Read kalabari Маркин бичсн Сән Зәңг 11 Bible Online

Маркин бичсн Сән Зәңг 11 - kalabari bible

Маркин бичсн Сән Зәңг 11

¹Исус сурһульчнртаһан Ерусалимас хол биш Олив уул тал болн тенд бәәсн Бетпәг Бетәнья гидг хойр хотд тал өөрдҗ ирәд, хойр сурһульчнран өмнән тәвв:

²— Эн тана өмн бәәсн хотнд орад, унад уга баһ наста элҗгн архлата бәәхинь үзхит. Терүг тәәләд көтләд авад иртн.

³«Тадн ю кеҗ бәәхмт?» — гиһәд сурснднь: «Элҗгн Деед Эзнд кергтә болҗана, дарунь өгчкх» гиҗ хәрү өгтн, — гив.

⁴[4-5] Сурһульчнрнь одад, герин һаза архлата элҗгниг олҗ авад, тәәләд авч бәәтлнь, тенд бәәсн әмтн:

⁶— Ю кеҗәхмт? Яһад элҗгниг тәәлҗәхмт? — гихлә, теднь Исусин келсиг келҗ өгч. Тиигхлә теднь тәвҗ.

⁷Сурһульчнрнь элҗгниг көтлҗ авч ирәд, деернь хувцан көдрҗ. Исус элҗгниг унв.

⁸Олн әмтн Исусин йовсн хаалһ деер эврәннь хувцан делгәд, көкрҗәсн модна бүчр керчҗ авад хайв.

⁹[9-10] Исусин өмн ард уга йовсн әмтн: — Бурхн тууртха! Деед Эзнә нерн деерәс ирснь әдстә болтха! Мана Давид эцкин иргч йосн әдстә болтха! Бурхн тууртха! — гиһәд хәәкрцхәв.

¹¹Ерусалимур ирәд, Исус һол сүм орв. Сүмин дотрк бәәдл хәләх зуур, ора болҗ одв. Тегәд Исус сурһульчнртаһан Бетәнья гидг хотн тал темцв.

¹²Маңһдуртнь тедн тер хотнас геснь өлн һарад йовҗ йовцхаҗ.

¹³Өлсҗ йовсн Исус холас инҗрин мод үзәд өөрдәд, темсн бәәдг болвза гиһәд хәләв. Зуг модна бүчрт көк хамтхаснас талдан юм үзҗ уга. Темсн болх болзгнь ирәд уга сәнҗ.

¹⁴— Энүнәс хооран чини бүчрмүд деер төрүц бичә темсн урһтха! — гиҗ Исус модн тал хәләһәд келҗ. Сурһульчнрнь Исусин келсн үгинь соңссмн.

¹⁵[15-16] Тедн Ерусалимур ирцхәв. Исус һол сүм орв. Дотрнь бәәсн хулдачнр хулд кеһәчнр уга цугинь көөҗ һарһад, мөңг сольҗасн улсин ширәһинь көмрәд, көглҗрһ хулдҗасн улсин ширәһинь көлврүлв. Өлг-эдән чигн сүмин хотн дотраһур авч йовдгинь уурулв.

¹⁷— «Мини гер — олн әмтнә мөргүлин гер болҗ нерәдгдх» — гиҗ Бурхна Бичгт бичәтә эс бәәнү? Тадн энүгәр деермчнрин бәәр кеҗит, — гив.

¹⁸Энүг соңсчкад, ах гелңгүд болн ном цәәлһәчнр Исусиг бәрҗ авч алх арһ хәәсмн. Олн әмтн ик өврмҗтәһәр номинь соңсдг төләднь тедн Исусас әәдг сәнҗ.

¹⁹Асхнднь Исус сурһульчнртаһан дәкн балһснас һарад йовв.

²⁰Маңһдур өрүнднь тедн инҗр модна өөгүр йовҗ йовад, терүг хатҗ одсинь үзцхәв.

²¹Өцклдүр өрүн эн модна өөр учрсн үүлиг ухандан сергәһәд: — Багш! Хәләтн! Өцклдүр харасн моднтн хатҗ одҗ! — гиҗ Пётр келв.

²²[22-23] — Бурхнд итктн! Эн уулыг ормасн көндрәд теңгсин уснд ун гиҗ келәд маһдл уга иткхлә — эрк биш күцгдх.

²⁴Зальврад сурхла, Бурхн өгх гиҗ, үнн седкләрн иткхләтн, цугнь күцгдх.

²⁵[25-26] Зальврхиннь өмн түрүләд өөлҗ, уурлҗах әмтндән геминь тәвтн. Тиигхлә Теңгрин Эцк чигн тана килнцитн тәвх, — гиҗ Исус келв.

²⁷Исус дәкн эврәннь сурһульчнртаһан Ерусалимур ирв. Исусиг һол сүм дотр бәәтл ах гелңгүд, ном цәәлһәчнр болн толһачнр өөрдҗ ирәд:

²⁸— Ямаран йосар Чи эн тоотыг күцәҗ бәәхмбч? Кен Чамд иим йос өгв? — гиҗ сурцхаҗ.

²⁹[29-30] — Би таднд бас нег сурвр өгнәв. Мини сурврт хәрү өгхләтн, Би чигн тана сурврт хәрү өгнәв. Йохана уснд кирсллһн теңгрәсв эс гиҗ күүнәсв? — гиҗ Исус сурв.

³¹[31-32] Тедн хоорндан шимлдәд зөвчлдв: — Теңгрәс гихлә «юңгад түүнд эс итквт», — гиҗ Исус келх. Күүнәс гихдән әмтнәс әәцхәв. Юңгад гихлә, цуг әмтн Йоханыг Бурхна әәлдәч гиҗ тоолдг бәәҗ.

³³Тегәд: — Медхшвидн, — гиҗ хәрү өгцхәв. — Тиигхлә Би чигн кенә йосар энүг кеҗәхән келхшв, — гиҗ Исус келв.