Read kalabari Күндтә умшачнр! 23 Bible Online

Күндтә умшачнр! 23 - kalabari bible

Күндтә умшачнр! 23

¹Һардачнрла хамдан хот эдлхәр ширән ард суухларн, өмнчнь кен бәәхинь сәәнәр хәлә.

²Кемр хотд ховдг болхла, хотан тат.

³Хотын әмтәхнднь бичә дурл, терчнь меклх юмн.

⁴Зөөр олхар дегд бичә көөлд, кезә зогсхан мед;

⁵зөөриг хәләхәр седхлә, агчмд уга болҗ одна: һәрдин җивр бийдән урһасар, терчнь нисәд теңгрт йовҗ оддмн.

⁶Үлү үздг хәләцтә күүнлә бичә хот ид, хотин әмтәхнднь бичә дурл;

⁷терүнә дотркнь — нуувч. «Ид, у», — гиҗ чамд келх, болв зүркнь чамд тусҗахш;

⁸зальгсн хотан һарһхич, сән үгән киидән үрәхич.

⁹Һәргтә күүнд бичә юм кел — чини ухата үгиг тер наад бәрх.

¹⁰Өвкнрин һарһсн хуучн меҗәг бичә көндә, өнчнә тәрәнд бичә күчәр ор;

¹¹теднд күчтә Харсач бәәнә, теднә күндинь Харсач даах.

¹²Зүркәрн сурһмҗ ав, медрлин үг соңс.

¹³Көвүһән сурһмҗ уга бичә үлдә, ташмгдад авхла — үкшго:

¹⁴чи терүг цокхла, хөөннь үкләс татҗ авч чадхич.

¹⁵Көвүн минь, кемр чини зүркн ухата болхла, мини зүркнд чигн байрта болх.

¹⁶Кемр чи чикәр келхлә, би байсхв.

¹⁷Чини зүркн килнцтә әмтнд бичә үлү үзтхә, болв Деед Эзнәс кезә чигн хортха,

¹⁸юңгад гихлә, күләҗәх цаг ирхлә, чини нәәлвр хоцршго.

¹⁹Көвүн минь, соңс, цецн бол, чик хаалһд зүркән өг.

²⁰Чаһрт авлгдад, махнд машурҗах әмтнлә бичә хамдан йов,

²¹юңгад гихлә, әркнч болн ховдг күн угарх, хуурмг бәәдл чамаг салврха хувцар орах.

²²Һарһсн эцкән соңс, экән көгшрхлә, бичә терүнд дурго бол.

²³Үнниг олҗ ав, цецн бәәдл, сурһмҗ, тоолвр чигн бичә ге.

²⁴Үннч күүнә эцкнь җирһх, цецн күүнә эцк-эк байрта бәәх.

²⁵Чини эцкчнь, экчнь байрлтха, чини эцк-эк җирһтхә.

²⁶Көвүм! Зүркән нанд тусха, мини хаалһ хәлә.

²⁷Юңгад гихлә, аля күүкд күн гүн нүкнлә әдл, күүнә гергн үүтхн худгла әдл.

²⁸Терчнь гетҗәх тоначла әдл, хорта йовдл икдүлнә.

²⁹Кенәд эн яхлҗ зовҗ бәәхмб? Кенәд эн цүүгән, һундл болҗахмб? Зәрмснь көк балмг сөрв альдас авб? Зәрмсиннь нүднь цәәҗ одсмб?

³⁰Терчнь чаһрт шилтсн әмтнә бәәдл, тедн амтта чаһр оньдин хәәлднә.

³¹Чаһр яһҗ улаҗахинь, сав дотр яһҗ буслҗахинь, яһҗ амрар уугдҗахинь бичә хәлә,

³²хөөннь тер моһа мет зуух, хорта моһа мет хатхх.

³³Тер цагт күүнә гергчүдәр соньмсхла, толһад хаҗһр ухан орх,

³⁴тегәд чи теңгсин тал дунд кевтсн мет, харулин орад кевтсн мет болхич.

³⁵«Намаг цокла, — гиҗ келхич. — Тернь нанд төрүц юмн биш. Намаг гүвдлә — би нам медсн угав, болв унтад серхләрн, би хуучарн әркдәд бәәхв».