Read kalabari Лукан бичсн Сән Зәңг 1 Bible Online

Лукан бичсн Сән Зәңг 1 - kalabari bible

Лукан бичсн Сән Зәңг 1

¹Күндтә Төпил! Мадн дунд учрсн йовдлмудын тускар кесг улс келврмүд бичҗ тогтав.

²Эн йовдлмудыг эклцәс авн үзсн улс болн Сән Зәңг тархачнр маднд келҗ өгцхәв.

³Иим учрар би бас цугинь эклцәснь авн нәрнәр шинҗләд, дигләтә келвр Таднд бичҗ өгхәр шиидв.

⁴Урднь дассн юмн үнн болдгиг лавтаһар батлҗ медхит гиҗ би Таднд бичҗәнәв.

⁵Херод хан Йудья нутгт залдг цагла Абья гелңгин селгәнә багас Зехарья гидг гелң бәәсмн. Терүнә авальнь Ахарона тохмин Елизавета гидг нертә күүкд күн бәәсмн.

⁶Тедн хоюрн Деед Эзнә чирәд чик седклтә улс болад, Бурхна зааврмуд болн герәсд алдлго күцәдг бәәсмн.

⁷Зуг Елизавета күср [1] бәәсн учрас тедн үрн уга бәәҗ. Хоюрн зөвәр наста улс бәәҗ.

⁸Нег дәкҗ Зехарья һол сүмд гелң болҗ церглҗәҗ. Терүнә гелңгүдин багин дарани көдлҗәх цаг бәәсмн.

⁹Күҗ уңһтхахин төлә җирв хайдг бәәҗ, тегәд җирвәр Зехарья сүмд күҗ уңһтхах зөвтә бәәсмн.

¹⁰Күҗ уңһтхасн цагт сүмин һаза кесг әмтн зальврад зогсцхав.

¹¹Генткн Зехарьян өмн Деед Эзнә элч зогсснь үзгдв. Тер күҗ уңһтхадг ширән барун бийд зогсҗасн бәәҗ.

¹²Терүг үзәд, Зехарья чочад үүмәд одв.

¹³Болв Бурхна элч: — Зехарья, бичә ә! Бурхн чини зальврсиг соңсв. Елизавета гидг авальчнь чамд көвү һарһх. Чи терүг Йохан гиҗ нерәдхич.

¹⁴Тер чамд ик байр өгх. Кесг улс терүг төрхлә, байрлх.

¹⁵Деед Эзнә чирәд алдр күн болҗ, әрк-чаһр амсдго, төрснәс авн Әрүн Сәкүстә күн болх.

¹⁶Израиль улсин ик зууһинь теднә Деед Эзн Бурхн тал тер хәрү йовулҗ,

¹⁷Терүнә өмн йовҗ, Эльян әәлдәчин Сәкүстә болн күчтә болх. Эцкнрин седклинь үрдүдтнь өөрдүлҗ, соңхсвр уга әмтиг чик хаалһд хәрү орулҗ, Деед Эзиг ирхин өмн келн-әмтиг белдх, — гиҗ Зехарьяд келв.

¹⁸— Яһҗ би Тана келсиг иткхмб? Би ода дегд көгшнлм, авальм бас зөвәр наста, — гиҗ Зехарья Бурхна элчәс сурв.

¹⁹Бурхна элч хәрүднь: — Би Бурхна өмн зогсҗасн Габрильв. Чамла күүндхин төлә, эн байрта зәңг авч ирхин төлә, намаг илгәсмн.

²⁰Болв цагтан күцх мини үгд чи итксн угач. Цуг эн учртл чи үг келҗ чадшгоч, — гиҗ келв.

²¹Тер цагт әмтн Зехарьяг һаза күләҗәцхәлә, терүг сүмәс һарлго, удан бәәсн учрас тедн алң болцхав.

²²Зехарья сүмәс һарад, әмтнд үг келҗ чадсн уга. Терүг үзгдл үзсинь цуһар медв. Келн уга болад, Зехарья әмтнлә докъяһар күүндв.

²³Зехарьян цергллһнә цаг төгсхлә, тер герүрн хәрәд йовв.

