Read ქართული ბიბლია, სრული ვერსია Judges 15 Bible Online

Judges 15 - ქართული ბიბლია, სრული ვერსია bible

Judges 15

¹რამდენიმე ხნის შემდეგ წავიდა სამსონი თავისი ცოლის სანახავად ალოობის[1] დროს და თან ერთი თიკანი წაიყვანა. და თქვა: შევალო ჩემს ცოლთან სანთიობოში, მაგრამ ქალის მამამ არ შეუშვა.

²და უთხრა მას ქალის მამამ: „ვიფიქრე, სიძულვილით მოიძულე იგი და შენს მაყარს მივათხოვე. აჰა, მისი უმცროსი და, მასზე ლამაზია; მის ნაცვლად ეგ წაიყვანე ცოლად.“

³და უთხრა მათ სამსონმა: „დამნაშავე ვიქნები ამიერიდან ფილისტიმელებს რომ ავი საქმეები დავმართო?“

⁴წავიდა სამსონი, დაიჭირა 300 მელა, ორ-ორი კუდებით გადაასკვნა, სკვნილში თითო ჩირაღდანი ჩაატანა;

⁵ცეცხლი მოუკიდა ჩირაღდნებს და გაუშვა ფილისტიმელთა ყანებში და გადაწვა ზვინები, ვენახები და ზეთისხილის ბაღები.

⁶და იკითხეს ფილისტიმელებმა: ეს ვინ ჩაიდინაო? და უთხრეს: სამსონმა, თიმნათელის სიძემ, რადგან მისი ცოლი მიათხოვესო მის მაყარს. და ავიდნენ ფილისტიმელნი და ცეცხლში დაწვეს ის ქალი და მამამისი.

⁷და უთხრა მათ სამსონმა: „რაკი ასე იქცევით, შურს ვიძიებ თქვენზე და მერე მოვისვენებ.“

⁸უმსხვრია მათ წვივები და თეძოები და ჩავიდა და ყეტამის კლდის ეხს შეაფარა თავი.

⁹და ავიდნენ ფილისტიმელნი და დაიბანაკეს იუდაში და დაიკავეს ლეხი.

¹⁰და ჰკითხეს იუდას კაცებმა: რად ამოხვედითო ჩვენთან? და უთხრეს: „სამსონის შესაპყრობად ამოვედით, რათა მას ისევე მოვექცეთ, როგორც ჩვენ მოგვექცა.“

¹¹და მივიდა 3 ათასი კაცი იუდადან ყეტამის კლდის ეხთან და უთხრეს სამსონს: „ვითომ არ იცოდი, რომ ფილისტიმელნი ბატონობენ ჩვენზე? ეს რა გვიქენი?“ და უპასუხა მათ სამსონმა: „როგორც მე მომექცნენ, მეც ისე მოვექეცი მათ.“

¹²და უთხრეს მას: „შენს შესაპყრობად ჩამოვედით, რათა გადაგცეთ ფილისტიმელებს.“ და უთხრა მათ სამსონმა: „შემომფიცეთ, რომ არ მომკლავთ.“

¹³და უთხრეს მას: „არა, მხოლოდ შეგიპყრობთ და ხელთ მიგცემთ ფილისტიმელებს, მოკვლით კი არ მოგკლავთ.“ და შეკრეს იგი ორი ახალი თოკით, და წაიყვანეს იქიდან.

¹⁴როდესაც მივიდა ის ლეხამდე, ფილისტიმელნი ღრიანცელით შემოეხვივნენ მას. და გადმოვიდა მასზე უფლის სული, და საბელები, რითაც მკლავები ჰქონდა შეკრული, სელივით დაიწვა გასცვივდა ხელებიდან.

¹⁵სამსონმა დაინახა, რომ იქვე ვირის ყბა ეგდო, დასწვდა, აიღო და ათასი კაცი მოკლა იმით.

¹⁶და თქვა სამსონმა: „ვირის თავყბით ვირთა დასიო, ვირის ყბით ვხოცე ათასიო.“

¹⁷და ეს რომ თქვა, გადააგდო ვირის ყბა და უწოდა იმ ადგილს რამათ-ლეხი.

¹⁸ძალიან მოსწყურდა და უხმო უფალს: „შენ მოიმოქმედე ეს დიდი ხსნა შენი მსახურის ხელით; და ახლა წყურვილით უნდა მოვკვდე, და წინადაუცვეთლებს ჩავუვარდე ხელში?“

¹⁹და ღმერთმა იქვე გააჩინა ნაპრალი და გადმოხეთქა იქიდან წყალმა. დალია სამსონმა წყალი, სული მოითქვა და გამოცოცხლდა. ამისთვის ეწოდა იმ ადგილს სახელად ყენ-ჰაკორე, რომელიც დღემდეა ლეხში.

²⁰და სამსონი ისრაელის მსაჯული იყო ფილისტიმელთა ბატონობის დღეებში მთელი 20 წლის მანძილზე.