Read kalabari Лукан бичсн Сән Зәңг 10 Bible Online

Лукан бичсн Сән Зәңг 10 - kalabari bible

Лукан бичсн Сән Зәңг 10

¹Энүнә хөөн Исус дәкәд далн хойр сурһульчнриг шүүҗ авад, хошадар Бийәсн өмн илгәв. Тедн хотн болһнд орад, Исус йовх һазрар йовх зөвтә бәәҗ.

²Тер сурһульчнртан: — Хурах урһц дала, көдлмшчнр баһ. Урһсн урһц хурах көдлмшчнриг илгәтхә гиҗ хадлһна Эзнд зальвртн! — гиҗ келв.

³— Йовтн! Хәләтн, Би тадниг олн чонмудын дунд бәәх хурһдыг илгәҗәсн мет илгәҗәнәв.

⁴Кетчән, түңгрцгән, селх буршмган бичә автн. Зууран харһсн әмтнлә бичә мендлтн.

⁵Күүнә герт орн түрүләд: «Тана гер бүлтн амулң менд бәәтхә», — гиҗ келтн.

⁶Кемр тер герт эвтә күн бәәхлә, эв терүнд өггдх, кемр эв уга болхла, «амулң менд бәәтн» гиснтн таднур хәрү ирх.

⁷Тер герт гиичлтн. Өгсн хотынь идтн, уутн, юңгад гихлә, көдлмшч эврәннь көдлмшин ашинь эдлх зөвтә. Гер болһниг соляд бичә йовтн.

⁸Тана ирсн ямаран чигн хотнд тадниг герүрн күн орулхла, өгсн хотынь уутн.

⁹Тенд гемтә әмтиг эдгәтн. Бурхна йосн таднур өөрдв гиҗ келтн.

¹⁰Кемр ямаран чигн хотнд тадниг герүрн күн эс орулхла, тер хотна уульнцсар йовҗ йовад:

¹¹«Мана тавгт наалдсн тана хотна шораһитн бидн саҗад, таднд хәрү өгчәнәвидн. Тер бийнь медтн, Бурхна йосн өөрдв!» гиҗ келтн.

¹²Би таднд келҗәнәв, тер өдр Содом балһснас дор тер хотнд болх.

¹³Хоразина әмтн, зовлңган эдлхит! Бетсәдин әмтн, басл зовлңган эдлхит! Танад учрсн Бурхна өвәрцс Тирин әмтн болн Сидона әмтн үзсн болхла, тедн кезәнәһә хар хувц өмсәд, толһадан үмс цацад, килнцтә җирһлән үлдәх билә.

¹⁴Тер учрар Зарһин өдрт Тирәс болн Сидонас дор таднд му болх.

¹⁵Чи, Капернам, чамаг теңгрт өргх гиҗ санҗанчи? Уга, чи үклин һазрт тусхич!

¹⁶Тадниг соңссн күн Намаг чигн соңсна, болв тадниг һолснь Намаг һолна. Намаг һолсн күн Намаг илгәсн Бурхиг һолна, — гиҗ Исус келв.

¹⁷Далн хойр сурһульчнр байрлад, Исус тал ирцхәв. — Деед Эзн! — гиҗ тедн келв, — мадниг Тана нерн деерәс зәрлг болхла, хар сәкүсд чигн мана үгд орна.

¹⁸Исус иим хәрү өгв: — Би эрлгиг үзләв. Тер цәкллһн мет теңгрәс унла.

¹⁹Бийдән хорлтан угаһар хорта моһа болн чим хорха ишкх, өшәтнә чидлиг дааҗ диилх йос Би таднд өгв.

²⁰Зуг хар сәкүсд тадна медәнд орҗана гиҗ байрлхин ормд тадна нерд теңгрт бичәтә гиҗ байрлтн.

²¹Исус Әрүн Сәкүснә байрар дүүрәд келв: — Теңгрин болн һазрин Эзн, Аав Минь! Би Танд магтал өргҗәнәв! Та энүг цецн ухата, сурһульта әмтнәс нууһад, эгл бичкдүдт секҗ цәәлһүт! Аав минь, цуг энүнд Тана цаһан саната дурна нилч үзгдҗәнә.

