Read ქართული ბიბლია, სრული ვერსია 1 Samuel 27 Bible Online

1 Samuel 27 - ქართული ბიბლია, სრული ვერსია bible

1 Samuel 27

¹და თქვა დავითმა გულში: „ერთ დღეს მაინც ჩამიგდებს საული ხელთ; თუკი სიკეთე არ მიწერია აქ, მაშინ სიცოცხლის დასახსნელად აჯობებს, ფილისტიმელთა ქვეყანას შევაფარო თავი, და საულიც აღარ დამიწყებს ძებნას, და მეც გადავურჩები მას.“

²და ადგა დავითი და 600 კაცითურთ გადავიდა აქიშთან, მაყოქის ძესთან, გათის მეფესთან.

³და დარჩა დავითი აქიშთან გათში თავისი კაცებითურთ: ისინი თავ-თავისი ოჯახებით, დავითი — მისი ორი ცოლით — იზრეყელელი ახინოყამით და ქარმელელი აბიგაილით, ნაბალის ქვრივით.

⁴და როცა შეატყობინეს საულს, გათში გაიქცაო დავითი, მეტად აღარ უძებნია იგი.

⁵და უთხრა დავითმა აქიშს: „თუ მადლი ვპოვე შენს თვალში, მომცენ ადგილი ქვეყნის რომელიმე ქალაქში, რომ ვიცხოვრო იქ. რატომ უნდა ცხოვრობდეს შენი მსახური შენს გვერდით, სამეფო ქალაქში?“

⁶და მისცა მაშინ აქიშმა ციკლაგი. ამიტომაც ეკუთვნის ციკლაგი დღემდე იუდას მეფეებს.

⁷ერთი წელი და ოთხი თვე დაჰყო დავითმა ფილისტიმელთა მხარეში.

⁸ამხედრდებოდნენ დავითი და მისი კაცები და არბევდნენ გეშურელებს, გირზელებს და ყამალეკელთ, რადგან ესენი სახლობდნენ ძველთაგანვე იმ ქვეყანაში, შურამდე და ეგვიპტემდეც კი.

⁹და აოხრებდა დავითი მთელს იმ ქვეყანას, ცოცხალს არ ტოვებდა არც კაცს და არც ქალს; მოერეკებოდა ცხვარსა და ძროხას, ჯორ-აქლემებს, მოჰქონდა სამოსელი; და ბრუნდებოდა აქიშთან.

¹⁰და ეტყოდა აქიში: „სად არბევდით დღეს?“ მიუგებდა დავითი: იუდას სამხრეთითო, — ან: იერახმეელელთა სამხრეთითო, — ან: კენიელთა სამხრეთითო.

¹¹არც კაცს და არც ქალს ცოცხალს არ ტოვებდა დავითი და გათში არ მოჰყავდა, რადგან ფიქრობდა: „არ ილაპარაკონ ჩვენზე: ასე იქცეოდა დავითი და ეს ჰქონდა წესად, როცა ფილისტიმელთა მხარეში ცხოვრობდაო.“

¹²მიენდო აქიში დავითს და ფიქრობდა: თავი შეაძულა თავის ერს, ისრაელს, და სამუდამო მსახურად გამიხდებაო.