Read ქართული ბიბლია, სრული ვერსია 1 Samuel 22 Bible Online

1 Samuel 22 - ქართული ბიბლია, სრული ვერსია bible

1 Samuel 22

¹და წავიდა იქიდან დავითი და ყადულამის მღვიმეს შეაფარა თავი. და გაიგეს ეს ამბავი მისმა ძმებმა და მამამისის მთელმა სახლმა და ჩავიდნენ მასთან.

²და იკრიბებოდა მასთან ყოველი შეჭირვებული, ყოველი დავალიანებული, ყოველი სულგამწარებული, და უფროსად გაუხდა იგი მათ. ასე შეიკრიბა მასთან 400 კაცი.

³და წავიდა იქიდან დავითი მიცფეში, მოაბელთა ქვეყანაში. და უთხრა მოაბელთა მეფეს: „შეიფარეთ მამაჩემი და დედაჩემი, ვიდრე გავიგებ, რას მიპირებს ღმერთი.“

⁴და მიიყვანა ისინი მოაბელთა მეფის წინაშე. და დარჩნენ ისინი მასთან, ვიდრე დავითი იმ თავშესაფარში იმყოფებოდა.

⁵უთხრა წინასწარმეტყველმა გადმა დავითს: „ნუ დარჩები ამ კლდეებში, ადექი და იუდას ქვეყანაში წადი.“ და წავიდა დავითი და მივიდა ხერეთის ტყეში.

⁶და შეიტყო საულმა, რომ გამოჩნდა დავითი თავისი ხალხითურთ. საული მაშინ გიბეყაში იჯდა, მთაზე, იალღუნის ქვეშ, ხელში შუბი ეჭირა და თავს მსახურები ადგნენ.

⁷უთხრა საულმა მასთან მყოფ მსახურთ: „ისმინეთ, ბენიამინელნო, ნუთუ ყველას ჩამოგირიგებთ იესეს ძე ყანებსა და ვენახებს, ყველას დაგნიშნავთ ათასისთავებად და ასისთავებად,

⁸ჩემს წინააღმდეგ რომ შეითქვით ყველანი და არ გამიმხილეთ, კავშირი თუ ჰქონდა შეკრული ჩემს შვილს იესეს ძესთან? რომ არავინ შემიცოდეთ და არ გამიმხილეთ, ჩემი შვილი თუ მიმხედრებდა ჩემს მსახურს, როგორც დღეს გაცხადდა?“

⁹და მიუგო დოეგ ედომელმა, საულის მსახურებთან ერთად რომ იდგა, და უთხრა: „მე ვნახე იესეს ძე, როცა ნობში მოვიდა ახიმელექთან, ახიტუბის ძესთან,

¹⁰რომელიც უფალს შეეკითხა მის გამო, და საზრდოც მისცა და ფილისტიმელი გოლიათის მახვილიც.“

¹¹და გააგზავნა მეფემ და დაიბარა ახიმელექ მღვდელი, ძე ახიტუბისა, და მამამისის მთელი სახლი და ნობში მყოფი მღვდლები. და მოვიდნენ მეფესთან ყველანი.

¹²და უთხრა საულმა: „ყური მიგდე, ახიტუბის ძევ!“ და მიუგო: „გისმენ, ჩემო ბატონო.“

¹³და უთხრა საულმა: „რად შეჰკარით კავშირი ჩემს წინააღმდეგ შენ და იესეს ძემ, პური და მახვილი რომ მიეცი მას და ღმერთს რომ შეეკითხე მის გამო და რომ ის აღდგა ჩემს წინააღმდეგ და მეურჩება, როგორც დღეს გაცხადდა?“

¹⁴და მიუგო ახიმელექმა მეფეს: „ვინ არის დავითივით ერთგული შენს მსახურთა შორის? მეფის სიძე, შენი მსახური და შენს სახლში პატივდებული?

¹⁵განა დავიწყებდი მისთვის მკითხაობას ღმერთთან? შორს ჩემგან! ნურაფერში დაადანაშაულებს მეფე თავის მსახურს და მამაჩემის მთელს სახლს, რადგან ამ საქმისა არაფერი არ იცის შენმა მსახურმა, არც მცირე, არც დიდი.“

¹⁶და თქვა მეფემ: „ახიმელექ, სიკვდილით უნდა მოკვდე შენ, შენ და მამაშენის მთელი სახლი!“

¹⁷და უთხრა მეფემ მცველებს, მის წინაშე რომ იდგნენ: „წადით და დახოცეთ უფლის მღვდლები, რადგან დავითის მხარეს არიან, იცოდნენ, რომ გარბოდა და არ შემატყობინეს.“ მაგრამ არ უნდოდათ მეფის მსახურთ ხელი აღემართათ უფლის მღვდლების დასახოცად.

¹⁸და უთხრა მეფემ დოეგს: „შენ წადი და დახოცე მღვდლები.“ და წავიდა დოეგ ედომელი და დაესხა მღვდლებს და მოკლა იმ დღეს სელის ეფოდით შემოსილი 85 კაცი.

¹⁹და მახვილის პირით მოსრა ნობი, მღვდელთა ქალაქი; კაცი და ქალი, ყმაწვილები და ძუძუთა ბავშვები, აგრეთვე ხარი, სახედარი და ცხვარი გაჟლიტა მახვილის პირით.

²⁰და გადარჩა მხოლოდ ახიმელექის, ახიტუბის ძის, ერთი ძე, სახელად აბიათარი, და გაიქცა იგი დავითთან.

²¹და აუწყა აბიათარმა დავითს, რომ დახოცა საულმა უფლის მღვდლები.

²²და უთხრა დავითმა აბიათარს: „მივხვდი იმ დღეს, როცა დოეგ ედომელი იქ იყო, რომ უეჭველად ამბავს მიუტანდა საულს, ჩემზეა მამაშენის სახლის მთელი სისხლი.

²³ჩემთან დარჩი, ნუ გეშინია, ვინც ჩემს სიცოცხლეს ეძებს, ის შენს სიცოცხლესაც ეძებს. ჩემთან არაფერი გაგიჭირდება.“