²²Теңгрин Эцкм цугинь Нанд даалһв. Эцкәс даву Көвүг кен болдгиг кен чигн күн медхш. Көвүнәс даву Эцк кен болдгиг кен чигн күн медхш. Болв Көвүн Эцкин тускар күүнд медүлхәр седхлә, тернь Эцкиг меднә.

²³Цааранднь Тер эврәннь сурһульчнр тал хәләһәд, шишлң теднд иигҗ келв: — Тана үзсн юмиг үзсн нүдн буйн-кишгтә!

²⁴Би таднд келҗәнәв, кесг әәлдәчнр, кесг хаадуд тана үзсн цуг юмиг үзхәр седлә, зуг үзсн уга, тана соңсҗах юмиг соңсхар седлә, зуг соңсҗ чадсн уга.

²⁵Нег закана багш өмәрән һарад, Исусиг сөрхин төлә иим сурвр өгв: — Багш, мөңк җирһл авхин төлә би ю кех зөвтәв?

²⁶— Заканд юн бичәтә? Чи тенд ю умшвч? — гиҗ Исус хәрүднь сурв.

²⁷Тер иим хәрү өгв: — Эврәннь Бурхндан әрүн седкләрн, үнн зүркәрн, бәәсн күчәрн болн бәәсн уха-санаһарн дурта бол, өөрк күүндән бийдән дурта кевәр дурл, — гиҗ бичәтә.

²⁸— Чи чикәр хәрү өгвч. Тиигәд ке, тиигхлә чи әмд бәәхич, — гиҗ Исус келв.

²⁹Зуг закана багш бийән цеврлхәр седәд: — Мини хаҗудк күн гисн кемб? — гиҗ сурв.

³⁰Исус хәрүднь иигҗ келв: — Нег күн Ерусалимас Ерихо хотнур йовҗ. Зуурнь терүнд деермчнр харһв. Тедн тер күүнә хувц-хунринь булаҗ авад, бийинь үкн гитлнь цокҗ-цокҗ хаяд йовҗ одцхав.

³¹Энүнә дару тер хаалһар нег гелң йовҗ, тер күүг үзәд, хаҗудк хаалһар һарад йовҗ одна.

³²Тиим кевәр чигн Левихнә күн кев. Тер бас тер ормд күрәд, шавта күүг үзәд, хаҗудк хаалһар һарад йовҗ одҗ.

³³Тер хаалһар йовсн Шамарьян һазра күн болхла тер күүнлә харһлдн үзәд санань зовв.

³⁴Зовҗах күүнд өөрдәд, шавинь тосар болн чаһрар уһаҗ, цевр кенчрәр боов. Цааранднь шавтсн күүг элҗгн деерән суулһад, гиичлүрүр авч ирәд, тендән килмҗән күргв.

³⁵Маңһдуртнь Шамарьян күн һарч йовад, гиичлүрин эзнд хойр өдрин җалвинь өгәд: «Энүнд килмҗән өгтн, кемр эн мөңгн эс күрхлә, би хәрү ирхләрн дәкәд мөңг өгнәв», — гив.

³⁶Эн һурвн әмтнәс, тана санаһар, зовҗах күүнд кень хамгин өөрхн болв? — гиҗ сурв.

³⁷Закана багш: — Терүг хәәрлсн күн өөрхн болх, — гив. Тиигхлә Исус терүнд: — Чи йовад бас тиигҗ ке, — гив.

³⁸Зууран Исус сурһульчнртаһан нег хотнд одв. Тенд Марта гидг нертә күүкд күн ирҗ тедниг гертән орулв.

³⁹Тер Мирьям гидг дү күүктә бәәсмн. Мирьям Исусин көлднь сууһад, цуг келсн үгмүдинь соңссн бәәҗ.

⁴⁰Марта болхла ик дала хот кехәр сахняд үүмҗәҗ. Тер Исус тал өөрдәд: — Тана зергәс! Мини дү күүкм цуг көдлмшиг нанд даалһсинь Та гемшәҗәхшвт? Нан тал ирәд, нөкд болтха гиһәд терүнд келхнтн, — гиҗ сурв.

⁴¹[41-42] — Марта, Марта, чи дала юмн бәәтхә гиҗ сахняд үүмәд бәәнәч, зуг чамд негхн юмн кергтә. Мирьям болхла бийдән хамгин сәәнинь йилһҗ авв. Энүгинь күн булаҗ авч чадшго, — гиҗ Исус хәрү өгв.