Read ქართული ბიბლია, სრული ვერსია 1 Samuel 29 Bible Online

1 Samuel 29 - ქართული ბიბლია, სრული ვერსია bible

1 Samuel 29

¹და შეჰყარეს ფილისტიმელებმა მთელი თავიანთი ლაშქარი აფეკში, ხოლო ისრაელმა იზრეყელის წყაროსთან დაიბანაკა.

²ფილისტიმელთა მთავრები თავ-თავიანთი ასეულებითა და ათასეულებითურთ მოდოდნენ. დავითი და მისი ხალხი კი უკან მიჰყვებოდა აქიშს.

³და თქვეს ფილისტიმელთა მთავრებმა: „აქ რა უნდათ ამ ებრაელებს?“ და უთხრა აქიშმა ფილისტიმელ მთავრებს: „ეს ხომ დავითია, ისრაელის მეფის, საულის მსახური. წელიწადზე მეტია, რაც ჩემთან არის და ცუდი არაფერი შემინიშნავს მისთვის მისი გამოქცევის დღიდან დღემდე.“

⁴და ბრაზობდნენ მასზე ფილისტიმელი მთავრები, და უთხრეს: „უკანვე გაისტუმრე ეგ კაცი. დაბრუნდეს თავის ადგილას, სადაც გაგიწესებია. ნუ წამოგყვება ბრძოლაში, რომ ბრძოლის დროს მტრად არ გვექცეს. რითი მოიგებს თავისი ბატონის გულს, თუ არა ჩვენი კაცების თავებით?

⁵ეს ხომ ის დავითია, რომელსაც ცეკვით გამოსული ქალები უმღეროდნენ: მოსრა საულმა ათასები, დავითმა კი 10 ათასებიო?“

⁶და მოუხმო აქიშმა დავითს და უთხრა: „უფალს ვფიცავ, პატიოსანი კაცი ხარ და მახარებს შენი შესვლა და გამოსვლა ჩემს ბანაკში, რადგან ვერავითარი ბოროტება ვერ აღმოვაჩინე შენში ჩემთან შენი მოსვლის დღიდან, მაგრამ მთავრებს არ მოუხველ თვალში.

⁷და ახლა მშვიდობით გაბრუნდი უკან და ისეთი არაფერი გააკეთო, რაც ფილისტიმელთა მთავრებს თვალში არ მოუვათ.“

⁸და უთხრა დავითმა აქიშს: „რა გავაკეთე, ან რა შენიშნე ისეთი შენს მსახურს დღიდან შენთან მოსვლისა, რომ არ წავიდე და არ ვიბრძოლო ჩემი მეფე-ბატონის მტრებთან?“

⁹მიუგო აქიშმა და უთხრა დავითს: „ვიცი, რომ კარგი ხარ. ღვთის ანგელოზივით ხარ ჩემს თვალში, მაგრამ ფილისტიმელი მთავრები ამბობენ: ნუ წამოგვყვებაო ბრძოლაში.

¹⁰და ახლა ადექით დილაადრიანად შენ და შენი ბატონის მსახურნი, შენ რომ თან მოგყვნენ, ადექით ადრიანად და, როცა ალიონი დაიძვრება, უკან გაბრუნდით.“

¹¹და ადგნენ დავითი და მისი კაცები, რათა წასულიყვნენ დილით და გაბრუნებულიყვნენ ფილისტიმელთა ქვეყანაში, ხოლო ფილისტიმელები იზრეყელისაკენ წავიდნენ.