Read kalabari Псалмс 118 Bible Online

Псалмс 118 - kalabari bible

Псалмс 118

¹Деед Эзнә зааврар бәәсн цевр седклтә улс җирһлтә, кишгтә болна.

²Терүнә сурһалиг хадһлсн, Терүг зүркәрн хәәдг улс кишгтә.

³Тиим улс му юм һарһхш, Тедн Деед Эзнә седсәр бәәнә.

⁴Та Тана заавриг батар хадһлтха гиҗ заквт.

⁵О, кемр мини хаалһ Тана заавр күцәх үзг тал һарсн болхнь!

⁶Тиигхләг би Тана цуг зааврт оньган өгхдән ичшго биләв.

⁷Би Тана чик зарһиг дасч авн, Таниг цевр зүркнәсн магтнав.

⁸Би Тана заавр күцәнәв. Та намаг бичә хайтн.

⁹Баахн көвүн эврәннь җирһлән яһҗ цеврәр бәрхмби? Зуг Тана үгиг хадһлад бәәх кергтә.

¹⁰Би Таниг үнн седкләрн хәәҗәнәв. Тана зааврас хаҗих йовдл бичә нанд учратн.

¹¹Тана өмнәс килнц һарһдгоһар, Тана үгиг би зүркндән бәрәд йовнав.

¹²О, Деед Эзн, Та цаһан санатат! Та заавран нанд дасхтн.

¹³Тана өгсн цуг заавриг Би чееҗәр келҗ давтнав.

¹⁴Тана сурһаляс би Ик зөөр олсарн байрлнав.

¹⁵Тана зааврин тускар ухалнав, Тана бәәдлд оньган өгнәв.

¹⁶Тана заканд би байрлнав, Тана үгиг би басчахшв.

¹⁷Тана үгиг хадһлад йовдгар, Та нанд, Эврәннь зарцд, хәәрлтән күргтн.

¹⁸Тана закана өвәрц бәәдлинь үздгәр, Та мини нүдим сектн.

¹⁹Би һазр деер йовдсн күмб. Та нанас Бийиннь заавран бичә бултултн.

²⁰Тана зарһин седвәр намаг оньдинд авлна.

²¹Тана зааврас хаҗисн деегүр саната, харалла харһсн улсиг Та гемшәввт.

²²О, Деед Эзн, әмтнә харалас, му келнәс намаг сулдхтн. Юңгад гихлә, би Тана сурһаль хадһлҗанав.

²³Хаад негдәд, нанд хар санна. Би, Тана зарц, Тана закана тускар ухалҗанав.

²⁴Тана сурһаль нанд байр болҗана, Мини багш болҗана.

²⁵Би үкҗәнәв, Та намаг үгәрн әмдрүлтн.

²⁶Би Танд бийиннь җирһлин тускар келләв, Та намаг соңсвт. Та нанд закаһан дасхтн.

²⁷Та нанд заавриннь учр-утхинь медх арһ өгтн. Би Тана өвәрц йовдлын тускар ухалнав.

²⁸Би һундрхҗанав, Та үгәрн намаг батратн.

²⁹Та намаг худлас хольҗултн. Та нанд Эврәннь закаһан дасхтн.

³⁰Би итклин хаалһ шүүҗ авув, Би Тана зарһар һардвр кеҗәнәв.

³¹О, Деед Эзн, Би Тана сурһальд седклән тәвүв. Та намаг ичх учрла бичә харһултн.

³²Би Тана заавр күцәхәр адһҗанав, Та нанд икәр уха орулҗанат.

³³О, Деед Эзн, Тана закад медх арһ нанд өгтн, Тегәд би терүгәр оньдинд һардвр кесв.

³⁴Та нанд серглң бәәдл өгтн, Тана закаһар би һардвр кенәв, Терүг би зүркндән хадһлнав.

³⁵Та намаг Эврәннь зааврин хаалһд орултн, Юңгад гихлә, би терүнд йир байрлҗанав.

³⁶Та мини зүркнд ик зөөр биш, Тана сурһалиг медҗ авх арһ өгтн.

³⁷Керг уга юм үздгоһар, Та мини нүдиг хаатн. Эврәннь үгәр намаг әмдрүлтн.

