Read kalabari Маркин бичсн Сән Зәңг 9 Bible Online

Маркин бичсн Сән Зәңг 9 - kalabari bible

Маркин бичсн Сән Зәңг 9

¹— Би үнәр келҗәнәв, эн зогсҗасн улсин зәрмнь Теңгрин Йосн ирәд, күчән автл үкл үзшго, — гиҗ Исус аш сүүлднь келв.

²Зурһан өдр давсна хөөн Исус Пётр, Яков, Йохан һурвиг дахулад, уул давшв. Уул деер сурһульчнриннь нүднд Исус генткн хүврҗ одв.

³Энүнә хувцнь уһачксн цаһан өңгтә хувцнас цаһан болҗ одв.

⁴Дарунь Элья Моше хойр үзгдв. Тедн Исусла күүндснь медгдв.

⁵Пётр ю келхән эс медсн учрас: — Багш, энд маднд дегд сән, Танд, Моше, Элья һурвнд һурвн сег татхмн болвза? — гиҗ Исуст келв.

⁶Яһад гихлә, тер ю келхинь медсн уга. Учрнь: тедн һурвн дегд икәр сүрдцхәв.

⁷Дарунь үүлн эдниг бүркчкв. Үүлн дотрас: «Энтн хәәртә Көвүн Мини, Энүнә үгинь соңстн!» — гисн дун соңсгдв.

⁸Тиигхлә сурһульчнрнь төгәлңдән эргҗ хәләһәд, Исусас талдан кү үзҗ уга.

⁹Эн үзсн юман Күмни Көвүн үкәд әмдртл бичә күүнд келтхә гисн зәрлг, Исус эн сурһульчнртан уулас бууҗ йовад өгч.

¹⁰Энүнә тускар теднь талдан улст келҗ уга, зуг: «Үкәд әмдрхв» — гисн үгин утхинь медҗ авхар седәд, хоорндан күүндҗ.

¹¹Эн сурһульчнрнь Исуст иим сурвр өгч: — Элья түрүлҗ ирх зөвтә гиҗ юңгад ном цәәлһәчнр келцхәдв?

¹²— Чик, Элья түрүлҗ ирәд, цуг юминь белдх зөвтә. Бурхна Бичгт: «Күмни Көвүн дала зовлң үзәд дорацулгдх?» — гиҗ юңгад бәәхмб?

¹³Элья чигн ирләлм, терүнд әмтн эврәннь дурарн кесн бәәнәлм. Тиигҗ учрх зөвтә юмн Бурхна Бичгт бичәтә билә, — гисн хәрү сурһульчнрнь Исусас соңсв.

¹⁴[14-15] Хәрү ирәд тедн иим юм үзв: теднә үүрмүдлә закана багшнр зүткҗ бәәцхәҗ, хаҗуднь олн әмтн соңсад зогсҗ. Исусиг үзчкәд, әмтн өврмҗ кеһәд гүүһәд тосв.

¹⁵

¹⁶— Юуна тускар зүткҗәхмт? — гиҗ Исус сурв.

¹⁷[17-18] Цуглрсн улсас негнь: — Багш, би Танур көвүһән авч ирләв. Көвүһим хар сәкүсн эзләд, келн-амн уга кечкв. Хар сәкүсн энүг икәр зована: һазрур авад шивнә — көвүн харһцад унна, амнаснь көөсн һарад шүдән хәврнә, бәәсн бийнь менрҗ одна. Би Тана сурһульчнриг көвүнәсм хар сәкүс көөҗ һарһтха гиҗ сурлав, зуг эдн чадсн уга, — гиҗ келв.

¹⁸

¹⁹— Сүзг уга улс! Кезә күртл Би таднла бәәхмб? Кедү дәкч Би тадниг тесхмб? Көвүг нааран авч иртн! — гив.

²⁰Көвүг авч ирв. Исусиг үзчкәд, хар сәкүсн түүнә шүрүсинь татулв, амнаснь көөсн һарад, көвүн харһцад унв.

²¹[21-22] — Көвүнчнь кезә эклҗ гемтв? — гиҗ Исус сурв. — Бичкнәсн авн. Хар сәкүсн энүг һалд чигн, уснд чигн әмнь авхар седәд, авч шивнә. Буйн болтха, чадхла, хәәрләд нөкд болхнтн? — гиҗ эцкнь эрв.

²²

²³— Чадхла гисн үг юн болҗахмб? Итксн күн ю болв чигн чадх зөвтәлм, — гиҗ Исус келв.

²⁴— Иткҗәнәв! Итклм батрулыт! — гиһәд хәәкрәд, эцкнь сурҗ эрв.

