Read ქართული ბიბლია, სრული ვერსია Judges 20 Bible Online

Judges 20 - ქართული ბიბლია, სრული ვერსია bible

Judges 20

¹და გამოვიდა ყველა ისრაელის ძე, და შეიკრიბა თემი, როგორც ერთი კაცი, დანიდან ბეერ-შებაყამდე, და გალაადის ქვეყანა, უფლის წინაშე მიცფაში.

²და გამოცხადნენ მეთაურები მთელი ერისა, ისრაელის ყოველი ტომისა, ღვთის ერის კრებულში, 400 ათასი ქვეითი, მახვილის ამომწვდელი კაცი.

³და შეიტყვეს ბენიამინის ძეთ, ისრაელის ძეთა ასვლა მიცფაში. და თქვეს ისრაელის ძეთ: „თქვით, როგორ მოხდა ეს ბოროტება?“

⁴და მიუგო ლევიანმა კაცმა, მოკლული ქალის ქმარმა: „ბენიამინის გიბეყაში მივედი ჩემს ხარჭასთან ერთად ღამის გასათევად.

⁵და აღდგნენ ჩემზე გიბეყას მკვიდრნი, და გარს შემოერტყნენ იმ სახლს ღამით და მოკვლა დამიპირეს, ხარჭა გამიუპატიურეს და მოკვდა იგი.

⁶და ავიღე ჩემი ხარჭა, ასო-ასო დავჭერი იგი და ისრაელის სამკვიდრებლის ყველა მხარეში დავაგზავნე, რადგან უხამსობა ჩაიდინეს ისრაელში.

⁷აჰა, თქვენ ყველამ, ისრაელის ძენო, განიხილეთ ეს საქმე და აქვე გადაწყვიტეთ!“

⁸და ერთი კაცივით აღდგა მთელი ერი და თქვა: „არავინ არ წავა თავის კარავში და არავინ არ გაბრუნდება შინ.

⁹და აჰა, რა უნდა ვუყოთ ახლა გიბეყას: წილისყრით უნდა გავილაშქროთ მასზე.

¹⁰ისრაელის თითეულ ტომში ასიდან ათი კაცი შევარჩიოთ, ათასიდან — ასი, 10 ათასიდან — ათასი, ხალხისათვის საგზალი მოვატანინოთ, რომელიც, ბენიამინის გიბეყაზე წავლენ, დასაჯონ ისინი იმ უხამსობის გამო, რაც ისრაელში ჩაიდინეს!“

¹¹და ისრაელის ყველა კაცი შეიკრიბა ქალაქის წინააღმდეგ, ერთი კაცივით გაერთიანდნენ.

¹²და გაგზავნეს ისრაელის ტომებმა კაცები ბენიამინის მთელს ტომში და შეუთვალეს: „ეს რა ბოროტება მომხდარა თქვენში?

¹³და ახლა მოგვეცით ის გარყვნილი ხალხი, გიბეყაში რომ გყოლიათ, რათა დავხოცოთ და აღმოვფხვრათ ბოროტება ისრაელიდან.“ მაგრამ არ ინებეს ბენიამინის ძეთ თავიანთ მოძმეთა, ისრაელის ძეთა, ხმის გაგონება.

¹⁴და შეიკრიბნენ გიბეყაში ბენიამინის ძენი თავ-თავიანთი ქალაქებიდან, რათა ომი გაემართათ ისრაელის ძეებთან.

¹⁵და აღირიცხნენ ბენიამინის ძენი იმ დღეს ქალაქთაგან 26 ათასი მახვილის ამომწვდელი კაცი; მათ გარდა გიბეყას მკვიდრთაგან 700 რჩეული კაცი აღირიცხა.

¹⁶მთელი ამ ხალხიდან 700 რჩეული კაცი ცაცია იყო. თითეულ მათგანს თმის ღერისთვისაც რომ ესროლა შურდულით ქვა, არ ააცდენდა.

