Read kalabari Маркин бичсн Сән Зәңг 1 Bible Online

Маркин бичсн Сән Зәңг 1 - kalabari bible

Маркин бичсн Сән Зәңг 1

¹Исус Христос гидг нертә Бурхна Көвүнә туск Сән Зәңгин эклц.

²«Би Зәңгчән урдасчн илгәнәв. Чини хаалһичинь белдх».

³«Деед Эзнд хаалһинь белдтн. Терүнә җиминь ястн! — гисн көдәд хәәкрҗәх күүнә ду соңсҗанав», — гиҗ әәлдәч Эшья бичсмн.

⁴Әмт уснд кирслдг Йохан Бурхна зәңгчнь болҗ ирсмн. Йохан эҗго көдәд ирҗ бәәсмн. — Килнцән илднь медүлсн күн килнцтә җирһлән үлдәһәд, нанар уснд бийән кирслтн. Тиигхлә Бурхн тана килнцитн тәвҗ өгх, — гиҗ Йохан Бурхна ном тархасмн.

⁵Тегәд Йудья нутгин кесг улс болн Ерусалимин әмтн Йоханур ирҗ. Тедн килнцән илднь келәд, Йордан һолд Йоханар бийән кирслцхәв.

⁶Йохан темәнә килһсәр гүрсн хувц өмсәд, белкүсән арсн бүсәр бүслдг бәәҗ. Царцаха, зерлг зөгин бал хойрар гесндән теҗәл кеҗ йовҗ.

⁷[7-8] — Мини ардас Ик Күчтәнь ирхмн. Нанд Түүнә буршмгин бүчинь тәәлх зөв уга. Би тадниг уснд кирслҗәнәв, Тер тадниг Әрүн Сәкүсәр кирслх, — гиҗ Йохан зәңглсмн.

⁹Тер цагт Һалильян Назарет балһснас ирсн Исусиг Йохан Йордан һолын уснд кирслсн болдг.

¹⁰[10-11] Исусиг уснас һарч йовтлнь генткн теңгр заагрсмн. Дарунь Әрүн Сәкүсн Бий деернь көглҗрһн мет бууҗахиг Исус үзсмн. — Энтн Мини Хәәртә Көвүн! Эн Намаг байрлулна! — гисн дун дарунь теңгрәс соңсгдҗ.

¹²Уснд кирслгдснә хөөн Әрүн Сәкүсн Исусиг эҗго көдәд одтха гиҗ.

¹³Дөчн хонгтан Исус зерлг аңгуд бәәдг эҗго көдәд бәәсмн. Эрлг Терүг сөрүлсмн, Бурхна элчнр болхла Исуст дөң болсмн.

¹⁴[14-15] Йоханыг түүрмд Херод хан суулһсна хөөн Исус Һалильяд одад, олн әмтнд Бурхна Сән Зәңг цәәлһҗ: — Цагнь ирв! Теңгрин Йосн өөрдв! Килнцтә җирһлән үлдәтн! Сән Зәңгд итктн! — гисмн.

¹⁶[16-17] Һалилья нуурин көвәһәр йовҗ йовад, Исус заһсчнр Шимон Андрей ах дү хойриг үзҗ. Тедн уснд гөлмән хайҗ йовцхаҗ. — Наартн, Намаг дахтн! Би таднд әмт дуудҗ, мөңк җирһлд орулҗ заанав, — гиҗ Исус теднд келҗ.

¹⁸Ах дү хойр түдл уга гөлмән үлдәчкәд, дахад һарцхав.

¹⁹[19-20] Цааранднь йовҗ йовад, Зебедана Яков Йохан хойр көвүдиг Исус үзҗ. Тедниг оңһц дотран гөлмән ясад суусинь үзәд, Бийән дахулхар дуудв. Эцкән көдләчнртәһинь оңһц дотрнь үлдәчкәд, теднь дахад һарч.

²¹Исусиг дахад, тедн Капернам балһснд ирҗ. Бемб өдр Исус хурлд одад сурһсмн.