²⁴Удл уга терүнә авальнь Елизавета үр тееһәд, түрүңк тавн сард һаза һарлго гертән суув.

²⁵— Эн Деед Эзнәс! Тиим насндм Деед Эзн намаг хәәрләд, әмтнә чирәд нерм цеврдүлв, — гиҗ Елизавета келв.

²⁶Елизавета үрән гесндән тееһәд, зурһан сар давсна хөөн Габриль гидг элчиг Бурхн Һалильян Назарет хотнур нег окн күүкнүр йовулв.

²⁷Тер күүкн Давид уңг-тохмин үй Йосип гидг күүнә келсн күүкн бәәҗ. Мирьям гидг нертә бәәҗ.

²⁸Бурхна элч терүнүр ирәд: — Әдстә күүкн, менд! Деед Эзн чамта хамдан! — гиҗ келв.

²⁹Эн үгмүдиг соңсад, Мирьям үүмәд одв. Тер келсн үгинь медҗ чадлго ухалад бәәв.

³⁰Бурхна элч цааранднь келв: — Бичә ә, Мирьям! Бурхн чамаг хәәрлҗәнә!

³¹Чи гесндән үр тееһәд көвү һарһхич! Исус гидг нер өгхич.

³²Терчн Алдр күн болад, Деед Бурхна Көвүн гидг нер зүүх. Терүнә өвк Давидин ширәг Деед Эзн Бурхн Терүнд өгх.

³³Яковин үлдл тохм Тер мөңкиндән залх. Терүнә йосн төрүц чилшго.

³⁴— Ода тана келсн яһҗ учрхмб? Би хәрд һарад уга күүкнлм? — гиҗ Мирьям сурв.

³⁵Бурхна элч иим хәрү өгв: — Әрүн Сәкүсн чини деер бууһад, Деед Бурхна күчәр чи дүүрхич. Эн учрар чамас һарсн үрн әрүн болх. Тер Бурхна Көвүн гиҗ нерәдгдх.

³⁶Чини садн Елизавета гидг күүкд күн наста болвчн бас көвү һарһх. Терүг цуһар үр-сад һарһдго күүкд күн гиҗ келдг билә, зуг терчн үр тееһәд, зурһан сар болчкв.

³⁷Бурхн цугинь кеҗ чадна.

³⁸— Би Деед Эзнә заасинь күцәх зарцв. Тана келсәр болтха! — гиҗ Мирьям хәрү өгв. Бурхна элч цааран йовв.

³⁹Мирьям удл уга бийән белдәд, Йудья гидг уулта һазрт бәәсн балһснур адһҗ йовв.

⁴⁰Тиигәрән ирәд, Мирьям Зехарьян герт орад Елизаветла мендлв.

⁴¹Елизавета Мирьямиг мендлҗәхинь соңсхлань, дотрнь бәәсн үрнь көндрв. Елизавета Әрүн Сәкүсәр дүүрв.

⁴²Елизавета: — Күүкд улсин дундас чи онц әдстә күнч, чини дотр бәәсн үрн әдстә!

⁴³Деед Эзнә эк нан тал ирдгт би юн ачта күн болҗахмб?

⁴⁴Чини ду соңсхлам, дотрм бәәсн үрм байрлад көндрв.

⁴⁵Деед Эзнә келсн үгмүд бүтх гиҗ итксн күүкд күн буйн кишгтә! — гиҗ чаңһар келв.

⁴⁶Мирьям иигҗ келв: — Мини седклм Деед Эзнд магтал өргҗәнә!

⁴⁷Сүмсм мини Аврач Бурхнд байрлна!

⁴⁸Яһад гихлә, Тер Эврәннь зарцин номһн бәәдлиг үзв! Эн цагас авн орчлңгин тохм болһн намаг кишгтә гих!

⁴⁹Учрнь: Күчтә Бурхн мини төлә алдр үүл күцәв. Терүнә нерн әрүн болтха!

⁵⁰Терүг күндлдг күүг үйәс үйд хәәрлнә!

