Read ქართული ბიბლია, სრული ვერსია 1 Samuel 24 Bible Online

1 Samuel 24 - ქართული ბიბლია, სრული ვერსია bible

1 Samuel 24

¹და აიყარა დავითი იქიდან და ყენ-გედის მიუვალ ადგილებში ჩაჯდა.

²როგორც კი დაბრუნდა საული ფილისტიმელთაგან, შეატყობინეს, ყენ-გედის უდაბნოშიაო დავითი.

³და აიყვანა საულმა ისრაელიანთაგან 3 ათასი რჩეული ვაჟკაცი და წავიდა დავითისა და მისი კაცების საძებრად სანიამორეს კლდეებში.

⁴და მივიდა ცხვრის ფარეხებთან, გზისპირას, სადაც მღვიმე იყო, და შევიდა შიგ საული მოსასაქმებლად, დავითი და მისი კაცები კი იქვე ისხდნენ მღვიმის სიღრმეში.

⁵და უთხრეს დავითს მისმა კაცებმა: „აჰა, ის დღეც, რომელზეც გითხრა უფალმა: აჰა, ხელთ მოგცემ შენს მტერს, რომ შენი ნებისამებრ მოექცეო.“ და წამოდგა დავითი და ფარულად მოაჭრა კიდე საულის მოსასხამს.

⁶მერე კი გული ეტკინა დავითს, რომ მოაჭრა კიდე საულის მოსასხამს.

⁷და უთხრა თავის ხალხს: „უფალმა მაშოროს, რომ ასეთი რამ გავაკეთო და ხელი აღვმართო ჩემს ბატონზე, უფლის ცხებულზე, რადგან უფლის ცხებულია იგი.“

⁸და ამ სიტყვებით შეაკავა თავისი კაცები დავითმა და ნება არ მისცა, თავს დასხმოდნენ საულს. ადგა და გამოვიდა საული მღვიმიდან და წავიდა თავისი გზით.

⁹და ადგა ამის შემდეგ დავითიც და გამოვიდა მღვიმიდან, და დაუძახა საულს და უთხრა: „მეფე-ბატონო!“ უკან მოიხედა საულმა. მიწად დაიხარა დავითი და თაყვანი სცა.

¹⁰და უთხრა დავითმა საულს: „რატომ უგდებ ყურს ხალხის სიტყვებს, რომლებიც გეუბნებიან: აჰა, ბოროტს გიმზადებსო დავითი?

¹¹ახლა ხომ შენი თვალით ხედავ, რომ დღეს შენი თავი მომცა უფალმა მღვიმეში, და კიდეც მეუბნებოდნენ, რომ მომეკალი, მაგრამ შეგიბრალე და ვთქვი: ხელს არ აღვმართავ ჩემს ბატონზე, რადგან უფლის ცხებულია-მეთქი იგი.

¹²აჰა, შეხედე ახლა, მამაჩემო, და ნახე შენი მოსასხამის კიდე, ხელში რომ მიჭირავს, შენი მოსასხამის კალთას რომ მოვაჭერი, შენ კი არ მოგკალი, ამით მიხვდი, რომ არ არის ჩემში ბოროტება და ვერაგობა. არც შემიცოდავს შენს წინაშე, შენ კი ჩემს სულს დაეძებ დასაღუპად.

¹³უფალი იყოს მსაჯული შენსა და ჩემს შორის. მე კი შენზე ხელს არ აღვმართავ.

¹⁴როგორც ძველი იგავი ამბობს: ‘ბოროტისგან ბოროტება გამოდის.’ მე კი შენზე ხელს არ აღვმართავ.

¹⁵ვის წინააღმდეგ გამოვიდა ისრაელის მეფე? ვის სდევნის? მხოლოდ ერთ მკვდარ ძაღლს, რაღაც რწყილს!

¹⁶უფალი იყოს მსაჯული და მან განგვსაჯოს მე და შენ. ის დაინახავს და განიკითხავს ჩემს სამართალს და მიხსნის შენი ხელიდან.“

¹⁷და როცა დაასრულა დავითმა ამ სიტყვების ლაპარაკი საულთან, თქვა საულმა: „ეს შენი ხმაა, დავით, ჩემო შვილო?“ — ხმა აღიმაღლა საულმა და ატირდა.

¹⁸და უთხრა დავითს: „მართალი ხარ ჩემთან, რადგან შენ სიკეთით მიხდიდი, მე კი ბოროტებით მოგაგებდი.

¹⁹და დღესაც გამოაჩინე, რომ კეთილად მექცევი, რადგან, როცა უფალმა ჩამაგდო შენს ხელში, არ მომკალი.

²⁰კაცი რომ თავის მტერს შეხვდება, განა მშვიდობის გზაზე გაუშვებს? უფალმა გადაგიხადოს სიკეთით იმის საზღაურად, რაც დღეს მიყავი.

²¹ახლა კი მჯერა, რომ მეფობით იმეფებ, და განმტკიცდება შენს ხელში ისრაელის სამეფო.

²²ახლა კი უფლის სახელით შემომფიცე, რომ ჩემს შემდეგ არ ამოძირკვავ ჩემს შთამომავლობას და არ გააქრობ ჩემს სახელს მამაჩემის სახლში.“

²³და შეჰფიცა დავითმა საულს. და წავიდა საული თავის სახლში. ხოლო დავითი და მისი კაცები მტკიცე კლდეებს შეეფარნენ.