Read kalabari Күндтә умшачнр! 4 Bible Online

Күндтә умшачнр! 4 - kalabari bible

Күндтә умшачнр! 4

¹Көвүд, эцкиннь сурһмҗ соңстн, оньган өгтн, ухата болтн.

²Би таднд сән болдг ном өгчәнәв, мини даалһвр бичә бастн.

³Би бас бичкн үрн биләв, эцк-эк нанд йир дурта билә.

⁴Эцкм намаг иигҗ сурһдг билә: мини келсиг зүркндән бәр, мини заавр күцә, әмд йовхич.

⁵Цецн ухата болх медрлән өск, мини келсиг бичә март, бичә буруша.

⁶Цецн Ухаһан бичә ге, терчнь чамаг бәрх, терүг хәәрл — чамаг харсх.

⁷Цецн Ухана эклцнь юундв? Медрлд хә, ю эс хоршав чигн, ухаһан гүүдүл.

⁸Цецн Ухаг үнл, тер чамаг өөдлүлх, кемр терүг хадһлхла, чамаг туурулх.

⁹Чини толһад берк титм тәвх, тер чамд гилвксн титм авч ирх.

¹⁰Көвүн минь, соңс намаг, мини үг ав — тиигхлә чини насн утдх.

¹¹Чамд би цецн ухана хаалһ заасув, һо хаалһар йовулсув.

¹²Кемр йовхла, ишкдлән геешгоч, кемр гүүхлә, бүдршгоч.

¹³Эн сурһмҗ ав, бичә хаҗи, терүг хадһл, терүнд чини җирһл бәрәтә.

¹⁴Ичр уга әмтнә хаалһд бичә ор, хорта әмтнә мөрәр бичә йов,

¹⁵терүгәр бичә йов, хаҗиһәд һар, талдан үзгәр, хаҗуһарнь йов.

¹⁶Юңгад гихлә, кемр тедн хоран эс күргхлә, унтшго, кемр күүг эс алхла, нүдән аньшго.

¹⁷Һарһсн хорта йовдлан тедн өдмг идсәр иджәнә, күч һарһсан чаһр мет тедн ууҗана.

¹⁸Цаһан седклтә әмтнә хаалһ — өрин герллә әдл, урһҗах өдр дахад улм герлтнә.

¹⁹Ичр уга әмтнә хаалһнь харңһу таг, альд бүдрхән тедн медҗәхш.

²⁰Көвүн минь, мини үгиг соңс, мини келснд оньган өг.

²¹Терчн чини хәләцәс алдрҗ салшго болтха! Зүркнәннь гүүнд терүг хадһлх болтха!

²²Юңгад гихлә, терчн терүг олҗ авсн күүндән әмн-җирһлнь болх, цогц-махмудыг эмнх.

²³Зөөрәс үлүһәр ухаһан әрвл, юңгад гихлә, зүркн — җирһлин булг.

²⁴Худл үгд бичә итк, мек һарһҗ келхиг һәәл.

²⁵Тус өмнән хәлә, чи уралан хәләцтә бол.

²⁶Хаалһан һооднь һарһ, тиигхлә, чини хаалһ әәмшг уга болх:

²⁷барун бий тал чигн, зүн бий тал чигн бичә хаҗи, болв хорта юмнас чи хооран һар.