Read kalabari Күндтә умшачнр! 6 Bible Online

Күндтә умшачнр! 6 - kalabari bible

Күндтә умшачнр! 6

¹Көвүн минь! Кемр чи талдан күүнә төлә даалһвр авсн болхла, күүнә күүг эврә дааврт авсн болхла —

²тиигхлә, чи бийиннь үгд бәргдвч, бийиннь үгд авлгдвч.

³Көвүн минь, ю болвчн кеһәд сулдҗ ав, юңгад гихлә, ода чи күүнә үлмәд бәәнәч. Көлднь унад сур, дахлдад йов,

⁴нөөрән тат, нүдән бичә ань,

⁵гөрәсн мет көөлдснәс зул, шовуд мет бәрлһнәс зул.

⁶Хуурмг көвүн, шорһлҗн тал од, терүнәс уха ав:

⁷терүн деер ахлач чигн уга, харул чигн, һардач чигн уга,

⁸шорһлҗн хотан зунас авн белднә, тәрә хадхла, кергтә тоотан белднә.

⁹Хуурмг күн, кедүдән кевтхмч, нөөрәсн серх цаг ирсн болвза?

¹⁰Невчк унтҗахла, үрглҗәхлә, невчк элкән теврәд суухла,

¹¹тиигхлә, түрү бәәдл чам тал елдң күн кевтә ирх, угатя бәәдл хулхач кевтә генткн ирх.

¹²Му күүнә болн хар саната күүнә худлнь келнәснь тасршго:

¹³зәрмдән тер чирмнә, зәрмдән көләрн тавшна, зәрмдән хурһарн докъя өгнә.

¹⁴Терүнә зүркнд хар санан бәәнә, терүнә седкл хорар дүүрң, керүл-цүүгә тер татна.

¹⁵Терүнәс көлтә бийднь зовлң буух, генткн алх, дәкҗ әмдршго.

¹⁶Деед Эзн зурһан юмнд дурго, доладгчнь терүнд җигшүртә:

¹⁷деерлклһн, худл келлһн, килнц уга күүнә цуснд будгдсн һар,

¹⁸хар сана зүүҗәх зүркн, хорта йовдл һарһхар гүүҗәх көл,

¹⁹худл келҗәх худл герч, ах-дүүнр дунд керүл-цүүгә цацдг күн.

²⁰Көвүм! Эцкиннь заавр соңс, экиннь ном бичә һол.

²¹Тедниг эврәннь зүркнд бәр, күзүндән кеерүл мет зү.

²²Йовхлачн, тер сурһмҗ чамаг дахулх, унтхлачн, чамаг хәләх, серхләчн, чамта күүндх.

²³Юңгад гихлә, заавр — герлин гегән, ном — герл, чаңһ сурһмҗ — җирһлин хаалһ.

²⁴Тедн чамаг му гергнәс татҗ авх, күүнә гергнә зуһу келнәс харсх.

²⁵Терүнә сәәхнд зүркән бичә бәрүл, нүдән чирмснд бичә авлгд.

²⁶Аля күүкд күүнә үннь — зүсм өдмг, зуг күүнә гергнә төлә әмәрн шордхч.

²⁷Шатҗах һал өвртән бултулад, хувцан шаталго бәәҗ болхий?

²⁸Шатҗах нүүрс ишкхләрн, көлән шаталго йовҗ болхий?

²⁹Тиим юмн залута гергн тал оддг күүнд үзгдхмн: терүг көндәсн күн засгла харһх.

³⁰Харһнхларн, хот идхәр седәд, хулха кесн хулхачиг шүрүнәр шооддго:

³¹болв кемр бәргдхлә, цугтаһинь хәрүлх, бәәсән цугтаһинь өгх.

³²Күүнә гергнлә аля һарһсн күн, ухан тату болсар, эврән бийдән үкл хәәҗәнә.

³³Күүнәс цокулх, ичрән барх болҗана, һутасн нерән цеврлҗ чадшго.

³⁴Юңгад гихлә, терүнә залу харлсндан һалзурна, өшәһән авхларн, тер күүг хармншго,

³⁵ямаран чигн мөңг өгәд тер сурхар седвчн, зөв өгшго, кедү юм өгхәр седвчн, терүнә залуһин седклнь җөөлдшго.