Read kalabari Лукан бичсн Сән Зәңг 11 Bible Online

Лукан бичсн Сән Зәңг 11 - kalabari bible

Лукан бичсн Сән Зәңг 11

¹Нег дәкҗ Исус нег һазрт зальврсн бәәҗ. Терүг зальврсна хөөн сурһульчнрин негнь Исусас: — Деед Эзн! Йохан эврәннь сурһульчнран яһҗ зальврҗ дасхла, тиим кевәр Та мадниг дасххнтн! — гиҗ сурв.

²[2-4] Исус теднд: — Иигҗ зальвртн: Мана Аав! Нернтн әрүн болтха! Тана йосн иртхә! Эркн кергтә өдмгиг Өдр болһн илгәһит! Яһҗ бидн күүнә килнц тәвнәвидн, Тиигҗ мана килнц тәвит! Сөрдг юмнла бичә харһулыт! — гив.

⁴

⁵Цааранднь Исус теднд: — Үлгүрләд келхлә, таднас негнь эврәннь үр талан сөөни өрәллә ирәд келҗәнә: «Үр минь, һурвн өдмг нанд өгйәһәр өгич.

⁶Үүрм йовҗ йовад, зууран орҗ ирв, болв терүг тоох хот нанд уга».

⁷Тиигхлә тана үүртн: «Бичә намаг көндә. Үүдм хаалһата, би күүкдән унтулчклав. Босҗ чамд өдмг өгч чадшгов», — гиҗ хәрү өгнә.

⁸Үүртн танла үүрлҗәсндән тана сурсиг босад эс өгв чигн, зуг тана давтад сурсн зүткмҗд тер босад сурсн юмитн өгх.

⁹Тегәд чигн Би таднд келҗәнәв: Сурад бәәтн — сурситн өгх, хәәһәд бәәтн — хәәсән олҗ авхит. Үүдинь цокҗатн — таднд тәәлҗ секх.

¹⁰Сурад бәәсн күн — сурсан авчана. Хәәһәд бәәснь — хәәсән олҗана. Үүд цокҗаснд — тәәлҗ секҗәнә.

¹¹Көвүнтн заһс сурхла, үрндән заһсна ормд хорта моһа өгх эцк тана дунд олдхий?

¹²Көвүнтн өндг сурхла, ямаран эцк терүнд чим хорха өгх?

¹³Кемр тадн килнцтә бәәввчн, эврәннь үрндән сән белг яһҗ өгхинь меднәт, тиигәд чигн тана Теңгрин Эцк Әрүн Сәкүсиг сурсн әмтнд өгх, — гив.

¹⁴Нег дәкҗ Исус күүг келн уга кедг хар сәкүсиг нег күүнәс һарһҗ көөв. Хар сәкүсн һархла, тер күн үг келдг болв. Цуглрсн әмтн алң болцхав.

¹⁵Зәрмснь: «Эн хар сәкүснә нойна Баал-Зебүлин [4] күчәр хар сәкүсдиг көөнә» гиҗ келв.

¹⁶Зәрмснь Исусиг сөрхин төлә теңгрин онц өвәрц темдгүд үзүл гиҗ сурцхав.

¹⁷Исус теднә уха-санаһинь медәд: — Дотран дәәлддг алвт болһн хоосрад ирх. Дотран таардго гер бүл болһн әңгрәд буурад одх.

¹⁸Кемр эрлг бийләһән дәәллдхлә, терүнә йосн нутг яһҗ торч бәәхмб? Тадн Намаг Баал-Зебүлин күчәр хар сәкүсдиг көөҗәнә гиҗ келҗәнәт.

¹⁹Кемр Би Баал-Зебүлин күчәр хар сәкүсдиг көөхлә, тана сурһульчнр ямаран күчәр тедниг һарһҗ көөҗәхмб? Тер учрар тана сурһульчнр тана зарһчнр болтха!

²⁰Кемр Би хар сәкүсдиг Бурхна һарар көөҗәхлә, Бурхна йосн тадн тал ирснь лавта мөн.

²¹Кемр ик чидлтә болн зер-зевтә күн эврәннь герән харҗ хәләхлә, терүнә өлг-эднь әәмшг уга һазрт бәәнә.

²²Зуг кемр терүнәс ик чидлтә күн дәврәд, эзинь дәәләд, эзнә нәәлсн зер-зевинь булаһад диилхлә, геринь тонад, өлг-эдинь хулхалҗ авх.

²³Нанта эс бәәсн күн Нанта сөрүд бәәнә, Нанта хурадго күн тарана.

²⁴— Хар сәкүсн күүнә дотрас һарн хагсҗ одсн көдә эргәд, амрх орм хәәнә, зуг олхш. Тиигхлә тер: «Урдк бәәсн герүр би хәрү йовнав», — гинә.

²⁵Терүг хәрү ирхләнь, гернь сәвүрдсн, цевр болна.

²⁶Тегәд хар сәкүсн һарч йовад, бийәсн ик догшн долан хар сәкүсдиг дахулҗ авч ирнә. Тедн ирәд күүнә дотр бүүрлнә. Аштнь күн урдкасн үлү му бәәнә, — гив.

²⁷Исусиг тиигҗ келҗәсн цагла нег күүкд күн олна заагас: — Таниг һарһад өсксн эктн буйн-кишгтә! — гиҗ хәәкрв.

²⁸— Бурхна үг соңсад күцәдг әмтн буйн-кишгтә! — гиҗ Исус хәрүднь келв.

