Read kalabari Күндтә умшачнр! 11 Bible Online

Күндтә умшачнр! 11 - kalabari bible

Күндтә умшачнр! 11

¹Зәрм улс әмт меклхәр төв биш чиңнүртә, Деед Эзн терүнд дурго. Деед Эзнд чик чиңнүр таасгдна.

²Деерлкхлә, ичртә болдмн, төвшүн күн цецн болдмн.

³Үннч күн үннәрн һардвр кенә, мектә күн мекәрн бийән эвднә.

⁴Деед Эзнә зарһ болхла, мөңгн дөң болшго, болв буйнта керг күцәснь үкләс гетлгднә.

⁵Үнн бәәдл болн цаһан санан һо хаалһд һарһна, хар саната күн болхла, хорта йовдласн хоосрна.

⁶Үнн йовдл чик саната әмтиг аврна, мектә күн му седкләрн бәргднә.

⁷Хар санатала хамдан нәәлврнь үкх. Терүнә нәәлврнь юмн биш, хамдан билрнә.

⁸Үннч күн зовлңгас авргдх, терүнә ормд му седклтәнь бәргдх.

⁹Бурхнд иткдго күн келәрн өөрхн әмтндән хоран күргнә, болв цаһан санатаг мергнь харна.

¹⁰Цаһан саната күүнә күцәмҗәр балһсн кевтән байрлна, хар саната күн алгдхла, цугтан нәәрлнә.

¹¹үннч күүнә йөрәләс балһсн цецгәрнә, хар саната күүнә үг балһс чигн хамхлна.

¹²Өөрхн бәәх улсан ховлдгнь — һәргтә күн, ухата күн тагчг бәәнә.

¹³Ховчнр күүнә нуувч илдкнә, итклтә күн нуувчан хадһлна.

¹⁴Сурһмҗлач уга болхла, келн-әмтн дор орна. Кемр олн сөөвңгүдтә болхла, келн-әмтн авргдна.

¹⁵Күүнә ял даахар седснь бийдән зовлң немҗәнә. Кемр терүнд эс орлцхла, бийән зовлңгас гетлх.

¹⁶Номһн гергн күндтә болдг, шунмһа залу байн болдг.

¹⁷Талдан әмтнд өр-өвч күн бийдән туслна, хату седклтә күн бийән барна.

¹⁸Хорта күүнә ачлврнь худл болна, үннч күүнә ачлвр йосн болна.

¹⁹Үнн юмн җирһл өгнә, хар санхар седсн күн, үклдән күрх.

²⁰Хорта седклтә әмтнд Деед Эзн дурго, болв цевр седклтә әмтнд байрлна.

²¹Хорта йовдл һарһсн күн засглгдгх — итк нанд, үннч күүнә хөөт үрдүд авргдх.

²²Кемр күүкд күн сәәхн, болв муңхг болхла, тернь һахан хамрт алтн билцг зүүснлә әдл.

²³Сән күүнә седвәр сән тоотыг улм немнә, болв му күүнә седвәр зуг Бурхна цухл босхна.

²⁴Өгәнч күүнә өгснәснь, орунь улм икдх, болв дегд әрвлдг күн угарх.

²⁵Өгәнч күүнд ору орна, талын күүнд дөң болхла, улм икәр эврән авхч.

²⁶Буудяһан хулдлго бийдән бәрдг күүг әмтн харана, болв әмтиг цадххин төлә буудяһан хулддг күн Деед Эзнә әдс авна.

²⁷Тусан күргсн күн күндтә, хар сана хәәсн күүнд тернь бийднь тусх.

²⁸Зуг зөөртән нәәлҗәхнь үкдг, үннч улс ноһан мет көкрәд бәәх.

²⁹Өрк-бүлдән муульта бәәдл учрасн күн хоосрад бәәх, муңхг күн цецнә мухла болх.

³⁰Цаһан саната улсин күцәҗәх керг — җирһлин чимг, цецн күн әмтнә зүрк авлна.

³¹Үннч күн һазр деер кергәрн кемр ачлгдхла, хар саната улс һарһсн килнцәрн терүнәс даву засглгдх.