Read ქართული ბიბლია, სრული ვერსია 1 Samuel 23 Bible Online

1 Samuel 23 - ქართული ბიბლია, სრული ვერსია bible

1 Samuel 23

¹და შეატყობინეს დავითს: ფილისტიმელები დაესხნენ კეყილას და კალოებს აჩანაგებენო.

²და დაეკითხა დავითი უფალს: „წავიდე და დავესხა ფილისტიმელებს?“ და მიუგო უფალმა დავითს: „წადი და დაამარცხებ ფილისტიმელებს, და იხსნი კეყილას.“

³მაგრამ უთხრეს დავითს მასთან მყოფმა კაცებმა: „ჩვენ აქ, იუდაშიც შიშითა ვართ და კეყილაში როგორღა წავიდეთ ფილისტიმელთა ურდოს წინააღმდეგ?“

⁴და კვლავ დაეკითხა დავითი უფალს. და მიუგო მას უფალმა: „ადექი და ჩადი კეყილაში, რადგან ხელში უნდა ჩაგიგდო ფილისტიმელები.“

⁵და წავიდნენ დავითი და მისი კაცები კეყილას და შეებრძოლნენ ფილისტიმელებს; გამოირეკეს მათი საქონელი და სასტიკად დაამარცხეს ისინი. და იხსნა დავითმა კეყილას მკვიდრნი.

⁶როცა აბიათარი, ახიმელექის ძე, დავითთან გამოიქცა კეყილასაკენ, თან ეფოდი წამოიღო.

⁷და აცნობეს საულს, რომ კეყილაში იყო დავითი მისული. და თქვა საულმა: „ხელში ჩამიგდო იგი ღმერთმა, რადგან კარიბჭეებიან და ურდულებიან ქალაქში შესვლით თვითონვე გამოიმწყვდია თავი.“

⁸და საომრად შეჰყარა საულმა მთელი ხალხი, რათა ჩასულიყვნენ კეყილაში და ალყაში მოექციათ დავითი და მისი კაცები.

⁹და შეიტყო დავითმა, ავს რომ უპირებდა მას საული და უთხრა აბიათარ მღვდელს: „მოიტანე ეფოდი!“

¹⁰და თქვა დავითმა: „უფალო, ღმერთო ისრაელისა, ნამდვილად შეიტყო შენმა მსახურმა, რომ კეყილასაკენ მოდის საული, რათა ჩემს გამო გაანადგუროს ქალაქი;

¹¹თუ მიმცემენ მათ ხელს კეყილას მოქალაქენი? თუ ჩამოვა საული აქ, როგორც შეიტყო შენმა მსახურმა? უფალო, ღმერთო ისრაელისა, გაუცხადე შენს მსახურს.“ და მიუგო უფალმა: „ჩამოვა.“

¹²და თქვა დავითმა: „თუ გადაგვცემენო კეყილას მოქალაქენი მე და ჩემს კაცებს საულს?“ და თქვა უფალმა: „გადაგცემენ.“

¹³და აიყარნენ დავითი და მისი კაცები, ექვსასამდე რომ იყვნენ, და გავიდნენ კეყილადან, და იარეს, საითაც შეძლეს სიარული. ხოლო როცა ამცნეს საულს, რომ კეყილადან გაიქცაო დავითი, შეჩერების ნიშანი მისცა.

¹⁴დავითი უდაბნოს მიუვალ ადგილებს აფარებდა თავს და შემდეგ მთას — ზიფის უდაბნოში. და ეძებდა მას საული დღენიადაგ, მაგრამ უფალმა ხელში არ ჩაუგდო ის.

¹⁵და დაინახა დავითმა, რომ გამოვიდა საული მის მოსაკლავად, და დარჩა დავითი ზიფის უდაბნოში, ერთ ტყეში.

¹⁶და ადგა იონათანი, საულის ძე, და მივიდა დავითთან ტყეში, და გაამხნევა ღვთის სახელით,

¹⁷და უთხრა: „ნუ გეშინია, ვერ მოგწვდება მამაჩემის, საულის ხელი. შენ იმეფებ ისრაელზე, ხოლო მე შენს შემდეგ პირველი კაცი ვიქნები; მამაჩემმა, საულმა კარგად იცის ეს.“

¹⁸და შეკრეს კავშირი ორივემ უფლის წინაშე. დარჩა დავითი ტყეში და იონათანი შინ დაბრუნდა.

¹⁹და მივიდნენ ზიფელები საულთან გიბეყაში და უთხრეს: „ჩვენთან იმალება დავითი, მიუვალ ადგილებში, ტყეში, ხაქილას ბორცვზე, რომელიც იეშიმონის ხელმარცხნივაა.

²⁰ახლა შენი ნებაა, მეფეო, ჩამოხვალ თუ არა, ჩვენი ვალი კი ის არის, რომ მეფეს ჩავუგდოთ იგი ხელში.“

²¹და თქვა საულმა: „უფალიმც გაკურთხებთ, რომ შემიბრალეთ!

²²წადით, ერთხელ კიდევ დაიბეჯითეთ და მიათვალიერ-მოათვალიერეთ ის ადგილები, სადაც კი ფეხი დაუდგამს, ან თუ ვინმეს უნახავს იქ, რადგან მითხრეს, რომ დიდი ცბიერი ვინმეა.

²³ეძებეთ და დაჩხრიკეთ ყველა სამალავი, სადაც კი შეიძლება იმალებოდეს, და მართალი პასუხი მომიტანეთ, და მე წამოგყვებით და თუ ამ ქვეყანაში არის სადმე, სათითაოდ იუდას ყველა სამთავროს ჩხრეკაც რომ დამჭირდეს, მაინც მოვძებნი.“

²⁴და ადგნენ და წავიდნენ საულზე ადრე ზიფში. ხოლო დავითი და მისი კაცები ამ დროს მაყონის უდაბნოში იყვნენ, ყარაბაში, იეშიმონის მარცხნივ.

²⁵და წავიდა საული საძებნელად თავისი კაცებითურთ. და შეატყობინეს დავითს, და მივიდა იგი კლდესთან და დადგა მაყონის უდაბნოში. და შეიტყო ეს საულმა და დაედევნა დავითს მაყონის უდაბნოსაკენ.

²⁶მიდიოდა საული მთის ერთ მხარეს, ხოლო დავითი თავისი კაცებითურთ მთის მეორე მხარეს. და გამალებით გაურბოდა დავითი საულს, ხოლო საული და მისი კაცები ცდილობდნენ გზა მოეჭრათ დავითისა და მისი კაცებისთვის და შეეპყროთ ისინი.

²⁷მაგრამ მაცნე მოვიდა საულთან და მოახსენა: „საჩქაროდ დაბრუნდი, რადგან ფილისტიმელები დაესხნენ ქვეყანას.“

²⁸მიანება თავი საულმა დავითის დევნას და გაემართა ფილისტიმელებთან შესახვედრად. ამიტომ უწოდეს იმ ადგილს სელაყ-ჰამახლეკოთი[8].