Read ქართული ბიბლია, სრული ვერსია Judges 5 Bible Online

Judges 5 - ქართული ბიბლია, სრული ვერსია bible

Judges 5

¹ასე იგალობეს იმ დღეს დებორამ და ბარაკმა, აბინოყამის ძემ:

²„წინამძღოლი რომ წინამძღოლობდა, ხალხი ნებით რომ სწირავდა თავს, აკურთხეთ უფალი!

³ისმინეთ, მეფენო, ყური მომაპყარით, მთავარნო: ეს მე ვარ, მე ვუგალობებ უფალს, მე ვუმღერი უფალს, ისრაელის ღმერთს.

⁴როცა სეყირიდან გადმოხვედი, უფალო, როცა ედომის ველზე გამოხვედი, მიწა ირყეოდა, ცაც კი იღვენთებოდა, ღრეუბლებიც კი წყლად იღვრებოდნენ.

⁵მთები იდრიკებოდნენ უფლის წინაშე, თავად ეგ სინაიც კი, უფლის წინაშე, ისრაელის ღმრთისა.

⁶შამგარის დროს, ყანათის ძისა, იაყელის დროს დაცარიელდა შარაგზები, სწორზე ვეღარავინ ბედავდა სიარულს, შორიგზით არჩევდნენ შემოვლას.

⁷სიცოცხლე ჩამკვდარიყო ისრაელის დაბა-სოფლებში, ჩამკვდარი იყო ვიდრე არ აღვდექი მე, დებორა, ვიდრე არ აღვდექი მე, დედა ისრაელში.

⁸ახლი ღმერთები ირჩიეს, ამიტომაც ომია კარიბჭესთან. თუ უჩანს ფარ-შუბი 40 ათასს ისრაელში?

⁹ისრაელის წინამძღოლებთანაა ჩემი გული, ხალხში თავგამოდებულებთან! აკურთხეთ უფალი!

¹⁰თეთრ სახედრებზე ამხედრებულნო, ხალიჩებზე ფეხმორთხმულნო, გზებზე ქვეითად მავალნო, თქვით საგალობელი!

¹¹იქ, სადაც დასარწყულებლად აგროვებენ ნახირს, უფლის სიმართლეს იმღერებენ, ისრაელის წინამძღოლთა სიმართლეს! კარიბჭესთან მოზღვავდა უფლის ერი!

¹²გაიღვიძე, გაიღვიძე, დებორა! გაიღვიძე, გაიღვიძე, იმღერე საგალობელი! აღიძარ ბარაკ! დაატყვევე შენი დამატყვევარი, აბინოყამის ძეო!

¹³მაშინ ძლიერთა ნატამალს დაუმორჩილა უფალმა ხალხი; უფალმა დამიმორჩილა მამაცნი.

¹⁴ეფრემიდან მოვიდნენ ყამალეკში დამკვიდრებულნი; ბენიამინიც შენთანაა, შენს ხალხში; მაქირიდან მოვიდნენ თავკაცები, ზებულუნიდან — წინამძღოლთა კვერთხისმპყრობელნი.

¹⁵ისაქარის მთავრებიც დებორასთან არიან; ბარაკის ერთგულია ისაქარი — მის კვალდაკვალ მიიჭრა ველზე. რეუბენის შტოებში დიდი თათბირია.

¹⁶რას დამჯდარხარ ფარეხთა შორის და უსმენ ცხვრების ბღავილს? რეუბენის შტოებში დიდი თათბირია!

¹⁷გალაადი იორდანეს გაღმა დავანებულა; რატომ შეყუჟულა დანი ხომალდებში? ზღვისპირას დამჯდარა აშერი და თავის სანახებთან დავანებულა.

¹⁸სიკვდილი არად მიაჩნია ზებულუნის ხალხს. ტრამალის ბორცვებზე ნაფთალია.

¹⁹მოვიდნენ მეფენი, შეიბნენ; მაშინ შეიბნენ ქანაანის მეფენი თაყანაქში, მეგიდოს წყლებთან, მაგრამ მცირედი ვერცხლიც ვერ იალაფეს.

²⁰ციდან ებრძოდნენ, თავიანთი გზებიდან ებრძოდნენ ვარსკვლავები სისერას.

²¹კიშონის ხევმა წაიღო ისინი, ძველმა ხევმა, კიშონის ხევმა. გაემართე, სულო ჩემო, ძლიერებით!

²²სრბოლისაგან იმსხვრეოდნენ ცხენთა ფლოქვები მაშინ, მისი ვაჟკაცების სრბოლისაგან.

²³დაწყევლეთო მეროზი, — ამბობს ანგელოზი უფლისა, — დაწყევლეთ, დაწყევლეთ მისი მკვიდრნი, რადგან არ გამოვიდნენო უფლის საშველად, უფლის საშველადო ვაჟკაცებთან ერთად!

²⁴კურთხეულ იყოს დიაცთა შორის იაყელი, ხებერ კენიელის ცოლი! კარავში მცხოვრებ დიაცთა შორის კურთხეულ იყოს!

²⁵წყალი მოსთხოვა და რძე მიართვა, სეფეთასით მიართვა მოუხდელი რძე.

²⁶მარცხენა ხელით პალოს დასწვდა, მარჯვენათი — უროს; მოუქნია სისერას, თავში დაჰკრა, გაუპო, საფეთქელი შეულეწა.

²⁷მის ფეხებთან ჩაიკეცა, დაეცა, ვეღარ ადგა; მის ფეხებთან ჩაიკეცა, დაეცა, სადაც ჩაიკეცა, იქვე დაეცა განგმირული.

²⁸სარკმლიდან იყურება, კანკლედიდან გაჰკივის სისერას დედა: ‘რატომ იგვიანებს მისი მხედრობა, რამ შეაფერხა მისი ეტლის თვლები?’

²⁹პასუხობენ გონიერი სეფექალები, თვითონვე ამბობს თავისივე სიტყვების პასუხად:

³⁰‘ნადავლს იშოვნიდნენ და იყოფდნენ: თითო ან ორ-ორი მხევალი თითო მეომარს, ნაალაფარი ჭრელი სამოსელი სისერას, ნაალაფარი ჭრელი სამოსელი, ორხოულად ნაქსოვი, ტყვის ტანზე შემოძარცული.’

³¹ყველა მტერი ასე დაგელიოს, უფალო! მისი მოყვარულნი ამომავალ მზესავით გაძლიერდნენ!“ და დაისვენა ქვეყანამ 40 წელი.