშე შვიდი დღე, რამდენ ხანსაც ის ლხინი გრძელდებოდა. და მეშვიდე დღეს კი უთხრა თავის ცოლს გამოცანის ახსნა, რადგან იძულებული გახდა. მან კი თავისი ხალხის ძეებს უთხრა გამოცანა.

¹⁸და ქალაქის მკვიდრებმა მეშვიდე დღეს, მზის ჩასვლამდე უთხრეს სამსონს: „რა არის თაფლზე უტკბესი და ლომზე უძლიერესი?“ და უთხრა მათ: „ჩემი ფურით რომ არ გეხნათ, ვერ გამოიცნობდით ჩემს გამოცანას.“

¹⁹და გადმოვიდა მასზე უფლის სული, და ჩავიდა აშკელონში და დახოცა 30 იქაური კაცი, და წამოიღო დავლა და ჩამოურიგა ტანსაცმელი გამოცანის გამომცნობთ. და აღიგზნო მისი რისხვა და წავიდა თავისი მამისსახლში.

²⁰სამსონის ცოლი კი ქმრის მაყარმა შეირთო.