⁵¹Бурхн Эврәннь һарарн күчтә үүлмүдиг үзүлв! Омгта улсиг Тер ухалсн зуратаһинь тарав!

⁵²Деер суусн ахлачнриг ширәһәснь көөҗ хольврулв! Дорацулгдсн улсиг деегшлүлв!

⁵³Өлссн, харһнсн улст сә кеҗ өгв. Байн әмтиг юмн угаһар йовулв!

⁵⁴Хәәрлтин тускар тодлад, зарцдан эс гиҗ Израиль әмтндән тус күргхәр ирв.

⁵⁵Эн хәәрлт мана өвкнрт: Абрахамд болн терүнә үрдүдт оньдиндан күргнәв гиҗ үгән өгв.

⁵⁶Мирьям Елизаветин герт һурвн сар шаху гиичләд, герүрн хәрҗ одв.

⁵⁷Елизаветин гиигрх цагнь ирәд, тер көвү һарһв.

⁵⁸Хам-хоша бәәсн әмтн, элгн-саднь терүг Бурхн тиим кевәр хәәрлсинь соңсад, цуһар байрлцхав.

⁵⁹Нәәмдгч өдртнь тедн нилх көвүһән керчүлхәр ирв. Эцкиннь нерәр Зехарья гиҗ тедн көвүг нерәдхәр седв.

⁶⁰Зуг экнь зөвшәрл уга иигҗ келв: — Уга. Энүнә нерн Йохан болг.

⁶¹Тиигхләнь цуһар: — Танахна тохмд тиим нертә күн угалм! — гиҗ келцхәв.

⁶²Тегәд тедн эцкнь көвүндән ямаран нер өгхәр бәәхинь медхәр, Зехарьяс докъяһар сурцхав.

⁶³Зехарья харһа сурҗ авад, «Энүнә нернь Йохан» гиҗ бичв. Цуһар икәр өврцхәв.

⁶⁴Тер кемлә Зехарьят келн орв. Тегәд Бурхиг магтад тер үг келв.

⁶⁵Өөрнь бәәсн әмтн энүг үзәд, дегд икәр сүрдцхәв. Эн зәңг өөдм һазрта Йудья нутгар тархагдв.

⁶⁶Энүг соңссн цуг улс эн зәңгиг зүркндән тодлҗ: — Эн үрн кен болхмб? — гиҗ сурцхав. Бурхна күчн терүнд бәәсмн.

⁶⁷Нилхин эцкнь Зехарья Әрүн Сәкүсәр дүүрч:

⁶⁸— Израилин Деед Эзн Бурхн тууртха! Тер маднд дөң болад, сулдхвр өгв.

⁶⁹Зарц Давидин бүләс алдр Аврачиг маднд илгәв.

⁷⁰Бурхн Эврәннь әрүн әәлдәчнрин дууһар Терүнә тускар зәңглҗ келв.

⁷¹Тер мадниг өшәтнрәс аврҗ, маднд дурго улсас харсҗ авх.

⁷²Бурхн мана өвк экцнриг хәәрлхв гиҗ үгән өгәд,

⁷³[73-74] өшәтнрин һарас тадниг харсҗ авхв гиҗ Абрахамд андһарлҗ келв.

⁷⁴

⁷⁵Әрүн болн чик седкләрн Терүнә өмн йовҗ, бидн Терүнә чирәд наснаннь туршартан юмнас әәлго церглхвидн.

⁷⁶Чи, көвүн минь! Деед Бурхна әәлдәч болҗ йовхич. Деед Эзнә хаалһинь белдхәр өмннь йовхич.

⁷⁷Килнцтн тәвгдхлә, әмән аврҗ чадхит гисн медрл Бурхна улст өгхич.

⁷⁸Мана Бурхн дурарнь хәәрлтәрн герлтҗ, теңгрәс өрүни гегә илгәх,

⁷⁹үклин үлмәд бәәдг харңһуд суусн улст герл өгәд, эвин хаалһ зааҗ үзүлх, — әәлдҗ келв.

⁸⁰Нилх көвүн Сәкүсндән батрад өсв. Израилин әмтнд үзүлгдхин цаг иртл, тер эҗго көдәд бәәв.