Read ქართული ბიბლია, სრული ვერსია 1 Samuel 12 Bible Online

1 Samuel 12 - ქართული ბიბლია, სრული ვერსია bible

1 Samuel 12

¹უთხრა სამუელმა მთელს ისრაელს: „აჰა, შევისმინე თქვენი და როგორც მითხარით, დაგისვით მეფე.

²ამიერიდან თქვენი მეფე წაგიძღვებათ წინ. მე დავბერდი და გავჭაღარავდი; ჩემი ძენი თქვენთან არიან. მე მიგიძღოდით წინ ჩემი სიყმაწვილიდან დღემდე.

³აჰა, მე აქ ვარ, და მამხილეთ უფლისა და მისი ცხებულის წინაშე, თუ ვინმესთვის ხარი ან სახედარი წამირთმევია, თუ ვინმე შემივიწროებია, თუ ვინმე დამიჩაგრავს; თუ ვინმეს ხელიდან ქრთამი ამიღია, თვალი რომ დამეხუჭა მის საქმეზე, მსურს უკან დავუბრუნო.“

⁴უთხრეს: „არც შეგივიწროებივართ და არც დაგიჩაგრივართ, არც ვინმეს ხელიდან აგიღია რაიმე.“

⁵მან თქვა: „უფალი იყოს მოწმე თქვენს შორის, და მისი ცხებული იყოს მოწმე ამ დღეს, რომ ვერაფერი ჰპოვეთ ჩემს ხელში.“ და თქვა ხალხმა: „იყოს მოწმე!“

⁶და მიუგო სამუელმა ხალხს: „სწორედ უფალი იყოს მოწმე, უფალი, რომელმაც მოსე და აარონი დაადგინა, და თქვენი მამები ეგვიპტის ქვეყნიდან გამოიყვანა.

⁷აქეთ მოდექით, რომ თქვენთან ერთად განვსაჯო უფლის წინაშე ყველა მისი სიკეთე, რაც მან თქვენზე და თქვენს მამებზე მოიმოქმედა.

⁸მას შემდეგ, რაც იაკობი მივიდა ეგვიპტეში და თქვენმა მამებმა შეჰღაღადეს უფალს, მოავლინა ღმერთმა მოსე და აარონი თქვენი მამების ეგვიპტიდან გამოსაყვანად და ამ ადგილას დასასახლებლად.

⁹მაგრამ როცა დაივიწყეს მათ უფალი, თავიანთი ღმერთი, ხელში ჩაუგდო ისინი სისერას, ხაცორის მხედართმთავარს, და ჩაუგდო ხელში ფილისტიმელებს, და ჩაუგდო ხელში მოაბელთა მეფეს, რომელნიც ებრძოდნენ მათ.

¹⁰მაგრამ როცა შეჰღაღადეს უფალს და თქვეს: ‘შევცოდეთ, რადგან განვუდექით უფალს და ვემსახურებოდით ბაყალებსა და ყაშთორეთებს; ახლა გვიხსენი მტრების ხელთაგან და გემსახურებით,’

¹¹მოავლინა უფალმა იერუბაყალი და ბარაკა, და იფთახი და სამუელი. ის გიფარავდათ გარეშემო მტრების ხელთაგან და უსაფრთხოდ ცხოვრობდით.

¹²მაგრამ როცა დაინახეთ, რომ ყამონელთა მეფე, ნახაში მოდის თქვენს წინააღმდეგ, მითხარით: არა, მეფემ იმეფოსო ჩვენზე! მაშინ, როცა უფალი ღმერთი მეფობდა თქვენზე.

¹³ახლა, აჰა, აქ არის თქვენი მეფე, რომელიც აირჩიეთ და მოითხოვდით; აჰა, მოგცათ უფალმა მეფე.

¹⁴თუ გექნებათ უფლის შიში, თუ ემსახურებით მას, თუ შეისმენთ მის ხმას და წინ არ აღუდგებით მის ბრძანებებს, თუ თქვენცა და თქვენი მეფეც, თქვენზე რომ ხელმწიფებს, მიჰყვებით უფალს, თქვენს ღმერთს, უფლის ხელი აღარ აღიმართება თქვენს წინააღმდეგ.

¹⁵თუ არ შეისმენთ უფლის ხმას და წინ აღუდგებით უფლის ბრძანებებს, უფლის ხელი იქნება თქვენი და თქვენი მამების წინააღმდეგ.

¹⁶ახლა კი დადექით და შეხედეთ, რა დიდ საქმეს აღასრულებს უფალი თქვენს თვალწინ.

¹⁷ალოობა ხომ არ არის ახლა? მაგრამ მე შევთხოვ უფალს და მოავლენს ჭექა-ქუხილსა და წვიმას,[4] და გაიგებთ და ნახავთ, რა დიდი ბოროტება ჩაიდინეთ უფლის თვალში, როცა მეფე მოითხოვეთ.“

¹⁸შესთხოვა სამუელმა უფალს და მოავლინა უფალმა ჭექა-ქუხილი და წვიმა იმ დღეს. ძლიერ შეეშინდა მთელ ხალხს უფლისა და სამუელის.

¹⁹და უთხრა ხალხმა სამუელს: „შეევედრე უფალს, შენს ღმერთს, შენს მსახურთა გულისათვის, რომ არ გავწყდეთ, რადგან მთელს ჩვენს ცოდვებს ის ბოროტებაც დავუმატეთ, რომ მეფე მოვითხოვეთ.“

²⁰უთხრა სამუელმა ხალხს: „ნუ გეშინიათ, უკვე ჩადენილი გაქვთ მთელი ეს ბოროტება; ოღონდ ნუღარ განუდგებით უფალს და მთელი გულით ემსახურეთ მას.

²¹ნუ მიიქცევით კერპებისაკენ, რადგან უსარგებლონი არიან ისინი; ვერ გიხსნიან, რადგან ფუჭნი არიან.

²²უფალი კი არ მიატოვებს თავის ერს თავისი დიდებული სახელის გამო, რადგან ინება უფალმა, რომ თავის ერად ამოერჩიეთ თქვენ.

²³მე კი, ნუმც შემეცოდოს უფლისათვის, ნუმც შემეწყვიტოს თქვენს გამო ვედრება მისთვის. მე დაგაყენებთ თქვენ სასიკეთო და სწორ გზაზე.

²⁴ოღონდ გეშინოდეთ უფლისა და ემსახურეთ ჭეშმარიტებით და მთელი გულით, რადგან ხედავთ, რა დიდი საქმე აქვს აღსრულებული თქვენთვის.

²⁵თუ მაინც არ აიღებთ ხელს ბოროტების კეთებაზე, თქვენც დაიღუპებით და თქვენი მეფეც.“