³⁸Таниг соңсдг нанд, Тана зарцд, өгсн үгән күцәтн.

³⁹Мини әәҗәх баслһнас намаг сулдхтн, Тана зарһ сән.

⁴⁰Тана сурһмҗ би авхар седҗәнәв. Та намаг чик седкләрн әмдрүлтн.

⁴¹О, Деед Эзн, Тана итклтә дурн нанд иртхә, Тана өгсн үгәр Тана аврлт иртхә.

⁴²Намаг басчах күүнд Тегәд би хәрүһинь өгхв. Би Тана үгд нәәлҗәнәв.

⁴³Та нанас чик үг бичә булаҗ автн, Би Тана зарһд нәәлҗәнәв.

⁴⁴Би Тана закаг оньдинд хадһлхв, Зууһад җилмүд һатлад хадһлхв.

⁴⁵Би сулдан бәәхв, юңгад гихлә, Би Тана заавр күцәхәр шуннав.

⁴⁶Би хаадудын өмн Тана сурһалин тускар ичлго келхв.

⁴⁷Би Тана зааврт дуртав, Тегәд йир байрлнав.

⁴⁸Тана заавриг би күндлнәв, Терүнд би дуртав. Тана закана тускар ухалнав.

⁴⁹Тана зарцд, нанд, Өгсн үгиннь тускар тодлтн, Терүнд нәәлх арһ Та нанд өгләт.

⁵⁰Энтн зовлңта цагинм байсвр, Тана өгсн үгәс әмдрлһн ирҗәнә.

⁵¹Деегүр саната улс намаг дөөглцхәв. Болв би Тана заканас хаҗисн угав.

⁵²О, Деед Эзн, Тана кезәңк зарһин тускар ухалад, Би тогтун бәәнәв.

⁵³Тана закаһар эс бәәҗәх килнцтә улс үзхлә, Мини ур күрнә.

⁵⁴Мини йовсн һазрт Тана закан Мини дун болад йовна.

⁵⁵О, Деед Эзн, сөөд Би Тана нериг тодлнав, О, Деед Эзн, Би Тана закаһар бәәнәв.

⁵⁶Би Тана зааврар бәәнәв, Энтн мини кишг болв.

⁵⁷О, Деед Эзн, Та мини зөөр болҗанат. Тана үгиг күцәх болҗ андһаран өгчәнәв.

⁵⁸Би Таниг үнн зүркнәсн сурҗанав: Бийиннь үгәрн нанд хәәрлтән күргтн.

⁵⁹Би хаалһиннь тускар ухаллав, Би Тана сурһальд оньган өгүв.

⁶⁰Тана зааврар һардвр кехәр би адһҗанав.

⁶¹Хар саната әмтнә гөлм намаг бүслҗәнә, Болв би Тана закана тускар мартҗахшв.

⁶²Би сөөни өрәллә босад, Таниг чик зарһ кедгдтн магтнав.

⁶³Би Танас әәдг цуг улсин, Тана заавр хардг улсин иньгв.

⁶⁴О, Деед Эзн, Тана итклтә дурн һазрар дүүрң. Та нанд Эврәннь закаһан дасхтн.

⁶⁵О, Деед Эзн, Та өгсн үгәрн нанла, Эврәннь зарцтаһан, Бийән сәәнәр бәрнәт.

⁶⁶Та нанд цецн болхиг, медрлтә болхиг дасхтн. Тана зааврт би иткҗәнәв.

⁶⁷Таниг засглхас өмн би төөрчәҗв, Ода би Тана үгиг хадһлдг болув.

⁶⁸Та сәнт, Тана күцәсн тоот сән. Та нанд Эврәннь закаһан дасхтн.

⁶⁹Деегүр саната улс мини тускар худл келнә. Болв би Тана заавриг зүркндән хадһлхв.

⁷⁰Теднә зүркн өөкәр бәрәтә. Би болхла, Тана закаһар бахмҗан кеҗәнәв.

⁷¹Тана зака медхин төлә Зовснь — нанд сән болв.

⁷²Тана өгсн закан Нанд миңһн алтнас, цаһан мөңгнәс деер.

⁷³Та намаг үүдәввт, Та намаг кү кеввт. Тана заавриг дасх уха нанд орултн.

