Read ქართული ბიბლია, სრული ვერსია 1 Samuel 11 Bible Online

1 Samuel 11 - ქართული ბიბლია, სრული ვერსია bible

1 Samuel 11

¹გამოვიდა ნახაშ ყამონელი და შემოადგა იაბეშ-გალაადს. და უთხრეს იაბეშელმა კაცებმა ნახაშს: „შეკარი კავშირი ჩვენთან და დაგემორჩილებით.“

²უთხრა მათ ნახაშ ყამონელმა: „ჯერ ყველას მარჯვენა თვალებს დაგთხრით, რომ სირცხვილი ვაჭამო მთელს ისრაელს, და მერე შევკრავ თქვენთან კავშირს.“

³უთხრეს იაბეშის უხუცესებმა: „შვიდი დღის ვადა მოგვეცი, რომ მოციქულები დავგზავნოთ მთელს ისრაელის მხარეში, და თუ არავინ იქნა ჩვენი მშველელი, გამოვალთ თქვენს წინააღმდეგ.“

⁴მივიდნენ მოციქულები საულის გიბეყაში და თქვეს ყოველივე ხალხის გასაგონად. ხმა აღიმაღლა მთელმა ხალხმა და იწყო ტირილი.

⁵აჰა, საულიც მოდის, ხარებს მოერეკება მინდვრიდან. „რა მოუვიდა ხალხს, რა ატირებთ?“ — იკითხა საულმა. და მიუგეს იაბეშელთა ნათქვამი.

⁶ამ სიტყვების გაგონებაზე ღვთის სული გადმოვიდა საულზე და ძლიერ განრისხდა იგი.

⁷ადგა და აკუწა უღელი ხარი და მოციქულების ხელით დაგზავნა მთელს ისრაელში, და უბრძანა ეთქვათ: „ვინც საულსა და სამუელს არ გაჰყვება, ასე მოუვათ მის ხარებს.“ უფლის შიში დაეცა ხალხს და გამოვიდა, როგორც ერთი.

⁸საულმა აღრიცხა ისინი ბეზეკში: ისრაელიანები 300 ათასი მამაკაცი იყო, იუდას კაცები — 70 ათასი.[2]

⁹უთხრეს მოსულ მოციქულებს: „ასე უთხარით იაბეშ-გალაადის კაცებს: ხვალ, მზე რომ დააცხუნებს, თქვენი ხსნა იქნება-თქო.“ როდესაც მოვიდნენ მოციქულები და შეატყობინეს იაბეშელთ, გაიხარეს მათ.

¹⁰და თქვეს იაბეშელებმა: „ხვალ გამოვალთ თქვენს წინააღმდეგ და, რაც გენებოთ, ის გვიყავით.“

¹¹მეორე დღეს სამ რაზმად დაჰყო საულმა ხალხი და დილის სახმილავზე[3] შევიდნენ შუაგულ ბანაკში და შუადღის პაპანაქებამდე გაწყვიტეს ყამონელები. გადარჩენილნი კი ისე დაიფანტნენ, რომ ორს ერთად ვერ ნახავდა კაცი.

¹²უთხრა ხალხმა სამუელს: „ვინ ამბობდა: ‘ნუთუ საულმა უნდა იმეფოსო ჩვენზე?’ მოგვეცი ის კაცები, რომ დავხოცოთ.“

¹³საულმა კი თქვა: „ერთი კაციც არ მოკვდება დღეს, რადგან ხსნა მოუვლინა უფალმა დღეს ისრაელს.“

¹⁴უთხრა სამუელმა ხალხს: „წამოდით, წავიდეთ გილგალში და განვაახლოთ იქ მეფობა.“

¹⁵წავიდა მთელი ხალხი გილგალში, და იქ უფლის წინაშე გაამეფეს საული, და შესწირეს სამშვიდობო მსხვერპლი უფლის წინაშე. და ძლიერ გაიხარეს იქ საულმა და ყოველმა ისრაელიანმა.