Read kalabari Псалмс 79 Bible Online

Псалмс 79 - kalabari bible

Псалмс 79

¹Көгҗмин һардачд. Асафин псалм. «Лилия» гидг дууна айс. Герәсн. [1-2] Израилин улсин Хөөч, соңстн! Керубиман деер суудгнь, Йосипин хөөт үйнриг хөд мет дахулҗ йовхнь Бийән үзүлтхә.

³Эпримин, Бенямина болн Манашен хөөт үйнрин өмн Та Эврәннь чидлән үзүлтн, Та ирәд мадниг авртн.

⁴О, Бурхн, мадниг босхҗ тохратн. Та цаһан санаһан күртәтн, Та мадниг авртн!

⁵О, Деед Эзн, Хамгин Күчтә Бурхн, Кедү цагтан Та Эврәннь улсин зальврлһнд уурлнат?

⁶Та тедниг зовлңта хотар цадхаввт, Та теднд дала нульмс уулһулвт.

⁷Та маднар хоша бәәх әмтнә керүл кеввт, Мана хортн мадниг басчана.

⁸Хамгин Күчтә Бурхн, мадниг босхҗ тохратн! Та цаһан санаһан күртәтн, Та мадниг авртн!

⁹Та Египетәс Эврәннь улсан уста үзмин иш мет авч ирләт, Та Канана бәәрн улсиг көөһәд, Тенд тер уста үзмин иш тәрләт.

¹⁰Та терүнә төлә һазр цеврлвт. Уста үзмин уңгнь батрад, һазр бүркв.

¹¹Уулмуд терүнә сүүдрәр бүркгдв, Терүнә ацмуднь хошун моднас икәр өсв.

¹²Терүнә ацмуд теңгст күрв, Епрат һолд күрв.

¹³Та, Деед Эзн, юуна төлә Терүнә хашаһинь хамхлвт? Хаалһар йовсн болһнь терүнәс таслна.

¹⁴Ө-шуһу модна зерлг һахас терүг хадрна, Зерлг аңгуд терүнәс идцхәнә.

¹⁵Хамгин Күчтә Бурхн! Теңгрәс оньган өгтн, хәләтн, темдглтн, Та тер уста үзмд килмҗән тусхатн.

¹⁶Тәрсн ишән, өскәд батрасн урһцан Та хәләтн.

¹⁷Тертн һалд шатла, Тертн хортнд цокулгдла. Тана уурас хортн алгдтха.

¹⁸Та шүүҗ авсн залу күүһән харстн, Та Эврәннь төлә батрасн күүһән харстн.

¹⁹Бидн Танас хольҗсн угавидн. Та мадниг әмдрүлтн. Тегәд бидн Тана нер дуудхвидн.

²⁰О, Деед Эзн, Хамгин Күчтә Бурхн! Та мадниг босхҗ тохратн! Та цаһан санаһан күртәтн, Та мадниг авртн!