Read kalabari Күндтә умшачнр! 24 Bible Online

Күндтә умшачнр! 24 - kalabari bible

Күндтә умшачнр! 24

¹Хар саната әмтнд бичә үлү үз, теднә негнь бичә бол,

²юңгад гихлә, теднә уханд зуг догшн седвәр орна, келәрн негнднь зовлң өгхәр бәәнә.

³Ухаһар гер тосхгдна, тоолврар тер батрна,

⁴үнтә болн седкл туссн тоотар бәәриг медрл дүүргх.

⁵Цецн күн чидлтә, медрлтә күн күчтә болдг.

⁶Ноолданд орхларн, селвг соңс: селвгчнр олн болхла — чи диилхич.

⁷Һәрг мергн уха медшго, балһсна әмтн хурдг ормд аман чигн аңһаҗ чадшго.

⁸Хорта йовдл һарһхар седсн күүнд му ухата гиҗ нер өгх.

⁹Һәргин седвәр — килнц, ичрән геесн күн әмтнд җигшүртә.

¹⁰Кемр чи зовлңта өдрт гейүрхлә, чидләрн түрҗәнәч.

¹¹Алхар авч йовх әмтиг харс! Йосн бишәр үктхә гисн әмтиг татҗ авч чадхвчи?

¹²«Бидн терүнә тускар медсн угалм!» — гиҗ чи келхич. Болв Бурхн теднә зүрк сөрҗәхинь меддгови? Чини җирһлин харул цугинь меднә — күн болһиг Тер күцәсн ачин кирцәһәр ачлх.

¹³Көвүн минь, бал ид, энчнь сән, чини хоолд зөөгин гер әмтәхн болх.

¹⁴Тедү мет цецн уха медлһн чини седклд тусх. Кемр терүг олҗ авсн болхла, тиигхлә, чини иргч болн нәәлвр геедршго.

¹⁵Хар саната күн, үннч күүнә герин һаза бичә гет, терүнә бәәринь бичә хамхл:

¹⁶үннч күн дола дәкҗ унад — босх, хар санатань бүдрхләрн — зовлңгла харһх!

¹⁷Чини дәәсн унхла, бичә байрл, терүг бүдрхлә, бичә чини зүркн байрлтха,

¹⁸эс гихлә, Деед Эзн үзх, тернь Терүнд таасгдшго. Тегәд ууран чини дәәснәс хаҗугшан заагрулх.

¹⁹Хорта әмтнд бичә уурл, хар саната әмтнд бичә үлү үз,

²⁰юңгад гихлә, хорта бәәдлд иргч уга, хар саната әмтнә герлнь унтрх.

²¹Көвүн минь, Деед Эзнәс ә, хаанас ә, урвачнрас холд йов,

²²юңгад гихлә, теднәс зовлң генткн ирнә: ямаран му юм үзүлхинь эврән медшгоч.

²³Цецн әмтнә талдан үгнь эн: чирә хәләсн зарһ — сән биш.

²⁴Хар саната күүнд зөв өгчәхнь — келн-әмтнә харалла харһх, отгин әмтнәс көөгдх.

²⁵Болв бурута кү засглснь байрлх, күцлтә болх.

²⁶Чик хәрү — аминь үмсснлә әдл.

²⁷Түрүләд хаша дотркан яс, тәрәнә һазран эвтнь орул, дарунь эврә герән бәр.

²⁸Киидән таньлан бурушаҗ герчнь бичә бол — чини келнәс худл бичә һартха.

²⁹Таньлин тускар бичә герчл. «Нанд кесинь терүнд би хәрү үзүлсүв!» — гиҗ бичә кел.

³⁰Нег дәкҗ би хуурмг күүнә тәрәнә хаҗуһар йовув, тоолвр уга эзнә урһҗах үзмин хаҗуһар йовув.

³¹Би тенд иим юм үзүв: эргндкиг бүтәдг бура урһҗ, хорта өвсәр тәрәнь дүүрч, чолун хашань нурад унҗ.

³²Би хәләһәд, ухалҗаһад, үзәд, сурһмҗ медсм эн:

³³невчк унтҗахла, үрглҗәхлә, элкән теврәд бас суухла —

³⁴түрү бәәдл чам тал елдң күн кевтә ирх, түрлһн хулхач кевтә генткн ирх.