²⁹Әмтн улм икәр хурцхав. Исус экләд келв: — Эн үйин әмтн хар саната. Эдн Бурхна онц темдг сурна, зуг әәлдәч Йонан темдгәс үлү талдан темдгүд теднд Бурхн өгшго.

³⁰Тер юңгад гихлә, ямаран кевәр Йона Ниневин әмтнд онц темдг болв, тиим кевәр Күмни Көвүн эн әмтнд онц темдг болх.

³¹Зарһин өдр өмн үзгин һазрин хатн эн цагин үйнртә босад, эдниг гемшәх. Юңгад гихлә, тер ик холас Соломон хаана цецн уха авхар ирлә. Энд болхла Соломонас ик алдр күн бәәнә.

³²Зарһин өдр Ниневин әмтн эн цагин үйнртә босад, эдниг гемшәх. Тедн Йона келсн үгинь соңсад, килнцтә җирһлән үлдәцхәв. Энд болхла Йонас ик алдр күн бәәнә.

³³— Кен чигн күн шам шатачкад әмтнд үзгдгго һазрт тәвхш, савар терүг бүркхш. Цуһар герл үзтхә гиһәд, шаман тәвц деер тәвнә.

³⁴Нүдн — күүнә шам мөн, кемр нүднчн цевр болхла, чи герләр дүүрхич. Кемр чини нүдн бузр болхла, чи таг харңһуһар бүркәтәч!

³⁵Болһатн! Тана дотрк герл харңһу болвза?

³⁶Тер төләд кемр чи герләр дүүрхлә, болв чини нег чигн мөч харңһуд эс бәәхлә, шам чамаг герлтулдг метәр чи герл өгхич, — гив.

³⁷Исус әмтиг сурһсн хөөн нег парш Терүг гер талан хот уулһхар дуудв. Исус герт ирәд, ширән өөр орм эзләд суув.

³⁸Терүг хотын өмн һаран эс уһасинь үзәд парш алң болв.

³⁹Зуг Исус терүнд: — Тадн паршмуд ааһ-савиг һазаһаснь арчнат, тадна дотрк болхла ховдг бәәдләр болн хар санаһар дүүрң!

⁴⁰Ухан уга әмтн! Һазакинь үүдәсн Үүдәч дотркинь чигн үүдәсн биший?

⁴¹Угатя-яду әмтнд бәәснәсн һуульһ өгтн, тиигхлә цуг юмнтн цевр болх.

⁴²Паршмуд, тадн зовлңган эдлхит! Тер юңгад гихлә, тадн тәрсн мятас, рутас [5] болн нань чигн ноһанас арвдгч хүвинь Бурхнд цуглулҗ өгнәт. Зуг Бурхна зарһиг болн дуриг кергтән авхшит. Талдан кергиг мартлго эн кергән күцәх зөвтәт.

⁴³Тадн зовлңган эдлхит, паршмуд! Юңгад гихлә, тадн хургин герт хамгин сән орм эзлнәт, талвңд әмтн таднла мендлхлә, тадн дурта болнат.

⁴⁴Тадн зовлңган эдлхит, юңгад гихлә, тадн эс темдглсн үкәрлә әдл. Терүг әмтн деерәснь ишкв чигн ю ишкҗәхән медхш, — гиҗ келв.

⁴⁵Закана багшнрин негнь: — Багш! Та иигҗ келәд мана тускар бас му келҗәнәт! — гив.

⁴⁶Исус хәрүднь: — Тадн закана багшнр бас зовлңган эдлхит! Юңгад гихлә, тадн әмтнә нурһнд дааҗ болшго аца тәвнәт, зуг бийстн теднд хурһан чигн көндәҗ нөкд болхар төрүц седхшит.

⁴⁷Тадн зовлңган эдлхит, юңгад гихлә, тадн әәлдәчнрт бумб тәвнәт, зуг тана өвк эцктн тедниг алдг билә.

⁴⁸Тадн эврәннь өвк эцкнриннь кесн үүллә зөвшәрҗәхән герчлҗәнәт: тедн әәлдәчнриг алдг бәәсмн, тадн болхла әәлдәчнрт бумб тәвнәт.

⁴⁹Бурхн цецн-ухаһарн иигҗ келсмн: «Би әмтнүр әәлдәчнриг болн апостолмудыг илгәнәв, зуг теднә зәрмнь алад уга кех, зәрмнь көөх».

⁵⁰Тегәд чигн нарт делкә үүдснәс авн цуг алгдсн әәлдәчнрин цуснд эн үйин әмтн бурута:

⁵¹Абелин цуснас экләд тәклин ширән болн Бурхна герин хоорнд асхрсн Зехарьян цусн күртл. Эн үйин әмтн энүнәс көлтә лавта тооцаһан өгх гиҗ үнәр келҗәнәв.

⁵²Закана багшнр, тадн зовлңган эдлхит, юңгад гихлә, тадн Бурхна номин медрлин түлкүр авлат. Тадн бийстн медрл угат, болв медрл хәәсн әмтнд оньдин харш болнат, — гиҗ келв.

⁵³Исусиг тендәс һарад йовсна хөөн закана багшнр болн паршмуд Терүнд уурлад, олн зүсн сурврмуд өгв.

⁵⁴Тедн Исусиг хавхлҗ бәрхәр седцхәв. Келсн үгәс тедн буру, эндү хәәв.