Read kalabari Күндтә умшачнр! 29 Bible Online

Күндтә умшачнр! 29 - kalabari bible

Күндтә умшачнр! 29

¹Шоодвр соңсад уурлсн күн генткн алгдх, дәкҗ әмдршго.

²Үннч әмтн чидлтә болхла, келн улс байрлна; хар саната әмтн йос һардхла, олн улс зовна.

³Цецн Уханд дуртань эцкән байрлулна, аля әмтнлә үүрлдгнь олсан тарана.

⁴Хаана чик зарһ орн-нутгиг батрулна, авлһ терүг хамхлна.

⁵Өөрхн күүндән зуһудснь — көл дорнь гөлм татҗана.

⁶Килнц — хар саната күүнә бәрән, кемр үннч күн килнц эс һарһхла, тер икәр байрлх.

⁷Үннч күн угатя күүнә түрүг меднә, хар саната күн медхәр седхш.

⁸Ичр уга әмтн балһс хутхна, ухата әмтн цухл тогтнулх.

⁹Кемр ухата күн муңхгла зарһцхла, үүмән болн инәдн зогсшго.

¹⁰Алачнр цевр күүнд дурго, үннч күүг алхар седцхәнә.

¹¹Муңхг күн цухлд дурлна, ухата күн терүг унтрана.

¹²Кемр толһач худл соңсдг болхла, терүнә сөөвңгүд чигн худлчнр.

¹³Угатя болн даҗрдг әмтиг негдүлдгнь — хойраднь Деед Эзнә өгчәх җирһл.

¹⁴Кемр хан угатя әмтнә зарһ чикәр кехлә, терүнә ширәнь мөңкинд хольвршго.

¹⁵Цокад, шоодад бәәхлә — ухан ордг, һазалсн үрн экдән му нер өгнә.

¹⁶Чик санан уга әмтн күчтә болхла — килнцнь күчтә, болв үннч әмтн теднә дорацлһ үзх.

¹⁷Көвүһән сурһ — терүнә төлә таварн бәәхич, тер чини байр болх.

¹⁸Медлгчин үзгдл уга болхла — олн-әмтн дурндан бәәнә, зуг Бурхна Закаһар бәәдг күн кишгтә.

¹⁹Мухла күүг үгин иләр иткүлҗ болдго, медв чигн терүгән келшго.

²⁰Шулун келдг кү үзлч? Муңхг күүнә туснь нам ик болдг.

²¹Кемр мухлаг бичкнәсн эрклүлхлә, цаарандан сән юмн үзгдшго.

²²Ноолдач күн цүүгә татна, уурта күн хорта йовдл икдүлнә.

²³Деер санатань басгдх, тогтун күн күндтә болх.

²⁴Хулхачла үүрлсн күн — эврән бийдән хортн: хулхачиг хараҗахиг соңссн бийнь тагчг бәәнә.

²⁵Татата гөлм — әмтнә өмнк әәмшг, зуг Деед Эзнд нәәлснь харҗ хадһлгдх.

²⁶Кесгнь толһачин хәәрлтд орхар хәәнә, зуг күүнә зарһчнь Деед Эзн.

²⁷Үннч күн худлчнрас җигшнә, чик санан уга әмтнд үннч күн җигшүртә.