Read ქართული ბიბლია, სრული ვერსია Judges 7 Bible Online

Judges 7 - ქართული ბიბლია, სრული ვერსია bible

Judges 7

¹და ადგა დილაადრიანად იერუბაყალი — იგივე გედეონი — და მასთან მყოფი მთელი მებრძოლი ხალხი, და ხაროდის წყაროსთან; მიდიანის ბანაკი იყო მის ჩრდილოეთით, მორეს ბორცვთან, ველზე.

²და უთხრა უფალმა გედეონს: „ბევრი ხალხი გყავს საიმისოდ, რომ მიდიანი ჩავუგდო მათ ხელში, რათა არ გაყოყოჩდეს ისრაელი ჩემზე, და არ მითხრას: მე ჩემმა ხელმა მიხსნაო.

³ახლა, მოდი, გამოუცხადე ხალხს ხმამაღლა და უთხარი: ვინც შეშინებულია და კანკალებს, უკან გაბრუნდეს და წავიდეს-თქო გალაადის მთიდან.“ და გაბრუნდა ხალხიდან 22 ათასი, და 10 ათასი დარჩა.

⁴და უთხრა უფალმა გედეონს: „ხალხი მაინც ბევრია; ჩაიყვანე ისინი წყალზე და იქ გამოგირჩევ; და ვისზეც გეტყვი, ეს გამოგყვეს-მეთქი, ის გამოგყვეს; ხოლო ვისზეც გეტყვი: ეს არ გამოგყვეს-მეთქი, ნუ წამოვა.“

⁵და ჩაიყვანა გედეონმა ხალხი წყალზე. და უთხრა უფალმა გედეონს: „ყველა, ვინც ძაღლივით ენით შესვლეპს წყალს, ცალკე დააყენე; ყველა, ვინც, დასალევად ჩაიმუხლება, ასევე გამოაცალკევე.“

⁶და მსვლეპავთა რიცხვი, ვინც პეშვი პირთან მიიტანა, 300 კაცი იყო; და ყველა დანარჩენმა ხალხმა ჩაიმუხლა წყლის დასალევად.

⁷და უთხრა უფალმა გედეონს: „ამ 300 კაცით გიხსნით და ხელში ჩაგიგდებ მიდიანს, და მთელი დანარჩენი ხალხი უკან გაბრუნდეს.“

⁸და აიღეს მათ ხალხის საგზალი და რქის ბუკები; და დაიტოვა გედეონმა სამასი კაცი, ხოლო დანარჩენი ხალხი გაუშვა ბანაკში; და იყო მიდიანის ბანაკი მათ ქვემოთ, ველზე.

⁹და იმ ღამეს უთხრა მას უფალმა: „ადექი, ჩადი და დაეცი მათ ბანაკს, რადგან ხელში გაძლევ მათ.

¹⁰და თუ მარტოს გეშინია ჩასვლა, შენ და შენი მსახური ფურა ჩადით.

¹¹და მოისმენ, რასაც ლაპარაკობენ, და ეს მკლავს გაგიმაგრებს და დაეცემი ბანაკს.“ და ჩავიდნენ ის და მისი მსახური ფურა, იარაღასხმულთა განაპირა რიგებისაკენ, ბანაკში რომ იყვნენ.

¹²და მიდიანი, ყამალეკი და ყველა ძე აღმოსავლეთისა ველზე იყვნენ განლაგებულნი, კალიასავით ურიცხვნი; და მათ აქლემებს თვლა არ ჰქონდა, იმდენი იყვნენ, როგორც ქვიშა ზღვის პირას.

¹³და მოვიდა გედეონი. და აჰა, ერთი კაცი სიზმარს უყვება თავის მოყვასს და ეუბნება: „აჰა, სიზმარი მესიზმრა: ვითომც ქერის პური დაგორდა მიდიანის ბანაკისკენ, კარავს რომ მიაღწია, დაეჯახა და დასცა, თავდაყირა დააყენა კარავი, და დაემხო კარავი.“

¹⁴მეორემ მიუგო და უთხრა: „ეს სხვა რა უნდა იყოს, თუ არა მახვილი გედეონისა, იოაშის ძისა, ისრაელიანისა; მის ხელში ჩაუგდია ღმერთს მიდიანი და მთელი ბანაკი.“

¹⁵და როცა გედეონმა ამ სიზმრის მოყოლა და მისი ახსნა მოისმინა, თაყვანი სცა უფალს და აბრუნდა ისრაელის ბანაკში, და თქვა: „ადექით, რადგან უფალმა ხელში ჩაგიგდოთ მიდიანის ბანაკი.“

¹⁶და გაჰყო მან სამასი კაცი სამ რაზმად, და ყველას ბუკები და ცარიელი დოქები მისცა ხელში, დოქებში კი ლამპრები იყო დამალული.

¹⁷და უთხრა მათ: „მიყურეთ და იგივე გააკეთეთ: აჰა, მივალ მე ბანაკთან, და მოიქეცით, როგორც მე მოვიქცევი!

¹⁸და დავცემთ ბუკს მე და ჩემთან მყოფნი; თქვენც ჩაჰბერეთ ბუკებს მთელი ბანაკის ირგვლივ და იყვირეთ: ‘უფლისათვის და გედეონისათვის!’ “

¹⁹მივიდა ბანაკთან გედეონი და მასთან მყოფი 100 კაცი, როცა შუა სახმილავი იწყებოდა და გუშაგები იცვლებოდნენ, ატეხეს ბუკისცემა და დაამსხვრიეს დოქები, ხელში რომ ეჭირათ.

²⁰და ბუკსა სცა სამივე გუნდმა და დალეწეს დოქები; მარცხენა ხელში ლამპრები ეჭირათ, ხოლო მარჯვენა ხელში ბუკები; ბუკსა სცემდნენ და გაჰყვიროდნენ: „მახვილი უფლისათვის და გედეონისათვის!“

²¹თითოეული თავ-თავის ადგილას იდგა, ბანაკის ირგვლივ. და აირია მადიანელთა მთელი ბანაკი, ყვიროდნენ და მირბოდნენ.

²²და ბუკსა სცა სამასმა კაცმა და უფალმა ერთმანეთზე აღამართინა მახვილი მადიანელთა მთელ ლაშქარს; და უკუიქცა ლაშქარი და მირბოდა ბეთ-შიტამდე ცერერასაკენ, აბელ-მეხოლას საზღვრამდე, ტაბათის მახლობლად.

²³და დაძახილზე გამოვიდნენ ისრაელიანები ნაფთალიდან, აშერიდან და მთელი მანაშედან და დაედევნენ უკან მიდიანელთ.

²⁴და გაგზავნა მოციქულები გედეონმა ეფრემის მთაში, შეუთვალა: „ჩამოდით, წინ დაუხვდით მიდიანელთ და გადაუჭერით წყალზე ფონები, დაიკავეთ იორდანეს ნაპირი ბეთ-ბარამდე!“ გამოვიდა მთელი ეფრემი და გადაუჭრეს ფონები მდინარეზე — დაიკავეს იორდანეს სანაპირო თვით ბეთ-ბარამდე.

²⁵და შეიპყრეს მიდიანის ორი მთავარი: ყორები და ზეები, და მოკლეს ყორები ყორების კლდესთან, ხოლო ზეები ზეების საწნახელთან, და დაედევნენ მიდიანელთ; და ყორებისა და ზეების თავები გედეონს მოუტანეს იორდანეს გაღმიდან.