Read kalabari Күндтә умшачнр! 3 Bible Online

Күндтә умшачнр! 3 - kalabari bible

Күндтә умшачнр! 3

¹Мини номиг көвүм бичә март, зүркндән мини заавр хадһл.

²Юңгад гихлә, энчн чини өдрмүдиг, насиг уттулх, чини җирһлиг ясрулх.

³Иткл болн үннч бәәдл чамас салшго: тедниг күзүнә кеерүл мет, күзүндән зү, тедниг зүркән әмд деерән бичә март, —

⁴тегәд чамд Бурхнас болн әмтнәс цаһан санан болн дурн күртх.

⁵Эврәннь тоолвртан биш, Деед Эзнд зүркәрн итк.

⁶Ямаран керг күцәв чигн, Деед Эзиг медҗ ав, чини хаалһиг тер чиклх.

⁷Бийән цецн күүнд бичә тоол, Деед Эзнәс ә, хорта йовдлас сагл —

⁸кемр чи тиигҗ кехлә, тернь чини цогц-махмудт туста болх, чини яснд чидл немх.

⁹Юн чигн юмна түрүн оруһас Деед Эзнд эврә бәрц бәр,

¹⁰тегәд чини юм хадһлдг һазр элвг зөөрәр дүүрх, бочкс шин чаһрар дүүрх.

¹¹Көвүн минь, Деед Эзнә сурһмҗ бичә буруша. Терүнә шоодврас бичә зул.

¹²Юңгад гихлә, Деед Эзн дурта күүһән шоодна, эцклә әдләр көвүһән күндлнә.

¹³Цецн Уха авсн күн буйн-кишгтә, тоолврта күн буйн-кишгтә.

¹⁴Цаһан мөңгтә болснас Цецн Ухата болсн деер, юңгад гихлә, тер алтнас үнтә.

¹⁵Олн өңгтә чолунас тер үнтә, седкл туссн нег чигн юмн терүнлә әдлцшго.

¹⁶Терүнә барун һартнь — ут насн. Терүнә зүн һартнь — зөөр болн ачлвр.

¹⁷Терүнә җирһлин хаалһ — байрин хаалһ, хаалһснь кевтән амулң бәәдл тал ирнә.

¹⁸Цецн Ухан — седклән тәвснд җирһл өгнә. Терүнәс саллго бәәсн күн буйн-кишгтә.

¹⁹Деед Эзн Цецн Ухаһарн һазр тогтала, теңгриг медрләрн батлла.

²⁰Терүнә медрләр һазр дор бәәсн булгуд хаһрна, үүлнәс чиг һарна.

²¹Көвүн минь, чи ухаһан, мергнән хадһлхич, тер тоот чамас нуугдшго.

²²Тернь чини седклин бәәдл болх, әмтнә күндллһн чини күзүнә кеерүл болх.

²³Тегәд чини хаалһ әәмшг уга болх, чини көл хаҗһр ишкшго.

²⁴Чи әәл уга унтхич, унтхларн әмтәхн зүүд бәрхич.

²⁵Генткн учрсн зовлңгас бичә ә, хар саната күүнә белдсн хорта йовдлас бичә ә;

²⁶юңгад гихлә, Деед Эзн чамаг харх, хорта бәрәнд чамаг орулшго.

²⁷Кемр чини медлд күүнә зөөр бәәхлә, йосн эзнднь терүг арһта болхла өг;

²⁸кемр өөрхн күүндән бәәснәсн өгч чадхла: «Йов, дәкәд ир, маңһдур өгнәв», — гиҗ бичә кел.

²⁹Чамд иткҗәх күүнә өмнәс бичә му үзүлхәр сед.

³⁰Хар санаһан эс күртәсн күүнлә бичә йирдән керлд.

³¹Күч үзүлдг күүнд бичә үлү үз, терүнә хаалһар бичә йов,

³²юңгад гихлә, Деед Эзн хорта күүнд дурго, үннч күүг тер иткнә.

³³Деед Эзнә харал хар саната күүнә герт тусна; үннч күүнә гериг тер йөрәнә.

³⁴Һундадг күүг тер наад бәрнә, тогтун күүнд тер тусан күргнә.

³⁵Цецн әмтн туурмҗта болх, һәргтә әмтн му нерндән даргдх.