Read kalabari Күндтә умшачнр! 25 Bible Online

Күндтә умшачнр! 25 - kalabari bible

Күндтә умшачнр! 25

¹Соломона талдан цецн селвгүд. Тернь Иудейин хан Хизкийин әмтәр цуглулгдҗ.

²Нуувчиг үүдәсн Бурхн туурмҗта, нуувчиг медсн Хан туурмҗта.

³Теңгрин өндриг, һазрин гүүниг болн хаана ухаг медҗ болшго.

⁴Цаһан мөңгнәс хутхгдсн керг уга тоотыг авад хайхла, урч ааһ кеһәд һарһх.

⁵Хаана хаҗудк хар саната күүг уга кехлә, чик йосар ширәнь батрх.

⁶Хаана өмн бичә бардмнад бә, бийәсн деегшән ямта улсин нүүрт бичә деегүр бәәдл һарһ.

⁷Сәәчүдин нүүрт чамаг бассн дорхнь, «Деегшән һар», — гиҗ келснь деер болх. Нүдәрн үзсән,

⁸зарһинь келһхәр бичә адһ. Эс гихлә, өөрхн әмтнчнь чамаг ичәхлә, хөөннь ямаран болх?

⁹Өөрхн күүнлә эврә кергәр зарһд ор, күүнә нуувчиг бичә тара.

¹⁰Кемр келхләг — чамд му нер зүүлһх, тегәд чамаг һутахнь маһд уга.

¹¹Цаглань келсн үг — цаһан мөңгн сиилвр деер бәәх алтн альмн.

¹²Цецн күүнә кесн бурушалһн алтн чимкүр, улан мөңгн кегдл мет.

¹³Эзндән нәәлвртәһәр кергән күцәдг күн тәрә хадлһна гүргүд цасна киит орулснла әдл болна, эврә нойнд чидл орулна.

¹⁴Үүлн хурна, салькн көдлнә, болв хур мел орхш. Тедү мет хоосар белг өгнәв гиҗ келсн күүнлә әдл болҗана.

¹⁵Удан тесвр һардачиг чигн иткүлх, җөөлн келн ясиг чигн күүлх.

¹⁶Бал олҗ авхларн — цадтлан ид, болв бөөлҗтлән бичә ховдгл;

¹⁷нәәҗ талан дегд дару-дарунь бичә одад бә, эс гихлә чамас тер цуцрх.

¹⁸Өөрхн күүнә худл герчнь — бүдүн модн, селм, хурц сумн мет тиим.

¹⁹Хамхрсн шүднәс, доһлң көләс тус уга, тедү мет зовлңта өдрлә нәәлвр уга күүнәс тус уга.

²⁰Киитн өдрт хувц таслҗ тәәлсн мет, шав деер давс цацсн мет — тиигҗ күүнд зовлңта цагтнь байрта ду дуулснла әдл болҗана.

²¹Кемр чини хортн өлсҗәхлә — өдмг өг, кемр ундасҗахла — ус уулһ:

²²тиигҗ чи терүнә толһа деер шатҗах нүүрс хураҗанач, чамаг болхла, Деед Эзн ачлх.

²³Ар үзгин салькн нигт хур авч ирнә, ховч күүнә келнәс му хәләц һарна.

²⁴Керүлч гергнлә хамдан ик, у герт бәәхин ормд, герин оран өнцгт бәәсн деер.

²⁵Ундасад зовсн күүнд киитн усн тааста, тедү мет холас ирсн сән зәңг тааста.

²⁶Хар саната күүнә өмн чичрҗәх үннч күн бузрдсн худгла, киртә булгла әдл.

²⁷Балыг ховдглад идхлә му, эс гихлә буульмҗ күләсн бас му.

²⁸Бийән бәрҗ чаддго күн, хаша уга хамхрсн балһсна бәәдлтә.