Read kalabari Лукан бичсн Сән Зәңг 12 Bible Online

Лукан бичсн Сән Зәңг 12 - kalabari bible

Лукан бичсн Сән Зәңг 12

¹Тер саамд кесг миңһн әмтн цуглрад, хоорндан шахлдад зогсҗасн цагт Исус сурһульчнртан экләд иигҗ келв: — Паршмудын искәдг экнәс бийән саглҗ йовтн, эннь чирә хәләлһн мөн.

²Нег чигн эс илдкҗ секгдсн далд юмн уга, нег чигн эс тәәлгдсн нууц уга.

³Харңһуд тана келсн үгмүд өдрин гегәнд соңсгдх, гер дотр күүнд шимлдҗ келсн үгмүд герин ора деер чаңһур хәәкрҗ соңсгдх, — гив.

⁴— Үүрмүд мини! Күүнә бий цогциг алдг әмтнәс бичә әәтн, цаарандан тедн энүнәс даву юм кеҗ чадшго, — гиҗ Би таднд келҗәнәв.

⁵Кенәс әәх кергтәһинь Би таднд келҗ өгсүв: Бурхнас әәтн, Тер тадна цогцитн алад, мөңк һалд чигн тадниг хайҗ чадх. Тиим гиҗ келҗәнәв. Бурхнас әәтн.

⁶Хойр деншгәр тавн богшурһа хулдгдна эсий? Зуг тедниг чигн Бурхн мартсн уга.

⁷Тадна толһан үсн чигн тоота! Бичә юмнас әәтн: Тадн Бурхнд кесг богшурһаһас даву үнтәт.

⁸— «Би Исусин» — гиҗ әмтнә чирәд ил келсн күүнә тускар «Мини» — гиҗ Бурхна элчнрин өмн Би, Күмни Көвүн, илднь келхв, — гиҗ таднд келҗәнәв.

⁹«Би Исусин бишв» гиҗ әмтнә чирәд иләр келсн күүнә тускар «Эн күн Мини биш» гиҗ Би Бурхна элчнрин өмн гөрдҗ келхв.

¹⁰Күмни Көвүнә өмнәс үг келсн күн болһна килнцнь тәвгдх. Зуг Әрүн Сәкүснә тускар му келсн күүнә килнцнь төрүц тәвгдшго.

¹¹Кемр хурлур тадниг һардачнрин болн йос бәрдг әмтнә өмн авч ирхлә, ю, яһҗ хәрүцхән, ю келхән сана бичә зовтн.

¹²Тер цагт Әрүн Сәкүсн таднд ю келхитн зааҗ өгх, — гив.

¹³Олна заагас нег күн Исуст: — Багш! Мини ахдм өнчән нанла хуватха гиҗ келтн, — гив.

¹⁴Исус: — Кен Намаг тадна зарһ кехин төлә эс гиҗ тадна өнч хувахин төлә тәвлә? — гив.

¹⁵Цааранднь бас немҗ: — Болһатн! Бичә хатуч болтн! Күүнә җирһлин чинрнь байн зөөрт биш, — гиҗ келв.

¹⁶Дәкәд әмтнд үлгүрләд келв: — Нег байн күүнә һазр ик урһц өгв.

¹⁷«Ода ю кехм болхв? Хураҗ авсн буудяг хадһлх орм чигн уга» гиҗ тер санв.

¹⁸[18-19] «Би эврәннь хуучн буудя хадһлдг бәәриг хамхлад, шин өргн бәәр кенәв. Тер өмнкәс ик болх, тенд буудя болн өлг-эд хадһлх орм дала болх. Ода чамд кесг җилмүдт күрх зөөр бәәнә. Ууһад, идәд, байртаһар амрад җирһәд бә гиҗ келҗ болҗана. Тиигхлә иигҗ кенәв» гиҗ тер шиидв.

¹⁹

²⁰Зуг Бурхн терүнд: «Ухан уга күн! Эн сө чини әмичн чамас булаҗ авх. Тиигхлә чини белдсн зөөрәс ямаран олз болхмб?» — гив.

²¹Кен чигн Бурхна зөөриг авлго, бийдән талдан зөөр хураһад хоршулад бәәхлә, тер ухан уга байнла әдл болна.

²²Цааранднь Исус эврәннь сурһульчнртан иигҗ келв: — Тегәд чигн таднд Мини келҗәхм эн: әмд бәәхин төлә хот кергтә гиҗ, бий цогцин төлә өмсх хувц-хунр кергтә гиҗ бичә зовад бәәтн.

²³Җирһл хотас деер, цогц болхла хувцнас деер.

²⁴Керә шовудыг хәләһәд ухалтн, тедн тәрә тәрхш, хадхш, буудя хураҗ хадһлхш, тер бийнь Бурхн тедниг теҗәнә. Тадн болхла Бурхнд эн шовудас ик үлү үнтә болҗанат.

²⁵Зовснас иштә тадн дундас кентн чигн әмн җирһлән бичкн зуур утдулҗ чадхий?

²⁶Кемр тиим баахн юмиг күцәҗ эс чадхла, ю хәәҗ тадн наадкиннь төлә зовад бәәнәт?

²⁷Бамб цецг яһҗ урһдгинь хәләһәд ухалтн. Эн көдлхш, утц ээрхш. Зуг Соломон хан ик алдр бәәсн бийнь тер цецгәһәс үлү сәәхн хувц өмсәд уга билә гиҗ Би таднд келҗәнәв.

²⁸Кемр Бурхн эндр урһад бәәдг, маңһдур һалд шатх урһмлыг тиигҗ кеерүлҗ хувц өмскхлә, тадниг баһ итклтә улсиг энүнәс деер хувцлхм бишви?

