Read kalabari Күндтә умшачнр! 20 Bible Online

Күндтә умшачнр! 20 - kalabari bible

Күндтә умшачнр! 20

¹Чаһр дөөглнә, искәсн әрк догшн. Терүнәс ууһад көлврсн күүнд төрүц ухан оршго.

²Хаана һалзурлт — арслңгин оркрлһн, терүгинь көндәхлә, бийдән му кехч.

³Цүүгәнәс хол йовх күн тоомсрта, муңхг күн цүүгәнд хәәһәд орна.

⁴Хуурмг күн киитн цагт һазр хаһлхш, тиигхлә тәрә хадлһна цагт юм олҗ чадшго.

⁵Күүнә әрүн седвәр — гүн худгин усн мет, болв ухатань терүг татад гүүнәс авч чадх.

⁶Олн-әмтн эврәннь итклин тускар хәәкрнә, болв нәәлх дүңгә кү олҗ болхий?

⁷Үннч күн чиктән бәәнә, терүнә үйнр кишгтә.

⁸Хан зарһ кехәр суухла, терүнә нүүрт хорта йовдл тәәлгдх.

⁹«Мини зүркнд буру уга, би килнцәсн цеврлгдүв», — гиҗ кен келх?

¹⁰Чиңнүрдхләрн меклсн күн, кемҗәлхләрн меклсн күн — Деед Эзнд тер җигшүртә.

¹¹Баахн күн кергәрн медгднә, терүнә седвәр цевр-цеерий, үнний?

¹²Соңсхиг чигн, үзхиг чигн — Деед Эзн үүдәсмн.

¹³Унтхдан бичә дурл — һууль һуухич, нүдән бичә ань — цадхлң бәәхич.

¹⁴«Йир му юмн!» — гиҗ хулдҗ авх күн келнә, зуг хооран һарн хулдад авсан нер уга магтна.

¹⁵Делкәд алтн бәәнә, өңгтә чолун бәәнә, болв медҗ келсн терүнәс үнтә.

¹⁶Талдан күүнә төр хаһлхар орлцсн күн бәәсән бәрүлх, күүнә гергнә төлә бас тиим бәрүллһ кех.

¹⁷Мекәр авсн өдмг әмтәхн, болв хөөннь амн дотр элснд хүврх.

¹⁸Ухалсн санан күүндхлә орҗ ирдг: дәәлдхләрн селвг соңс.

¹⁹Хов зөөдг күн, нуувч чигн келҗ өгдг, тегәд бурмха күүнлә бичә харһ.

²⁰Эцкән, экән харасн күүнә герлнь харңһу тагт унтрх.

²¹Хамгин эклцд ховдглҗ буласн өвкин зөөр хөөннь төрүц евәлтә болшго.

²²«Хорта йовдл өшәһән авх!» — гиҗ бичә кел. Деед Эзнд нәәл, Тер чамаг аврх.

²³Чиңнүрдхләрн, әмтиг меклсн күн — Деед Эзнд җигшүртә, төв биш чиңнүртә болсн му.

²⁴Деед Эзн күүнә ишкдл заана. Күн болһн эврәннь хаалһан яһҗ медхмб?

²⁵Бурхнд андһар, үгән өгхин өмн сәәнәр ухал, хөөннь терүндән һундрхад бәәвзәч.

²⁶Цецн хан хар саната әмтиг сергәх, тедниг чаңһар засглх.

²⁷Күүнә седвәр — Деед Эзнә шам, терүг Тер ивтрәһәд герлткнә.

²⁸Хааг чик седкл болн үнн хадһлна, терүнә ширә иткмҗәр батрна.

²⁹Баһчуд чидләрн герлтнә, көгшдиг буурл үсн кеерүлнә.

³⁰Шарх болн шав хар сананас цеврлнә, күүнә дотрк цокхла чикрнә.