⁷⁴Танас әәҗәх улс намаг үзхләрн байрлх, Тана үгд би нәәлҗәнәв.

⁷⁵О, Деед Эзн, Тана зарһ үннинь би меднәв, Та итклтә болад намаг засглвт.

⁷⁶Тана итклтә дурн, Тана келсәр, нанд, Тана зарцд, мини төвкнлһн болтха.

⁷⁷Тана цаһан санан нанд күрттхә, Тегәд би әмд йовхв. Юңгад гихлә, Тана закан нанд бахмҗ болҗана.

⁷⁸Нанд худларн му кеҗәх деегүр саната улс ичәгдтхә. Болв би Тана зааврин тускар ухалҗанав.

⁷⁹Танас әәдг, Тана заавр меддг улс хәрү нанур иртхә.

⁸⁰Би ичдгоһар зүркәрн Тана заканд соңсхврта болсв.

⁸¹Тана аврлтыг би йир күләҗәнәв, Тана үгд би нәәлҗәнәв.

⁸²Тана үг күләһә бәәҗ мини нүдн муурчана. — Та кезә намаг тогтнулхвт? — гиҗ сурҗанав.

⁸³Би утанд үрсн бортх мет керг уга болув. Болв Тана закаг мартсн угав.

⁸⁴Тана зарц, би, ода кедүдән күләхв? Та мини хортна зарһинь кезә кехмт?

⁸⁵Деегүр саната улс Намаг бәрхәр нүк малтв, Тедн Тана закаһар бәәҗәхш.

⁸⁶Тана цуг заавр итклтә. Мини хортн мини тускар хов зөөнә. Та нанд дөңгән күргтн.

⁸⁷Тедн намаг алн алдв, Болв би Тана заавриг үлдәсн угав.

⁸⁸Та итклтә дурарн намаг әмдрүлтн, Тегәд би Тана өгсн сурһалиг хадһлхв.

⁸⁹О, Деед Эзн, Тана үг мөңкинд теңгрт батлгдв.

⁹⁰Тана иткмҗ үйәс үй һатлх. Та һазр үүдәввт. Тер ода бәәнә.

⁹¹Тана шиидврәр цугнь ода күртл бәәнә, Юңгад гихлә, цугтан Танд церглҗәнә.

⁹²Кемр Тана закан бахмҗм эс болсн болхла, Би эврәннь зовлңдан даргдад үкх биләв.

⁹³Тана заавриг мөңкинд мартшгов, Терүгәрн Та намаг әмдрүлҗәнәт.

⁹⁴Би Тана күмб, авртн намаг! Би Тана келсиг күцәхәр шуннав.

⁹⁵Хар саната әмтн намаг алхар гетцхәнә. Би болхла, Тана сурһалин тускар ухалнав.

⁹⁶Юн болв чигн эврә чилгчтә, Болв Тана заавр чилгч уга.

⁹⁷Тана заканд би йир дуртав! Терүнә тускар би өдрин дуусн ухалнав.

⁹⁸Та Эврәннь зааврарн намаг хортнасм цецн кеввт. Юңгад гихлә, тертн кезә чигн нанла бәәнә.

⁹⁹Би цуг багшнрасн ухата болув, Би Тана сурһалин тускар ухалҗанав.

¹⁰⁰Би медәтнрәс икәр меднәв, Юңгад гихлә, би Тана үг хадһлҗанав.

¹⁰¹Тана үг хадһлхин төлә, Би хар мөртә хаалһас көлән әрвлнәв.

¹⁰²Тана зарһиг би һазалҗахшв, Юңгад гихлә, Та намаг дасххт.

¹⁰³Тана үг мини амнд ямаран әмтәхн! Балас деер келндм әмтәхн.

¹⁰⁴Тана келсиг би медҗәнәв, Тегәд худл бәәдлд би дургов.

¹⁰⁵Тана үг — мини көлд герлин гегән болна, Тана үг — мини йовсн мөрд герл өгнә.

¹⁰⁶Тана чик зарһиг хадһлх болҗ андһар өгләв, Терүгән би күцәхв.

¹⁰⁷О, Деед Эзн, би дегд зовҗанав. Та намаг Бийиннь үгәрн әмдрүлтн.

¹⁰⁸О, Деед Эзн, мини сән дурна зальврлһ автн, Та нанд Бийиннь зарһ дасхтн.