¹⁷და ისრაელის ძენი, ბენიამინის გარდა, 400 ათასი მახვილის ამომწვდელი კაცი აღირიცხა, ყველა მათგანი მებრძოლი იყო.

¹⁸და ადგნენ ისინი და ავიდნენ ბეთელში, და დაეკითხენ ღმერთს და თქვეს ისრაელის ძეთ: „რომელი ჩვენგანი გავიდეს პირველი ბენიამინის ძეებთან საომრად?“ და უთხრა მათ უფალმა: „იუდა წაგიძღვებათ წინ!“

¹⁹და ადგნენ ისრაელის ძენი დილით და დაიბანაკეს გიბეყასთან.

²⁰და გავიდნენ ისრაელის კაცები ბენიამინთან საომრად, და დადგნენ ისრაელის კაცები საბრძოლო წყობით გიბეყას მახლობლად.

²¹და გამოვიდნენ ბენიამინის ძენი გიბეყადან, და დასცეს იმ დღეს 22 ათასი ისრაელის კაცი მიწაზე.

²²და მხნეობა მოიკრიბა ისრაელის ერმა, და კვლავ დადგა საბრძოლო წყობით იმ ადგილას, სადაც წინა დღეს იდგნენ.

²³და წავიდნენ ისრაელის ძენი და ტიროდნენ უფლის წინაშე საღამომდე, და ეკითხებოდნენ უფალს: „ისევ გავიდე ჩემი ძმის, ბენიამინის ძეებთან საომრად?“ და თქვა უფალმა: „გადით მათ წინააღმდეგ.“

²⁴და მიუახლოვდნენ ისრაელის ძენი ბენიამინის ძეებს მეორე დღეს,

²⁵და გამოვიდა ბენიამინი გიბეყადან მათ წინააღმდეგ მეორე დღეს, და დასცეს მიწაზე ისრაელის ძეთაგან კიდევ 18 ათასი კაცი, ყველა მახვილის ამომწვდელი.

²⁶და გაემართა მთელი ისრაელიანობა და მთელი ერი, და მივიდა ბეთელში, და ტიროდნენ უფლის წინაშე. დასხდნენ იმ დღეს და საღამომდე იმარხულეს; და აღავლინეს სრულადდასაწველი და სამშვიდობო შესაწირავები უფლის წინაშე.

²⁷და ჰკითხეს ისრაელის ძეთ უფალს (იმ ხანებში ღვთის აღთქმის კიდობანი იქ ესვენა

²⁸და ფინეხასი, ძე ელეაზარისა, აარონის ძისა მის წინ მსახურობდა): „ისევ გავიდე ჩემი ძმის, ბენიამინის ძეებთან საომრად, თუ შევწყვიტოთ?“ და უთხრა მათ უფალმა: „გადი. ხვალ ხელში ჩაგაგდებინებთ მას.“

²⁹და ხალხი ჩაასაფრა ისრაელმა გიბეყას ირგვლივ.

³⁰და გაილაშქრეს ისრაელის ძეთ ბენიამინის ძეების წინააღმდეგ მესამე დღეს, და წინანდებურად საბრძოლო წყობით დადგნენ გიბეყას წინ.

³¹და გამოვიდნენ ბენიამინის ძენი ერის წინააღმდეგ, შორს გასცდნენ ქალაქს და იწყეს უწინდებურად მუსრის გავლება გზებზე, რომელთაგან ერთი ბეთელისკენ მიდის, მეორე — გიბეყასაკენ, და ველზე ისრაელის ოცდაათამდე კაცი მოკლეს.

³²და თქვეს ბენიამინის ძეთ: „პირვანდელის მსგავსად ეცემიან ჩვენს წინაშე.“ ისრაელის ძეთ კი თქვეს: „გავიქცეთ და გამოვიტყუოთ ისინი ქალაქიდან გზებზე.“

³³და ადგა ისრაელის ყველა კაცი თავ-თავისი ადგილიდან და განლაგდა ბაყალ-თამარში, და ისრაელის ჩასაფრებული ხალხი გამოვიდა თავისი ადგილიდან, გებაყის დასავლეთიდან.

