Read ქართული ბიბლია, სრული ვერსია Judges 18 Bible Online

Judges 18 - ქართული ბიბლია, სრული ვერსია bible

Judges 18

¹იმ ხანებში ისრაელს მეფე არ ჰყავდა. და იმ ხანებში დანის ტომი ეძებდა თავის დასამკვიდრებელ ადგილს, რადგან მას იმ დღემდე არ ერგო წილხვედრი ისრაელის ტომთა შორის.

²და გაგზავნეს დანის ძეთ თავისი ტომიდან ხუთი კაცი, ძლიერი ვაჟკაცები ცორყადან და ეშთაოლიდან, რათა დაეზვერათ ქვეყანა და გამოეკვლიათ. უთხრეს: „წადით, გამოიკვლიეთ ქვეყანა.“ და მივიდნენ ეფრემის მთაზე მიქას სახლთან, და იქ გაათიეს.

³მიქას სახლთან ყოფნისას ეცნოთ ლევიანი ყმაწვილის ხმა და შევიდნენ იქ, და უთხრეს მას: „აქ ვინ მოგიყვანა, აქ რას აკეთებ, აქ რა გინდა?“

⁴და უთხრა მათ: ასე და ასე მომექცაო მიქა: დამიქირავა და მისი მღვდელი გავხდიო.

⁵და უთხრეს მას: „ჰკითხე ღმერთს, რომ ვიცოდეთ, ხელი თუ მოგვემართება იმ გზაზე, რომელსაც ვადგავართ?“

⁶და უთხრა მათ მღვდელმა: „წადით მშვიდობით; უფალს თვალი უჭირავს თქვენს გზაზე, რომელსაც ადგახართ.“

⁷და წავიდა ეს ხუთი კაცი და მივიდა ლაიშში და ნახა იქ მყოფი ხალხი, უზრუნველად მცხოვრები, ციდონელთა წესის მიხედვით, წყნარი და უზრუნველი; ქვეყანაზე არვინ აწუხებდა მათ, არავინ იყო მათი ბატონი; ციდონელთაგან შორს ცხოვრობდნენ, და მეზობლებთან საქმე არ ჰქონდათ.

⁸და მივიდნენ ისინი თავიანთ მოძმეებთან ცორყასა და ეშთაოლში, და უთხრეს მათ მოძმეებმა: „რა ამბავი მოგაქვთ?“

⁹და მათ თქვეს: „ავდგეთ და გავილაშქროთ მასზე, რადგან ვნახეთ ის ქვეყანა და ძალიან კარგია იგი. რა გულ-ხელი დაგიკრეფიათ? ნუღარ დააყოვნებთ, წადით იმ ქვეყნის დასამკვიდრებლად.

¹⁰მიხვალთ და წააწყდებით უზრუნველ ხალხს. გაშლილი ქვეყანაა. ღმერთს თქვენთვის მოუცია. ისეთი ადგილია, ქვეყანაზე არაფერი რომ არ აკლია.“

¹¹და დაიძრნენ იქიდან, დანის ძეთა საგვარეულოდან, ცორყადან და ეშთაოლიდან, 600 კაცი საბრძოლო იარაღით შეჭურვილი.

¹²და ავიდნენ და კირიათ-იეყარიმში — იუდაში — დაიბანაკეს. ამიტომ ეძახიან ამ ადგილს დღევანდლამდე დანის ბანაკს. ეს ადგილი კირიათ-იეყარიმის გადაღმა იყო.

¹³და იქიდან ეფრემის მთაში ავიდნენ და მიქას სახლს მიადგნენ.

¹⁴და უთხრა იმ ხუთმა კაცმა, ლაიშის ქვეყნის დასაზვერად რომ იყვნენ წასულნი, თავის მოძმეებს: „თქვენ იცით, რომ აქ ერთ-ერთ სახლში აქვთ ეფოდი, თერაფიმი, ქანდაკი და ჩამოსხმული კერპი? და ახლა მოიფიქრეთ, როგორ უნდა მოვიქცეთ.“

¹⁵და გადაუხვიეს იქით, და შევიდნენ ყმაწვილი ლევიანის სახლში, მიქას სახლში, და მოიკითხეს იგი მშვიდობით.

