Read kalabari Күндтә умшачнр! 7 Bible Online

Күндтә умшачнр! 7 - kalabari bible

Күндтә умшачнр! 7

¹Көвүн минь, келсн үгим ухал, мини зааврмуд хадһл, келсн зааврмудым седклдән бәр.

²Мини селвг күцә, әмд бәәхич, мини зааврмуд нүднәннь харанла әдләр хадһл,

³билцг мет зүүҗ йов, зүркндән бичҗ ав.

⁴Цецн Ухандан кел: «Чи, мини эгч-дү», серлтә кевәр төрл-садн бол.

⁵Тиигҗ чи күүнә гергнәс бийән татҗ авхич, тер җөөлн келтә залута гергнәс харсгдхич.

⁶Юңгад гихлә, нег дәкҗ би эврәннь терзәр шаһахла, терзин термәр хәләхлә,

⁷дамшлт уга әмтн дунд, баһчуд дунд, нег ухан тату уйн наста көвү үзүв.

⁸Залута гергн бәәх уульнцин өнцг тал тер йовҗ йовна, терүнә гер тал одна —

⁹нарн суухла, бүркг цагла, харңһу сөөһәр, хар таңла.

¹⁰Терүнә өмнәс күүкд күн һарч ирнә — тер аля гергнә хувцта, зүркндән мектә,

¹¹цуцрлт уга болн догшн, тер гертән сууҗ чадҗана:

¹²зәрмдән тер уульнцд, зәрмдән талвң деер, булң болһнд манна.

¹³Көвүг тер татҗ теврәд үмснә, ичр угаһар келнә:

¹⁴«Би эндр махар бәрцән бәрҗәнәв, би эндр Деед Эзнд өгсн андһаран күцәвүв.

¹⁵Тегәд чамаг тосад һарув. Чамаг хәәләв, ода олвув.

¹⁶Египетин эрәтә эдәр кесн бүтәһүләр би кевтрән бүркв.

¹⁷Дер-девскрән сән үнртә тосар, дорд үзгин өвснә каңкнсн үнрәр ивтрәвүв.

¹⁸Күрәд ир, өрүн күртл нег-негән таалад эңкрлхмн, хантлан дуран эдлхмн.

¹⁹Юңгад гихлә, залум гертән уга: хол хаалһд һарч йовба,

²⁰мөңгтә харлдшан авба, сар күцтл герүрн иршго».

²¹Көвүг зүсн-зүүл мекәр эргүлнә, җөөлн үгәр авлна.

²²Алулхар йовҗ йовсн цар мет, көвүн тер дарунь дахад һарна, бәрәнд бәргдх буһ-марлла әдләр йовна.

²³Тенд элкинь саадг цоолх; бәрәнд бәргдх шовунла әдләр, әмән өгхән медҗ бәәхш.

²⁴Тегәд намаг соңслт, күүкдм, мини үгд оньган өгтн:

²⁵тана зүркн терүнә хаалһд бичә тустха, терүнә мөрәр бичә төөрч йовтн!

²⁶Йир олн күн терүнәс көлтә үквә, кесгинь тер алва.

²⁷Кемр терүн тал йовхла, үклин хаалһд һарчаснтн тер. Тер гергн талк хаалһ — үкәрт күргх хаалһ.