³⁴და მიადგა გიბეყას 10 ათასი რჩეული კაცი მთელი ისრაელიდან, და სასტიკი ბრძოლა გაიმართა, მაგრამ ბენიამინის ძეთ არ იცოდნენ, რომ უბედურება ელოდათ.

³⁵და განგმირა უფალმა ბენიამინი ისრაელის წინაშე, და მოსპეს ისრაელის ძეთ ბენიამინის ძეთაგან იმ დღეს 25100 კაცი, ყველა მახვილის ამომწვდელი.

³⁶და იხილეს ბენიამინის ძეთ, რომ დამარცხდნენ; და ადგილი უტიეს ისრაელის კაცებმა ბენიამინს, რადგან იმედი ჰქონდათ ჩასაფრებული ხალხისა, გიბეყას მახლობლად რომ ჰყავდათ ჩაყენებული.

³⁷და ჩასაფრებულები გაეჩქარნენ და ეკვეთნენ გიბეყას, შეიჭრნენ და მახვილის პირით მოსრეს მთელი ქალაქი.

³⁸ისრაელის კაცებს კი ჩასაფრებულ ხალხთან ნიშნად ჰქონდათ დათქმული, რომ ქალაქიდან კვამლის დიდ სვეტს აადენდნენ.

³⁹და როცა უკან დაიხიეს ისრაელის კაცებმა ბრძოლაში და იწყო ბენიამინმა მუსვრა, და დახოცა ისრაელის ოცდაათამდე კაცი და თქვა: „ისევ ეცემიან ჩვენს წინაშე, როგორც პირველი ბრძოლის დროს.“

⁴⁰მაშინ კვამლი აღიმართა ქალაქზე სვეტივით. მოიხედა ბენიამინმა უკან და აჰა, ცაში მიდის მთელი ქალაქი.

⁴¹და გამობრუნდნენ ისრაელის კაცები, ბენიამინის კაცები კი შედრკნენ, რადგან დაინახეს, რომ თავს უბედურება დაატყდათ.

⁴²და გაექცნენ ისინი ისრაელის კაცებს უდაბნოს გზაზე, მაგრამ ომი მაინც წამოეწიათ. და ქალაქიდან გამოსულებმა მოსპეს ისინი თავიანთ შორის.

⁴³და გარს შემოერტყნენ ბენიამინს, სდიეს მას მენუხამდე, და ჟლიტეს თვით გიბეყას აღმოსავლეთამდე.

⁴⁴და დაეცა ბენიამინისაგან 18 ათასი კაცი, ყველა მამაცი ვაჟკაცი.

⁴⁵და მობრუნდნენ და უდაბნოსაკენ, რიმონის კლდისაკენ, გაქუსლეს. გზადაგზა 5 ათასი კაცი კიდევ დახოცეს; და სდიეს გიდომამდე, და მოსრეს მათგან 2 ათასი კაცი.

⁴⁶და მთლიანად იმ დღეს ბენიამინიდან 25 ათასი დაეცა, მახვილის ამომწვდელი ყველა მამაცი ვაჟკაცი.

⁴⁷და 600 კაცი მობრუნდა და გაიქცა უდაბნოსაკენ, რიმონის კლდისკენ, და იქ იყვნენ რიმონის კლდეში ოთხი თვე.

⁴⁸და ისრაელის კაცები კვლავ მიუბრუნდნენ ბენიამინის ძეთ და მოსრეს ისინი მახვილის პირით: მთელი ქალაქი და პირუტყვი, და რაც კი იქ იყო. ასევე ყველა ქალაქი, რაც მათ დაუხვდათ, ცეცხლში დაწვეს.