¹⁰⁹Мини җирһл оньдинд әәмшгтә, Болв Тана закаг би мартхшив.

¹¹⁰Хар саната улс нанд гөлм татв, Болв би Тана зааврас хаҗиҗахшв.

¹¹¹Тана сурһаль нанд мөңкинд үлдсн зөөр. Юңгад гихлә, тер зүркнәнм байр болҗана.

¹¹²Тана закаг би мөңкинд, Сүл әмсхл күртлән күцәхәр шиидүв.

¹¹³Хар саната күүнд дургов, Тана заканд дуртав.

¹¹⁴Та мини түшг, Та мини халхц. Тана үгд нәәлҗәнәв.

¹¹⁵Килнцтә улс, бийәсм холд йовтн, Бурхнаннь заавр би хадһлхар бәәнәв.

¹¹⁶Та Бийиннь үгәрн намаг батратн. Тегәд би җирһхв. Та мини нәәлвринм урмд бичә хәрүлтн.

¹¹⁷Та намаг дөңнтн, би авргдхв. Тана закаг би даңгинд соңсхв.

¹¹⁸Тана заканас хаҗисн улсиг Та бурушатн, юңгад гихлә, Теднә мек, худлнь — ки болҗана.

¹¹⁹Та килнцтә әмтиг бог мет хамҗ хайнат. Тегәд Тана сурһальд би дуртав.

¹²⁰Танас әәхлә — толһанм үсн босх дүңгә болна, Тана зарһас би бас әәнәв.

¹²¹Би чик, зөвтә юм кевв. Та намаг хортндм бичә бәрүлтн.

¹²²Та нанд, Бийиннь зарцд, сән болдгар дөңгән күргтн. Деегүр саната әмтнд намаг басх зөв бичә өгтн.

¹²³Тана аврлт күләһәд бәәҗ, Тана зөвтә үг күләһәд бәәҗ нүдм муурчана.

¹²⁴Та намаг, Бийиннь зарциг, бат дурарн хәләтн. Та намаг Эврәннь зака меддг дасхтн.

¹²⁵Би Тана зарцв. Та нанд уха орултн, Тана сурһаль медҗәнәв.

¹²⁶О, Деед Эзн, көдлх цаг ирв. Тана закан эвдгдв.

¹²⁷Тана зааврт би үнәр алтнас давуһар дуртав, Нам хамгин цевр алтнас дуртав.

¹²⁸Тана келсн үгиг зөвтә гиҗ би тоолҗанав. Тегәд ямаран чигн худлд дургов.

¹²⁹Тана сурһаль өврмҗтә. Тегәд би терүг седклдән хадһлҗанав.

¹³⁰Тана сурһалин үгмүд әмтнд серл орулҗана, Тер эгл улст уха орулҗана.

¹³¹Би седкләрн аман секәд әмсхнәв, Тедү дүңгә Тана заавр күләҗәнәв.

¹³²Та дурта улстан оньган өгчәх мет, нанд оньган өгтн, цаһан санаһан күртәтн.

¹³³Эврәннь үгд намаг батлтн, Ямаран чигн килнц намаг бичә авлтха.

¹³⁴Та намаг күүнә даҗрлтас сулдхтн, Тана келсиг би күцәнәв.

¹³⁵Та намаг, Эврәннь зарцан, цаһан седкләсн хәләтн. Та нанд Эврәннь зака дасхтн.

¹³⁶Тана закаг әмтн эс хадһлснас көлтә, Нүднәсм нульмсн һооҗҗана.

¹³⁷О, Деед Эзн, Та чик седклтәт, Тана зарһ мел зөвтә.

¹³⁸Тана өгсн сурһаль чик, мел итклтә.

¹³⁹Тана үгиг мини хортн һазалсар, уурм күрчәнә.

¹⁴⁰Тана үг дегд цевр, Тегәд би, Тана зарц, терүнд дуртав.

¹⁴¹Би ям уга болсар нанд дурго болна. Болв Тана келсиг би мартхшв.

¹⁴²Тана чик седкл — мөңк чик седкл, Тана закан — үнн закан болҗана.

¹⁴³Нанд һундлта, һашута бәәдл учрна. Тана заавр нанд байр болҗана.

