Read ქართული ბიბლია, სრული ვერსია 1 Samuel 30 Bible Online

1 Samuel 30 - ქართული ბიბლია, სრული ვერსია bible

1 Samuel 30

¹სანამ მესამე დღეს დავითი და მისი კაცები ციკლაგში მივიდოდნენ, ყამალეკნი ნეგებიდან დაესხნენ ციკლაგს, გაანადგურეს და გადაწვეს.

²და იქ მყოფი ქალები კი, დიდიან-პატარიანად, ტყვედ წაასხეს, არავინ მოუკლავთ, და წავიდნენ თავიანთი გზით.

³და მივიდნენ დავითი და მისი კაცები ქალაქში და ხედავენ: გადამწვარია ქალაქი, დედა-წული ტყვედ წაუსხამთ.

⁴და ხმა აღიმაღლეს დავითმა და მისმა ხალხმა და ტიროდნენ, ვიდრე ძალი შესწევდათ.

⁵ტყვედ იყო წაყვანილი დავითის ორივე ცოლიც: იზრეყელელი ახინოყამი და ქარმელელი ნაბალის ქვრივი აბიგაილი.

⁶და ძლიერ შეშფოთებული იყო დავითი, რადგან მისი ჩაქოლვა გადაეწყვიტა ხალხს. გამწარებული იყო ხალხი თავიანთი ვაჟებისა და ასულების გამო. მაგრამ უფლით, თავისი ღმერთით გაიმხნევა დავითმა თავი.

⁷და უთხრა დავითმა აბიათარ მღვდელს, ახიმელექის ძეს: „მომიტანე ეფოდი!“ და მიუტანა აბიათარმა ეფოდი დავითს.

⁸და დაეკითხა დავითი უფალს და უთხრა: „დავედევნო იმ ურდოს? მივეწევი?“ და მოხსენდა: „დაედევნე, დაეწევი და წაართმევ.“

⁹და წავიდა დავითი 600 კაცით და მიადგა ბესორის ნაღვარევს. დაღლილები იქვე, ადგილზე დარჩნენ.

¹⁰დავითი დაედევნა 400 კაცითურთ. დარჩა 200 კაცი, რომელთაც დაღლილობის გამო ვერ შეძლეს ბესორის ნაღვარევის გადალახვა.

¹¹იპოვეს მინდორში ერთი ეგვიპტელი კაცი და მიიყვანეს დავითთან, და მისცეს პური და შეჭამა, და წყალიც დაალევინეს.

¹²და მისცეს ლეღვის ჩირი და ორი მტევანი ჩამიჩი. შეჭამა კაცმა და მოსულიერდა, რადგან სამი დღე და ღამე უჭმელ-უსმელი იყო.

¹³და უთხრა მას დავითმა: „ვისი ხარ და სადაური?“ თქვა: „ეგვიპტელი ყრმა ვარ, ერთი ყამალეკელის მსახური. მიმატოვა ჩემმა ბატონმა, რადგან მესამე დღეა, ავადა ვარ.

¹⁴ჩვენ დავარბიეთ ქერეთის სამხრეთი, იუდას მხარე, ქალების სამხრეთი, ციკლაგი კი ცეცხლით გადავწვით.“

¹⁵და უთხრა დავითმა: „ჩამიყვან იმ ურდომდე?“ თქვა ეგვიპტელმა: „ღმერთი შემომფიცე, რომ არ მომკლავ და ჩემს ბატონს არ გადამცემ, და ჩაგიყვან იმ ურდომდე.“

¹⁶და ჩაიყვანა. და აჰა, ყამალეკელთ მოუცავთ მთელი ის მხარე, ჭამენ, სვამენ და ზეიმობენ ფილისტიმელთა ქვეყნიდან და იუდადან წამოღებული დიდი ნადავლის გამო.

¹⁷და ჟლეტდა მათ დავითი გარიჟრაჟიდან მეორე დღის საღამომდე. არავინ გადარჩენილა 400 ჭაბუკის გარდა, რომლებიც მოახტნენ აქლემებს და გაქუსლეს.

¹⁸უკან წაართვა დავითმა ყამალეკელთ ყველაფერი, რაც წაღებული ჰქონდათ; თავისი ორი ცოლიც დაიბრუნა.

¹⁹და არაფერი დაჰკარგვიათ — არც მცირე, არც დიდი; არც ვაჟებიდან და არც ასულებიდან; არც ნადავლიდან, რაც გატაცებული ჰქონდათ ყამალეკელთ; ყველაფერი დაიბრუნა დავითმა.

²⁰და წამოასხა დავითმა მთელი მათი ცხვარ-ძროხა; მოერეკებოდნენ ამ საქონელს თავიანთი პირუტყვის წინ და ამბობდნენ: დავითის ნადავლიაო ეს!

²¹და მივიდა დავითი იმ ორას კაცთან, რომელთაც ვერ შეძლეს დავითს გაჰყოლოდნენ და ბესორის ნაღვარევთან რომ დატოვა მან. და გამოვიდნენ ისინი დავითისა და მასთან მყოფი ხალხის მისაგებებლად. მივიდა დავითი ამ ხალხთან და მოიკითხა.

²²ასე ამბობდა ზოგიერთი ბოროტი და უგვანი კაცი, დავითთან ერთად რომ იყო წასული: „რაკი არ წამოგვყვნენ, ნურაფერს გავუნაწილებთ იმ ნადავლიდან, ჩვენ რომ დავიბრუნეთ უკან, მხოლოდ თავიანთი ცოლ-შვილი წაასხან და წავიდნენ.“

²³და თქვა დავითმა: „ნუ იზამთ ამას, ძმებო, რადგან უფლის მოცემულია ეს ყველაფერი, მან დაგვიფარა, მან ჩაგვიგდო ხელში ეს ურდო, თავს რომ დაგვესხა.

²⁴ვინ დაგეთანხმებათ ამ საქმეზე? რადგან, რა წილიც ნაომარ კაცს უდევს, იგივე წილი უნდა ხვდეს აღალთან დარჩენილს, თანაბრად უნდა გაინაწილონ.“

²⁵ასე იყო იმ დღიდან და შემდგომაც. ასე დაადგინა დავითმა წესად და რჯულად ისრაელისათვის დღემდე.

²⁶და მივიდა დავითი ციკლაგში, და დააგზავნა ნადავლიდან წილი იუდას უხუცესებისთვის, თავისი მეგობრებისთვის და შეუთვალა: „აჰა, კურთხევა თქვენთვის უფლის მტრების ნადავლიდან.“

²⁷ასევე მათთვისაც, ვინც ბეთელში, ნეგების რამოთში და იათირში იყო;

²⁸ვინც ყაროყერში, სიფმოთში, ეშთემოაყში იყო;

²⁹ვინც რაქალში, ვინც იერახმეელელთა და კენიელთა ქალაქებში იყო;

³⁰ვინც ხორმაში, ბორ-ყაშანში, ყათაქში იყო;

³¹ვინც ხებრონში იყო — ყველა ადგილისთვის, სადაც კი დავითსა და მის კაცებს ევლოთ.