Read ქართული ბიბლია, სრული ვერსია 1 Samuel 16 Bible Online

1 Samuel 16 - ქართული ბიბლია, სრული ვერსია bible

1 Samuel 16

¹და უთხრა უფალმა სამუელს: „როდემდის უნდა წუხდე საულზე? მე ხომ განვაყენე იგი ისრაელის მეფობისგან? აავსე რქა ზეთით და წადი; ბეთლემელ იესესთან გაგზავნი, რადგან მის ძეთა შორის დავიგულე ჩემთვის მეფე.“

²და თქვა სამუელმა: „როგორ წავიდე? საულმა რომ გაიგოს, მომკლავს.“ და უთხრა უფალმა: „თან წაიყვანე ერთი დეკეული ნახირიდან და თქვი: უფლისთვის მსხვერპლის შესაწირად მოვედი-თქო.

³მსხვერპლთან დაუძახე იესეს და მე გასწავლი, რაც უნდა გააკეთო, ზეთს სცხებ მას, ვისზეც გეტყვი.“

⁴უფლის სიტყვისამებრ მოიქცა სამუელი და მივიდა ბეთლემს. ძრწოლით გამოეგებნენ ქალაქის უხუცესები და უთხრეს: „ხომ მშვიდობაა?“

⁵და უპასუხა მან: „მშვიდობაა! მსხვერპლი მინდა შევწირო უფალს, ამიტომ მოვედი. განიწმიდენით და მსხვერპლთან წამომყევით.“ განწმიდა სამუელმა იესე და მისი ძენი და მსხვერპლთან მიიწვია.

⁶და როცა მივიდნენ, შეხედა მან ელიაბს და გაიფიქრა: „აჰა, უფლის წინაშეა მისი ცხებული!“

⁷და უთხრა უფალმა სამუელს: „ნუ უყურებ მის გარეგნობას, ნურც მის ახოვანებას, რადგან მე განვაყენე იგი, რადგან უფალი ადამიანი როდია, რომ თვალადობით განსჯიდეს, არამედ გულს უყურებს კაცისას.“

⁸და მოუხმო იესემ აბინადაბს და სამუელის წინ გაატარა. და თქვა მან: „არც ეს აურჩევია უფალს.“

⁹და ჩამოატარა იესემ შამა, და თქვა სამუელმა: „არც ეს არის უფლის რჩეული.“

¹⁰ასე ჩამოატარა იესემ თავისი შვიდი ძე სამუელის წინაშე, მაგრამ უთხრა სამუელმა იესეს: „ამათგან არც ერთი არ აურჩევია უფალს.“

¹¹და ჰკითხა სამუელმა იესეს: „სულ ეს არიან შენი ყმაწვილები?“ და თქვა მან: „კიდევ დარჩა ამათ გარდა უმცროსი, მაგრამ ის ცხვარსა მწყემსავს.“ და უთხრა სამუელმა იესეს: „გააგზავნე და მოაყვანინე, რადგან მის მოსვლამდე ინახით ვერ დავსხდებით.“

¹²გააგზავნა იესემ და მოაყვანინა ის. წითური იყო, ლამაზი თვალები ჰქონდა და სანდომიანი სახე. და უთხრა უფალმა სამუელს: „ადექი, სცხე მას, რადგან სწორედ ეს არის ის.“

¹³და აიღო სამუელმა ზეთით სავსე რქა და სცხო მას მისი ძმების თანდასწრებით. და დაივანა უფლის სულმა დავითზე იმ დღიდან მოყოლებული. ადგა სამუელი და წავიდა რამას.

¹⁴და განეშორა საულს უფლის სული და აწვალებდა ბოროტი სული უფლისაგან.

¹⁵და უთხრეს მისმა მსახურებმა საულს: „აჰა, ბოროტი სული გაშფოთებს შენ ღმერთისაგან.

¹⁶უბრძანოს ჩვენმა ბატონმა შენს მსახურთ, მოძებნონ კაცი, ქნარზე დამკვრელი; და როცა შემოგაწვება ბოროტი სული ღმერთისაგან, ის დაუკრავს და შვება მოგეცემა.“

¹⁷და უთხრა საულმა თავის მსახურთ: „მომიძებნეთ კაცი, კარგად რომ უკრავდეს ქნარზე, და მომიყვანეთ.“

¹⁸და მიუგო ერთმა მსახურთაგანმა და უთხრა: „აჰა, მინახავს ბეთლემელი იესეს ვაჟი, იცის ქნარზე დაკვრა, ქველი და მამაცი კაცია, სიტყვამჭევრი და ლამაზი, უფალია მასთან.“

¹⁹და გაგზავნა საულმა მოციქულები იესესთან და დააბარა: გამომიგზავნე დავითი, შენი ვაჟი, ცხვარში რომ გყავსო.

²⁰და აჰკიდა იესემ სახედარს პური და ერთი ტიკი ღვინო, გამოიყვანა ერთი თიკანი და გაატანა დავითს, თავის ძეს, საულთან.

²¹და მივიდა დავითი საულთან და დადგა მის წინაშე. და ძალზე შეიყვარა იგი საულმა და თავის საჭურველთმტვირთველად დანიშნა.

²²და გაუგზავნა საულმა იესეს კაცები, რომ ეთქვათ: „დარჩეს ჩემთან დავითი, რადგან მადლი ჰპოვა ჩემს თვალში.“

²³და როცა კი შემოაწვებოდა ბოროტი სული ღმერთისაგან საულს, აიღებდა დავითი ქნარს და უკრავდა, და შვებას გრძნობდა საული და უკეთ ხდებოდა, და შორდებოდა ბოროტი სული.