²⁵Әмтн олар цуглрҗ бәәхинь үзәд: — Күүг соңсдго, келдго болдгар кегүлдг хар сәкүсн, һарч әрл эн көвүнәс, энүнә дотр дәкч ордг болвзач гиҗ Би чамд закҗанав! — гиҗ Исус закв.

²⁶Хар сәкүсн хәәкрәд, көвүнә шүрүсинь татулад һарч одв. Көвүн әмн уга күүнлә әдл кевтв. Хурсн әмтн терүг үкҗ одв гиһәд шимлдцхәв.

²⁷Исус өөрдҗ одад, көвүг һараснь авад босхв. Көвүн босад зогсв.

²⁸Исусиг герүр орхла, сурһульчнрнь әмтнәс онц үлдәд: — Бидн тер хар сәкүсиг юңгад эс көөҗ чадсмб? — гиҗ сурв.

²⁹— Тиим хар сәкүсдиг зальврҗ эс көөхлә, талданар көөҗ болшго, — гиҗ хәрү өгв.

³⁰Исус сурһульчнртаһан бәәсн һазрасн һарад, Һалилья һазрар дәврәд йовв. Исус йовсн хаалһан әмтнд медүлл уга бәәхәр седҗ.

³¹— Намаг, Күмни Көвүг, әмтн бәрүлҗ өгәд алулх болв һурв хонад Би әмдрхв, — гиҗ Исус сурһульчнран сурһв.

³²Сурһульчнрнь Энүг юуна тускар келҗәхинь медсмн биш. Сурхар седв чигн әәһәд сурҗ уга.

³³Исус сурһульчнртаһан Капернам балһснд ирҗ: — Нааран йовҗ йовад тадн хоорндан юуна тускар зүтквт? — гиһәд Исус герт орхларн сурһульчнрасн сурҗ.

³⁴Тедн дундас хамгин алдрнь кен болхв гисн зүтквр һарсн бәәҗ. Тегәд эмәһәд сурһульчнрнь тагчг бәәҗ.

³⁵Исус сууһад, арвн хойр сурһульчнриг дуудад: — Түрүңкнь болхар седснь — сүүлңкнь болад, наадксиннь зарцнь болтн, — гиҗ Исус келв.

³⁶[36-37] Исус бичкн үриг авад, тедн дунд зогсав. — Бичкн үриг Мини нернә төлә орулҗ авснь Намаг орулҗ авх, Намаг авснь Намаг йовулсинь орулҗ авх, — гиһәд бичкн үриг теврәд келв.

³⁷

³⁸Йохан иигҗ Исуст келв: — Багш! Бидн Тана нерн деерәс хар сәкүсдиг көөҗәсн кү үзләвидн. Бидн терүг хөрәд зогсалавидн, юңгад гихлә, тер маднла йовхш, — гиҗ Йохан Исуст келв.

³⁹— Бичә хөртн. Мини нерн деерәс өвәрц юм һарһсн күн Намаг тер дарунь му келҗ чадшго.

⁴⁰Маднла эс сөрүцснь — маднла бәәхнь мөн.

⁴¹Мини нер зүүҗәх таднд уух ус өгсн күн ачан геешго.

⁴²Эн Нанд иткҗәх бичкдүдин негинь килнцд уңһасн күүнд күзүндән теермин чолута теңгст хайгдсн деер болх.

⁴³[43-44] Кемр тадна һартн килнцтә үүл һарһхла, һаран тәәрчктн. Хойр һартаһан мөңк һалд тусснд орхнь өрәсн һартаһан Теңгрин Йоснд орсн деер болх.

⁴⁴

⁴⁵[45-46] Кемр тадна көлтн килнцд уңһахар седхләнь көлән тәәрчктн. Хойр көлтәһән мөңк һалд хайгдснд орхнь өрәсн көлтәһән мөңк җирһлд орсн деер болх.

⁴⁶

⁴⁷Кемр нүднтн тадниг килнцд уңһахар седхләнь нүдән сохлчктн. Хойр нүдтәһән мөңк һалд тусснд орхнь нег нүдтәһән Бурхна Йоснд орсн деер болх.

⁴⁸Мөңк һалд туссн күн мөңкинд засгдх, мөңкинд зовлңгнь чилшго.

⁴⁹Кен чигн күн һалар әрвслгдх.

⁵⁰Давсн сән юмн. Зуг давсн амтан геехлә, кен түүнд амт орулхмб? Бийәсн давсна амтынь гел уга, нег-негнләһән ни-негн эвтәһәр бәәтн, — гиҗ Исус келв.