Read kalabari Күндтә умшачнр! 8 Bible Online

Күндтә умшачнр! 8 - kalabari bible

Күндтә умшачнр! 8

¹Эннь Цецн Ухан дуудҗ бәәвзә? Терүнә серлтә дун соңсгдҗ бәәвзә?

²Довуна орад бәәсн хаалһин хаҗуд әмтнә хаалһин саллтд тер зогсҗана.

³Олна нүүрт дуудҗана, балһснд орҗ ирхлә, хәәкрнә:

⁴— Әмтн, тадниг би дуудҗанав, мини дуудвр күүнә үрдүдт!

⁵Дамшлт уга әмтн, тоолврта болдг дастн, һәргүд, ухата болтн!

⁶Мини ик чинртә үг соңстн, үнн мини келснд бәәнә,

⁷мини келн чикәр келҗәнә, хар санан амнасм һаршго.

⁸Мини келсн мел үнн, терүнд мек чигн, худл чигн уга;

⁹цугтан тедн серлтә әмтнд иләр медгдҗәнә, медрл хәәснднь медхд амр.

¹⁰Мини сурһмҗиг цаһан мөңгнәс деегшән үнлтн, медрлиг — улавр өңгтә алтнас деегшән үнлтн.

¹¹Юңгад гихлә, цецн ухан герлтә чолунас берк сәәхн, нег чигн седкл тусх юмн терүнлә әдлцшго.

¹²Би — Цецн Ухан, би тоолвртав, болв медрл болн мергн ухан нанд бәәнә.

¹³Деед Эзниг күндлхин төлә хар сананд дурго болх кергтә. Деерлкснд, караглснд, хорта йовдлд, худлч келнд би дургов.

¹⁴Нанд цецн селвг бәәнә, нанд күцәмҗ бәәнә, би ухатав, нанд чидл бәәнә,

¹⁵би эзргх хаадудт дөң болҗанав, тегәд йосна һардачнр чик неквр тогтана.

¹⁶Нанар толһачнр, нойдуд болн ахлачнр заллтан тогтана.

¹⁷Нанд дурта болснд, би терүнд дурлнав, намаг хәәснь — олҗ чадх.

¹⁸Байн бәәдл болн туурмҗ нанла, чилшго цецгәрлт болн үнн бәәдл нанла.

¹⁹Мини күцәмҗ улавр цевр алтнас даву, би шүүҗ авсн цаһан мөңгнәс үнтәв.

²⁰Би чик хаалһд орҗанав, үннә мөрд орҗанав,

²¹дурта әмтнд ирлцх ачлвр өгхәр, теднә зөөринь дүүргхәр.

²²Деед Эзн эврәннь кергүдәсн эрт намаг үүдәҗ. намаг хаалһиннь эклцд, кезәнә һарһв.

²³Кезәнәһә, делкә үүдҗәхд, би цагин эклцд төрләв.

²⁴Йорал уга гүн уснас түрүлҗ, дүүрң уста булгас түрүлҗ би һарув.

²⁵Намаг һархин өмн уулмуд чигн тогтад уга бәәҗ, довуд чигн уга бәәҗ,

²⁶Деед Эзн тиигхд һазрин аһу, түрүн атх шора тогтаһад уга бәәҗ!

²⁷Теңгр тогтаҗах цагт — би тенд биләв, йорал уга аһуд төөнг зурҗахд би тенд биләв,

²⁸теңгрт үүлд тәвҗәхт, йорал уга тамин булгуд тогтаҗахт,

²⁹терүг усн деврәд асхрдгоһар теңгсин меҗә зуралҗахт, һазрин ул тогтаҗахт,

³⁰терүнә хаҗуд би зурач биләв, өдр болһна җирһлтә байрнь боллав. Терүнә өмннь цуцрлт угаһар байрллав,

³¹делкән бәәдлин үүдәлтд байрллав, күүнә төлә жирһлтәһәр цаган давуллав.

³²Ода намаг соңстн, күүкдм: мини мөрәр йовсн күн кишгтә!

³³Сурһмҗим соңстн — цецн болхт, бичә мергн уха бурушатн.

³⁴Намаг соңссн күн кишгтә, мини үүднә өмн өдр-сөөһәр бәәдгнь, мини үүднә мөр хәләҗ нүдән аньдгонь кишгтә.

³⁵Намаг олҗ авснь — җирһлән олснла әдл. Тиим күн Деед Эзнд тааста.

³⁶Мини өмнәс сөрснь — бийән барх: нанд дурго болснь — үклд дурта.