¹⁴⁴Тана сурһаль мөңкинд чик. Та нанд уха орултн, Тегәд би җирһхв.

¹⁴⁵— О, Деед Эзн, Тана закаг би хадһлнав, Та намаг соңстн, — гиҗ Таниг зүркәрн дуудҗанав.

¹⁴⁶— О, Деед Эзн, Тана закаг би хадһлнав, намаг авртн, — гиҗ дуудҗанав.

¹⁴⁷Өр цәәтл босад, би Таниг дууднав. Тана үгд нәәлҗәнәв.

¹⁴⁸Тана үгин тускар ухалхларн, Би сөөни дуусн унтхшв.

¹⁴⁹О, Деед Эзн, Та итклтә дурарн Мини ду соңстн. Бийиннь зарһарн намаг әмдрүлтн.

¹⁵⁰Намаг даҗрхар седдг әмтн өөрдҗәнә. Тедн Тана заканас хол бәәцхәнә.

¹⁵¹О, Деед Эзн, Та өөрхн бәәнәт, Тана зааврмуд цугтан үнн.

¹⁵²Тана сурһалин тускар би кезәнә медләв. Терүг Та мөңкинд шиидҗт.

¹⁵³Та мини түрү бәәдл хәләтн, намаг авртн. Тана закаг би басчахшв.

¹⁵⁴Та мини кергт орлцад, намаг харстн. Та Бийиннь үгәрн намаг әмдрүлтн.

¹⁵⁵Килнцтә улсас аврлт холд бәәнә, Тедн Тана закаг хәәҗәхш.

¹⁵⁶О, Деед Эзн, Тана цаһан санан ик. Та Бийиннь зарһарн намаг әмдрүлтн.

¹⁵⁷Намаг көөдгнь, дәәлдгнь олн. Болв Тана сурһаляс би хольҗҗахшв.

¹⁵⁸Би урвачнриг үзҗәнәв, Теднд дурго болҗанав. Тедн Тана үг хадһлҗахш.

¹⁵⁹Тана закрмҗд би ямаран дуртаһинь хәләтн. О, Деед Эзн, бат дурарн намаг әмдрүлтн.

¹⁶⁰Тана үгин утхнь — үнн болҗана. Тана цуг чик зарһ — мөңк.

¹⁶¹Нойдуд намаг учр угаһар көөнә. Болв мини зүркн Тана үгиг күндлнә.

¹⁶²Тана үгд би байрлнав, Тиигхләрн икл зөөр авсн болнав.

¹⁶³Би худлд йир дургов. Болв Тана заканд би дуртав.

¹⁶⁴Таниг зарһан чикәр кедгт, Би өдрт дола дәкҗ Таниг магтнав.

¹⁶⁵Тана заканд дурта улсин эвнь йир ик. Теднд харшлт уга.

¹⁶⁶О, Деед Эзн, Тана аврлтд нәәлҗәнәв. Тана заавриг би күцәнәв.

¹⁶⁷Тана сурһалиг би хадһлҗанав, Терүнд би йир икәр дуртав.

¹⁶⁸Тана закрмҗиг, Тана сурһалиг би хадһлҗанав. Та мини кесиг цугинь үзҗәнәт.

¹⁶⁹О, Деед Эзн, мини зальврлһ соңстн. Та Эврәннь үгәрн нанд уха орултн.

¹⁷⁰Та мини зальврлһ соңстн. Та үгәрн намаг сулдхтн.

¹⁷¹Мини амн Танд магтал өргх, Та нанд Эврәннь закаһан дасххт.

¹⁷²Мини келн Тана үг зәңглх, Тана зааврмуд цугтан чик.

¹⁷³Тана һар нанд дөң болтха, Би Тана закрмҗ йилһҗ авнав.

¹⁷⁴О, Деед Эзн, Тана аврлт йир икәр күләҗәнәв. Тана закан мини бахмҗ болҗана.

¹⁷⁵О, Деед Эзн, Таниг магтдгар, Нанд менд йовх җирһл өгтн. Тана зарһ нанд дөң болтха.

¹⁷⁶Би геедрсн хөөнлә әдл төөрүв, Намаг, Эврәннь зарцан, хәәтн. Тана заавриг би мартҗахшв.