²²[22-24] Исусин номинь соңсад, цугтан өврҗ. Учрнь иим: ном цәәлһдг улсла әдл биш ном сурһх зөвтә күн болҗ, Исус сурһҗ. Тер цагт хурлд хар сәкүснд эзлгдсн күн бәәҗ. Тер хәәкрҗ: — Назаретас ирсн Исус, Танд маднас юн кергтә? Та мадниг уга кехәр бәнт? Би Таниг меддүв! Та Бурхна Әрүн Зарцд! — гиҗ.

²⁵— Тагчг бә! Эн күүнәс һарч әрл цааран! — гиҗ Исус закҗ.

²⁶Хар сәкүсн тер күүг сегсрүләд, му дууһар хәәкрәд, терүнәс һарч.

²⁷Энүг үзсн әмтн сүрдәд, нег-негнәсн сурцхаҗ: — Акад юмб? Юн гидг күчтә шин номв?! Хар сәкүсдин бийнь Энүнә заквринь соңсҗана!

²⁸Удл уга Исусин туск зәңг Һалильян һазрар тарв.

²⁹Исус Яков Йохан хойрла хурлас һарад, Шимон Андрей хойрин герт ирҗ.

³⁰Шимона хадм экнь халута кевтсинь Исуст медүлцхәв.

³¹Исус өөрдҗ одад эмгиг һараснь авад, демнәд босхҗ. Тер дарунь халунь уурч. Эмгн босад, гиичнрән тоох хот нерхәр сахньв.

³²[32-34] Асхнднь, нарн суулһнла, Исус тал гемтә болн хар сәкүснд эзлгдсн улсиг авч ирсмн. Олн әмтн Терүнә үүднә өөр цуглрҗ. Кесг әмт эдгәһәд, кесг әмтнәс хар сәкүсдиг Исус көөҗ һарһсмн. Исус ә бичә һартн, гисн хөрлт хар сәкүсдт өгч, яһад гихлә, теднь Исусиг меддг бәәҗ.

³⁵Маңһдуртнь өр цәәтл босад, Исус аглһ һазрт одад мөргсмн.

³⁶Шимон хамдан йовсн әмтнләһән Исусиг хәәһәд һарч.

³⁷Олҗ авад: — Багш, Та яһвт? Таниг цугтан хәәҗәнәлм, — гицхәҗ.

³⁸Исус өмнәснь: — Эргндк хотдуд орхмн, Би тер әмтнд Сән Зәңг цәәлһҗ өгнәв. Тер кергәр Би Капернамас һарлав, — гиҗ.

³⁹Һалилья һазр эргәд, хурлмудар орад, Исус Сән Зәңг тархаҗ. Хар сәкүсдт эзлгдсн кесг улсиг зовлңгаснь гетлгҗ.

⁴⁰[40-41] Исус тал арсна гемтә күн ирәд, сөгдәд: — Буйн болтха, намаг гемәсм цеврлх саната болхла, цеврлтн! — гиҗ эрв. Исус түүнд санань зовад, һаран күргәд: — Чамаг цеврлх санатав. Цеврлгд! — гиҗ.

⁴²Тер дарунь арсна гемтә күн цеврдҗ одҗ! Гемнь эдгҗ.

⁴³[43-44] — Энүнә тускар бичә күүнд кел, зуг гелңгд одад, бийән үзүл, Мошен закаһар тәкл тәк. Терүгәрн чи әмтнд эдгсән медүлхич, — гисн чаңһ заквр өгәд, эдгсн күүг Исус йовулҗ.

⁴⁵Зуг тер күн бийләнь учрсн юмна тускар, зәңг тараһад йовҗ. Терүнәс көлтә Исуст хәрү балһснд одҗ бәәдг арһ уга болв. Тегәд эҗго һазрт бәәдг болҗ. Болв кесг һазрас әмтн Терүн тал ирдг бәәсмн.