¹⁶დანის ტომელთაგან 600 კაცი საბრძოლო იარაღით შეჭურვილი კარიბჭის შესასვლელთან იდგა.

¹⁷და წავიდა ის ხუთი კაცი, ქვეყნის დასაზვერად რომ იყო წასული, შევიდა შიგნით, აიღო ქანდაკი, ეფოდი, თერაფიმი და ჩამოსხმული კერპი. მღვდელი კარიბჭის შესასვლელთან იდგა საბრძოლო იარაღით შეჭურვილი 600 კაცის გვერდით.

¹⁸და ისინი შევიდნენ მიქას სახლში და აიღეს ქანდაკი, ეფოდი, თერაფიმი, და ჩამოსხმული კერპი. და ჰკითხა მათ მღვდელმა: „რას აკეთებთ?“

¹⁹და უთხრეს მას: „გაჩუმდი, პირზე ხელი დაიფარე და წამოგვყევი, გაგვიხდი მამად და მღვდლად. რა გიჯობს: ერთი კაცის სახლის მღვდლობა, თუ ისრაელის ტომისა და მოდგმის მღვდლობა?“

²⁰და გაიხარა მღვდლის გულმა, და აიღო ეფოდი, თერაფიმი, ქანდაკი და გაჰყვა იმ ხალხს.

²¹და მეომრებმა გზა განაგრძეს. თავიანთი ოჯახები, ქონება და ჯოგები წინ გაუშვეს.

²²ის იყო გასცდნენ მიქას სახლს, რომ შეიყარნენ მიქას კარის მეზობლები და წამოეწივნენ დანის ძეთ.

²³დაჰკივლეს დანის ძეებს. და მოუბრუნდნენ დანის ძენი და უთხრეს მიქას: „რა დაგემართა, რა გაყვირებს?“

²⁴და თქვა: „მომტაცეთ ჩემი გაკეთებული ღმერთები, ჩემი მღვდელი და წახვედით! აღარაფერი დამიტოვეთ! როგორღა მეუბნებით, რა დაგემართაო?“

²⁵და უთხრეს მას დანის ძეთ: „აღარ გავიგონოთ შენი ხმა, თორემ დაგეცემიან გააფთრებული კაცები, ჩვენს შორის რომ არიან, და შენს თავსაც დაღუპავ და შენიანებსაც.“

²⁶და წავიდნენ დანის ძენი თავიანთი გზით. დაინახა მიქამ, რომ მასზე ძლიერები იყვნენ ისინი, გატრიალდა და შინ დაბრუნდა.

²⁷და მათ წაიღეს, რაც გაკეთებული ჰქონდა მიქას. და წაიყვანეს მისი მღვდელი, და მივიდნენ ლაიშში, მშვიდ და უზრუნველ ხალხთან, და მოსრეს ისინი მახვილის პირით და ქალაქი გადაწვეს ცეცხლით.

²⁸და არავინ აღმოჩნდა მისი მშველელი, რადგან შორს იყო ციდონისაგან, კაციშვილთან არ ჰქონდათ საქმე. და იყო ველზე, რომელიც ბეთ-რეხობთანაა. და ააშენეს მათ ქალაქი და დამკვიდრდნენ მასში.

²⁹და უწოდეს ქალაქს სახელად დანი, მათი მამის, დანის, სახელობაზე, რომელიც ისრაელს შეეძინა. თუმცა ქალაქს თავდაპირველად ლაიში ერქვა.

³⁰და აღმართეს დანის ძეთ ქანდაკი; და იონათანი, ძე გერშომისა, მანაშეს ძისა, იგი და მისი ძენი დანის ძეთა ტომის მღვდლები იყვნენ იმ ქვეყნის გადასახლების დღემდე.

³¹და ედგათ მიქას გაკეთებული ქანდაკი მთელი იმ ხნის მანძილზე, სანამ ღვთის სახლი შილოში იყო.