Read ქართული ბიბლია, სრული ვერსია 1 Samuel 9 Bible Online

1 Samuel 9 - ქართული ბიბლია, სრული ვერსია bible

1 Samuel 9

¹იყო ერთი კაცი ბენიამინის ტომიდან, სახელად კიში, ძე აბიელისა, ძისა ცერორისა, ძისა ბექორათისა, ძისა აფიახისა, ძისა ვინმე ბენიამინელისა — ძლიერი ვაჟკაცი.

²მას ჰყავდა მშვენიერი ვაჟი, სახელად საული. ისრაელიანთა შორის მასზე უკეთესი არავინ იყო. ერთი თავით მაღალი ჩანდა ხალხში.

³და დაეკარგა ჭაკი ვირები კიშის, საულის მამას, და უთხრა კიშიმ საულს, თავის ვაჟს: „წაიყვანე რომელიმე მსახური ბიჭი, წადი და მოძებნე ვირები.“

⁴და გადაიარა მან ეფრემის მთა, მოიარა შალიშას მხარე, მაგრამ ვირები ვერ იპოვეს; მოიარეს შაყალიმის მხარე და არც იქ იყვნენ; მოიარა ბენიამინის მხარე და ვერ იპოვეს.

⁵როცა ისინი ცუფის მხარეში მივიდნენ, საულმა უთხრა მსახურ ბიჭს, თან რომ ახლდა: „მოდი, გავბრუნდეთ უკან. დაავიწყდებოდა მამაჩემს ვირები და ჩვენი დარდი ექნება.“

⁶ხოლო მან მიუგო: „აჰა, ღვთისკაცია ამ ქალაქში, პატივცემული კაცია; რასაც იტყვის, ყველაფერი მართლდება. წავიდეთ ახლა იქით, ეგებ გვასწავლოს, რა ვიღონოთ.“

⁷საულმა უთხრა მსახურს: „რომ წავიდეთ, რა მივუტანოთ იმ კაცს? გუდაში პური აღარ დაგვრჩა, არც საჩუქარი გვაქვს რამე, ღვთისკაცს რომ მივუტანოთ. რა გაგვაჩნია?“

⁸კვლავ მიუგო მსახურმა საულს: „აჰა, მეოთხედი შეკელი ვერცხლი მაქვს, მივცეთ ღვთისკაცს და გვასწავლის გზას.“

⁹(უწინ ისრაელში ასე ამბობდა კაცი, ღმერთთან საკითხავად რომ მიდიოდა: მოდი, წავიდეთ მისანთანო, რადგან ახლა რომ წინასწარმეტყველს ეძახიან, უწინ მისანს უხმობდნენ.)

¹⁰და უთხრა საულმა თავის მსახურს: „კარგი აზრია, წამოდი, წავიდეთ.“ და წავიდნენ ქალაქში, სადაც ღვთისკაცი იყო.

¹¹როდესაც ქალაქის აღმართი აიარეს, წყლის ამოსახაპად მომავალი ქალწულები შემოხვდნენ. ჰკითხეს: მისანი თუ არისო აქ სადმე?

¹²მიუგეს მათ: „აქვეა, ახლოში, ოღონდ იჩქარეთ, ახლახან ამოვიდა ქალაქში, რადგან დღეს მსხვერპლშეწირვა აქვს ხალხს გორაკზე.

¹³როგორც კი ქალაქში შეხვალთ, მაშინვე მოძებნეთ იგი, ვიდრე გორაკზე არ ასულა საჭმელად, რადგან ხალხი არაფერს შეჭამს მის მისვლამდე. მან უნდა აკურთხოს სამსხვერპლო, და მხოლოდ ამის შემდეგ დაიწყებენ ჭამას მოწვეულები. ახლა წადით, რადგან სწორედ მოასწრებთ მის ნახვას.“

¹⁴და როცა ავიდნენ ქალაქში, შიგ შესვლისას, აჰა, გორაკისაკენ მიმავალი სამუელი წამოვიდა მათ შესაგებებლად.

¹⁵საულის მოსვლამდე ერთი დღით ადრე გამოეცხადებინა უფალს სამუელისთვის:

¹⁶„ხვალ ამ დროს კაცს გამოგიგზავნი ბენიამინის მხრიდან და სცხებ მას ჩემი ერის, ისრაელის წინამძღოლად. იგი იხსნის ჩემს ერს ფილისტიმელთა ხელიდან, რადგან მოვხედე ჩემს ერს, როცა მისმა ღაღადისმა ჩემამდე მოაღწია.“

¹⁷როცა დაინახა სამუელმა საული, უთხრა უფალმა: „აჰა, ის კაცი, რომელზეც გელაპარაკე; ის უწინამძღვრებს ჩემ ერს.“

¹⁸შეხვდა ჭიშკართან საული სამუელს და უთხრა: „მითხარი, სად არის აქ მისნის სახლი?“

¹⁹მიუგო სამუელმა საულს და უთხრა: „მე ვარ მისანი. წამიძეხი გორაკისაკენ, რადგან დღეს ჩემთან ერთად უნდა ჭამო პური; დილით კი გაგიშვებ, ყველაფერს გეტყვი, რაც გულში გაქვს.

²⁰ნუ გადარდებს ვირები, სამი დღის წინ რომ დაკარგე, რადგან ნაპოვნია ისინი. ვის ეკუთვნის ისრაელის მთელი საუნჯე, თუ არა შენ და მამაშენის მთელ სახლს?“

²¹მიუგო საულმა და უთხრა: „განა მე ბენიამინელი არა ვარ, ისრაელის უმცირესი ტომიდან და განა ჩემი საგვარეულო ერთი უმცირესთაგანი არაა ბენიამინის ტომის ყველა საგვარეულოს შორის? რისთვის მეუბნები ამას?“

²²და წაიყვანა სამუელმა საული და მისი მსახური და შეიყვანა დარბაზში და 30 წვეული კაცის თავში დასხა.

²³უთხრა სამუელმა მზარეულს: „გამოიტანე ის ნაჭერი, რომელიც მოგეცი და რომელზეც გითხარი, შენთვის გადაიდე-მეთქი.“

²⁴აიღო მზარეულმა მთელი ბეჭი, გამოიტანა და წინ დაუდო საულს. უთხრა სამუელმა: „ეს არის, რაც დარჩა; წინ დაიდე და ჭამე, რადგან სწორედ იმ დროს გადავინახე შენთვის, როცა ვთქვი, ხალხი უნდა მოვიწვიო-მეთქი.“ და პურობდა საული იმ დღეს სამუელთან ერთად.

²⁵და ჩამოვიდნენ ისინი გორაკიდან ქალაქში და ერდოზე ელაპარაკა საულს.

²⁶ადგნენ დილაადრიანად. და როცა ირიჟრაჟა, დაუძახა სამუელმა საულს ერდოზე და უთხრა: „ადექი, უნდა გაგისტუმრო.“ და ადგა საული და გარეთ გავიდნენ ორივენი — ის და სამუელი.

²⁷როცა ქალაქის ბოლოზე ჩადიოდნენ, სამუელმა უთხრა საულს: „უბრძანე, დაწინაურდეს მსახური, შენ კი მცირეხანს შეჩერდი, რომ გაუწყო, რაც ღმერთმა თქვა.“ და მსახურიც წავიდა წინ.