Read kalabari Маркин бичсн Сән Зәңг 13 Bible Online

Маркин бичсн Сән Зәңг 13 - kalabari bible

Маркин бичсн Сән Зәңг 13

¹[1-2] Исусиг һол сүмәс һарч йовхла, нег сурһульч: — Багш, сән һара чолуһар бәрсн сәәхн бәәшңгүд дүңгәҗ зогсҗ бәәхинь хәләһит! — гиҗ Исуст келҗ. — Эн алдр тосхлт үзҗ бәнчи? Энчн чолун деер чолун үлдл уга, ова чолун болад хольврҗ одхмн, — гиҗ Исус хәрү өгч.

³Исусиг Ерусалимин хаҗудк Олив уулын ташуд, һол сүмин өмн суутлнь, Терүн тал Пётр, Яков, Йохан, Андрей дөрвн ирәд:

⁴— Тер Тана келсн юмнтн кезә учрхмб? Ямаран темдгәр медгдхмб? — гиҗ сурв.

⁵— Бийән саглҗ бәәтн! Күн тадниг меклвзә!

⁶Кесгнь Мини нер зүүҗ ирәд: «Би Күмни Көвүмб», — гиҗ келәд, кесг улсиг меклх.

⁷Кемр тадн өөрхн болҗах болн хол болҗах дәәнә тускар соңсхларн, бичә әәтн. Дән болх зөвтә, болв тернь чигн чилгчнь биш.

⁸Тал-талдан келн-әмтн болн орн-нутгуд хоорндан дәәллдх. Энд-тенд һазр көндрх, күн мал уга харһнх. Эн Мини келҗәх тоот төрх күүкд күүнә элкнь эклҗ зовадг мет болҗана.

⁹Болһатн! Намас көлтә тадниг зарһла харһулх, хурлд авч одад цокх. Хаадудын болн һардачнрин өмн зогсад, Мини тускар үн келҗ өгхт.

¹⁰Зуг түрүләд Мини туск Сән Зәңг цуг келн әмтнд цәәлһҗ өггдх зөвтә.

¹¹Зарһчнрин өмн зогссн цагтан тадн келх үгән урдаснь ухалҗ бичә зовтн. Зуг Бурхна зааҗ өгсн үг келтн. Юңгад гихлә, таднар дамҗад Әрүн Сәкүсн келх.

¹²Ахнр-дүүнр нег-негән күүнд бәрүлҗ, эцкнь үрдүдән күүнд бәрүлҗ алулх. Күүкднь эк-эцкләһән дәәллдәд алх.

¹³Нанас көлтә цугтан таднд дурго болх. Цуг эн тоотыг дааснь авргдх.

¹⁴— Кемр хоосрулҗах җигшүртә юмн таднд болх болшго һазрт үзгдхлә, (умшачнр медҗ автн) Йудьяд бәәсн әмтн өөдм һазрур зулҗ һартха.

¹⁵Герин ора деер бәәснь зулад йовҗ йовхларн герүрн хувцан авхар бичә ортха.

¹⁶Кеер йовснь чигн гүүхләрн хувцан авхар герүрн бичә иртхә.

¹⁷Тер цагт саата болн көкүл үртә күүкд улс ик түрү үзх.

¹⁸Тер цаг үвләр бичә болтха гиҗ зальврҗатн.

¹⁹Тер цагт делкә үүдснәс нааран үзгдәд уга зовлң учрх. Тиим ик зовлң тер цагин хөөн чигн төрүц үзгдшго.

²⁰Тер ик зовлңта цагинь Деед Эзн эс баһрулсн болхла, нег чигн күн әмд үлдшго билә. Болв, Бийиннь шүүҗ авсн әмтнә төлә Бурхн тер өдрмүдиг баһрулв.

²¹Кемр таднд: «Эннь Христос!», «Тернь Христос!» — гиҗ келхлә, тадн бичә итктн.

²²Тер цагт кесгнь бийән Христосв гиҗ нерәдх эс гиҗ әәлдәчв гих. Тедн олн зүсн өвәрц йовдл болн темдг үзүлх. Бурхна шүүҗ авсн әмтиг чигн меклхәр седх.

²³Болһатн! Тер тоотыг Би таднд урдаснь цәәлһҗ өгчәнәв.

²⁴Тер ирх зовлңгин хөөн нарн унтрад, сар герл өгдгән уурх.

²⁵Одд теңгрәс унад, теңгрин күчнь көндрх.

²⁶Дарунь Күмни Көвүг алдр туурмҗтаһар болн күчтәһәр үүлн заагт аашсинь әмтн үзх.

²⁷Эврәннь шүүҗ авсн улсан йилһҗ авхин төлә һазрин захас теңгрин зах күртл дөрвн үзг тал элчнрән илгәх, — гив.

²⁸— Инҗрин модна бүчр деер хамтхасн экләд урһхла, тадн зун өөрдҗ йовна гиҗ темдглнә эсийт?

²⁹Терүнлә әдл, Мини келсн тоотыг экләд үзхләрн цагнь ирв, Күмни Көвүн ирәд, үүднә ард зогсҗ бәәнә гиҗ сантн.

³⁰Мини келсн тоот юмн эс учртл, эн цагин күмни уңгнь тасрш уга гиҗ үнәр танд келҗәнәв.

³¹Теңгр һазр хойр уга болҗ одх, зуг Мини келсн үгмүд сольгдшго.

³²Цаг-болзгнь нег чигн күн медхш. Бурхна элчнр чигн, Бурхна Көвүн чигн медхш, зуг һанцхн Бурхн меднә.

³³Цаг-болзгнь кезә ирхинь эс медсн төләдән, саг-сергг бәәҗәтн.

³⁴Тер ирх цагиг иим үлгүрлә дүңцүлҗ болхмн. Нег күн хол хаалһд һарад йовҗ йовад, эврәннь герән зарцнртан даалһад, цугтаднь көдлмш өгнә. Үүднә өөр зогсдг зарцдан болхла, нүдән төрүц бичә чирмтхә гиҗ закна.

³⁵Саг-сергг бәәтн! Юңгад гихлә, Герин Эзиг кезә ирхинь тадн медҗәхшт: Эр така хәәкрлһнлә эс гиҗ өрүн өрлә, асхндан чигн эс гиҗ сөөни өрәл чигн ирх.

³⁶Эс күләҗәсн цагла ирәд, тадниг унтҗатл олҗ авдг болвза.

³⁷«Саг-сергг бәәтн!» — гиҗ тадниг болн цуг келн әмтиг саглулҗ бәәнәв.