Read kalabari Маркин бичсн Сән Зәңг 8 Bible Online

Маркин бичсн Сән Зәңг 8 - kalabari bible

Маркин бичсн Сән Зәңг 8

¹[1-2] Тер цагт Исусин өөр дәкн олн күн цуглрҗ ирв. Эднд иддг хот уга болҗ. Исус сурһульчнран дуудҗ авад:

³— Эн әмтнд Би санаһан зовҗанав. Һурвн өдрин дуусн бийләһән авсн хотан чилтл эдн Мини өөр бәәцхәв. Эдниг герүрнь хәрүлхлә, харһнад, хаалһан чигн дааҗ чадшго. Әмтнә зәрмнь ик хол һазрас ирцхәҗ, — гиҗ келҗ.

⁴— Иим эҗго һазрт альдас бидн тиим дала өдмг олҗ авхмб? — гиҗ сурһульчнрнь келцхәв.

⁵— Кедү кемҗән өдмг бәәнә? — гиҗ Исус сурв. — Долан бүкл өдмг, — гисн хәрү соңсв.

⁶Исус әмтиг суутха гив. Дарунь Бурхнд ханлт өргәд, тер өдмгәс хуһлад, сурһульчнртан өгв, теднь әмтнд түгәв.

⁷Цөөкн заһсн чигн олдв. Терүг бас Исус Бурхнд ханлт өргәд, түгәтхә гив.

⁸Удл уга цугтан цадв. Әмтн цадсна хөөн бас чигн долан савар дүүрң хот үлдв!

⁹Хот уусн цуг әмтнә тонь — дөрвн миңһ шаху күн болв.

¹⁰Исус әмтиг герүрнь тәвчкәд, оңһцд сууһад, сурһульчнртаһан Далманута гидг һазр орв.

¹¹Тенд паршмуд Исусур өөрдҗ ирәд, зүтквр эклҗ. Бурхна онц темдг үзүлтхә гиҗ тедн Исусас некҗ.

¹²— Яһад эдн онц темдг некдг болхв? Нег чигн онц темдг эн цагин улст үзүлшгов гиҗ Би таднд үнәр келҗәнәв, — гиһәд гүүнәр саналдҗ келв.

¹³Исус тедниг үлдәһәд, оңһцд сууҗ авад, нур һатлад йовҗ одв.

¹⁴Сурһульчнрнь цугтаднь күрх өдмг авч һархан мартчкҗ. Оңһц дотр негхн бүкл өдмг бәәҗ.

¹⁵Тер зуур Исус саглулҗ үг келҗ йовсмн: — Тадн паршмудын болн Херодын экнәс болһаҗ йовтн.

¹⁶Сурһульчнрнь хоорндан: — Өдмг уга болсн төләд Тер тиигҗ келв, — гиҗ күүндцхәв.

¹⁷Исус эдниг ю келҗәхинь медәд: — Юңгад өдмг эс авсндан зовҗахмт? Ода күртл юм медәд уга болвзат? Зүркнтн төмр-болд болҗ одсн болвза?

¹⁸Нүдтә бийнь — үзл уга, чиктә бийнь — соңсл уга бәәхмт? Тодлҗ авсн угайт?

¹⁹Тавн зүсм өдмгиг тавн миңһн күүнд хувасн цагла кедү сав өдмгин үлдл тадн цуглулҗ авлат? — гиҗ сурв. — Арвн хойр, — гиҗ сурһульчнрнь хәрү өгв.

²⁰— Долан өдмгәр дөрвн миңһн кү цадхахт, кедү сав хот үлдлә? — гиҗ Исус сурв. — Долан, — гицхәв.

²¹— Тиигсн бийнь юм медҗ авсн угайт? — гиҗ дәкн Исус сурв.

²²Бэтсадт ирәд бууцхав. Исус тал сохр кү көтлҗ авч ирәд, һаран күргтхә гиһәд эрцхәҗ.

²³Исус сохр күүг һараснь көтләд, хотнас авч һарад, нүднднь нульмчкад, терүнә толһа деер һаран тәвәд: — Юм үзҗәнчи? — гиҗ сурв.

²⁴Тернь эргндән хәләһәд: — Йовсн әмт үзҗәнәв: әмтн нанд модд болҗ үзгдҗәнә, — гиҗ келв.

²⁵Исус дәкн терүнә нүдн деер һаран тәвв. Тернь дәкәд эргндән хәләхлә, нүднднь харан орҗ. Ода тер күн тодрхаһар юм үздг болв.

²⁶Исус терүг герүрнь хәрүләд: — Эн хотнур хәрү бичә ор, — гив.

²⁷Исус сурһульчнртаһан Һалильяс һарад, Пилипин Кесәрья гидг һазрин кесг хот орв. Зууран Исус теднәс: — Олн әмтн Намаг кенд тоолҗана? — гиҗ сурв.

²⁸Сурһульчнрнь: — Зәрмнь Таниг уснд кирслдг Йохан гинә. Зәрмнь — Эльяд тоолҗана. Зәрмнь — хуучна әәлдәчнрин негнь гинә, — гиҗ хәрү өгв.

²⁹— Тадн Намаг кенд тоолҗанат? — гихлә. Пётр: — Та Бурхна илгәсн Аврач, — гив.

³⁰Исус энүнә тускар күүнд бичә келтхә гив.

³¹Исус сурһульчнртан: — Би, Күмни Көвүн, дала зовлң үзхв. Толһачнр, ах гелңгүд болн ном цәәлһәчнр Намар һә кеһәд алх. Болв һурвдгч өдртнь Би әмдрхв, — гиҗ келв.

³²Энүнә тускар Исус илднь келҗ өгв. Пётр Исусиг хооран дуудҗ авад хәрүцв.

³³Исус сурһульчнр талан хәләчкәд: — Эрлг, әрл цааран! Чи Бурхна санаһар биш, әмтнә санаһар бәәнәч, — гиҗ келв.

³⁴Дарунь Исус сурһульчнран болн талдан әмтиг дуудҗ авад келв: — Намаг даххар седсн күн эврәннь хаалһан үлдәһәд, кирсән авад, бийм дахтха.

³⁵Юңгад гихлә, әмән хармнсн күн, әмән геех. Зуг Мини төлә болн Сән Зәңгин төлә әмән өгсн күн — әмән харсҗ аврх.

³⁶Делкә эзлҗ авад, әмән геесн күн ямаран олзта үлдхмб?

³⁷Эврәннь әмән күн юуһар хулдҗ авхмб?

³⁸Эн килнцтә болн Бурхнд иткдго улс Намаг медхшв гиһәд, Мини келсн үгәс ичхлә, тер улсас Би чигн Эцкиннь туурмҗд элчнрән дахулҗ ирхләрн, эдниг медхшв гиһәд ичхв.