²⁹Ю идхмб, ю уухмб гиҗ бичә зовад санад бәәтн!

³⁰Килнцтә улс цуг энүнә төлә көөлдәд бәәнә, Теңгрин Эцктн таднд юн кергтәһинь сәәнәр меднә.

³¹Түрүн даранднь Бурхна йосиг хәәтн, наадкинь болхла таднд Бурхн немҗ өгх.

³²Мини цөөкн улс, бичә әәтн, тана Эцк таднд эврәннь орн-нутган өгх саната.

³³Эврәннь өлг эдән хулдад, мөңгән угатя-яду әмтнд хуваҗ өгтн. Төрүц элдго кетч белдтн. Чилшго үнтә зөөрән теңгрт хоршулҗ хадһлтн: тенд хулхач чигн күршго, гүр чигн терүг идҗ үрәҗ чадшго.

³⁴Тана зөөр бәәсн һазрт седкл-санантн бәәнә, — гив.

³⁵— Хувцнтн бүсләтә, шамтн шаталһата бәәтхә!

³⁶Хүрмәс эзән күләҗәсн зарцнрла әдл болтн. Эзнтн ирәд, үүд цокхла, тер дарунь үүдән секҗ чадх арһта болтн.

³⁷Эзнь ирәд, зарцнран серглң бәәсинь үзхлә, тер зарцнр буйн кишгтә! Би үнәр келҗәнәв, эзнь бийнь хувцан бүсләд, ширә деер хот тәвәд тедниг дуудад тоох.

³⁸Кемр сөөни өрәллә эс гиҗ терүнәс ора цагла ирсн эзн зарцнран белн бәәсинь үзхлә, тедн буйн кишгтә.

³⁹Дәкәд болхла кемр хулхач орҗ ирх цагинь герин эзн медхлә, тер дәврәд орсн хулхачиг герүрн тәвшго билә.

⁴⁰Тадн бас белн болтн, юңгад гихлә, Күмни Көвүн тадниг эс күләҗәсн цагт күрәд ирх, — гив.

⁴¹Пётр сурв: — Багш, Та эн үлгүриг һанцхн маднд аль цуг әмтнд келҗәнт.

⁴²Деед Эзн иим хәрү өгв: — Нәәлвртә цецн гер һарддг күн гисн кемб? Тиим күүнд эзн наадк зарцнрт цагтнь хотынь кемҗәһәр өгхиг даалһв.

⁴³Эзнь ирәд, зарциг тиигҗ кергән күцәҗәсинь үзхлә, тер зарц буйн кишгтә болх.

⁴⁴Би таднд үнәр келҗәнәв, эврәннь өлг-эдән чигн Эзн терүнд лавта даалһҗ өгх.

⁴⁵Зуг кемр зарц: «Мини Эзн кесгтән иршго» гиҗ санад, наадк зарцнриг, залу болн күүкд улсиг цокад, әркән ууһад, нәәрән кехлә,

⁴⁶тиим зарцин эзн терүг эс күләҗәсн өдрт, эс медҗәсн цагт ирх. Эзнь шүрүһәр терүг цааҗлад, иткл уга зарцнрин бәәх һазрур йовулх.

⁴⁷Эзнә таалыг медә бәәҗ, зуг бийән белддго болн таалынь күцәхәр седдго зарц өршәңгү угаһар цокулх.

⁴⁸Болв кемр эзнә таалыг медлго, зуг засглгдх йовдл һарһсн зарц баһар цокулх. Дала юм өггдснәснь икәр некгдх. Ик керг даалһгдснаснь икәр некҗ сургдх, — гив.

⁴⁹— Би орчлңд һал авч ирхәр ирләв. Тер шулуһар икәр падртха, гиҗ санҗанав.

⁵⁰Би кирслгдх зөвтәв, тегәд чигн тер керг эс күцтл зовҗанав.

⁵¹Тадн Намаг эн орчлңд эв авч ирв гиҗ санҗант? Уга! — гиҗ Би келҗәнәв. Би әмтиг йилһж салһхар ирв.

⁵²Эн цагас авн тавн күүтә гер-бүл хоорндан йилһрәд салх. Һурвнь хойрин өмнәс эс гиҗ хойрнь һурвна өмнәс босх.

⁵³Эцкнь көвүнә өмнәс, көвүнь эцкиннь өмнәс босх, экнь күүкнә өмнәс, күүкнь экиннь өмнәс, хадм экнь бериннь өмнәс, бернь хадм экиннь өмнәс босх, — гиҗ Исус келв.

⁵⁴Исус олн әмтнд иигҗ келв: — Нарн суух үзгт үүл үзхләрн, хур орх, гиҗ тадн келнәт, тегәд хур орна.

⁵⁵Өмн үзгин салькн үләхлә, тадн халун болх, гиҗ келнәт, — халун болна.

⁵⁶Хойр чирәтнр! Теңгр һазр хойриг шинҗлҗ хәләһәд, тадн ямаран өдр болхинь медҗ чаднат, болв ямаран цаг ода ирсинь тадн медҗ чадхшит.

⁵⁷— Тадн бийән шинҗлҗ хәләһәд, үннь юундв гиҗ юңгад эс ухалнат?

⁵⁸Өшәтнләһән зарһин герүр йовхларн, зууран тадн терүнлә эвинь олхан хәәтн эс гиҗ тер тадниг зарһчин медәнд өгх, зарһч тадниг харулын һарт бәрүлх, тедн болхла тадниг бәрәнд суулһх.

⁵⁹Үлдсн шаальг күртлән эс өгтл, тадн тер бәрәнәс сулдҗ һарч чадшгот, гиҗ Би таднд келҗәнәв, — гиҗ Исус келв.