Read kalabari Лукан бичсн Сән Зәңг 15 Bible Online

Лукан бичсн Сән Зәңг 15 - kalabari bible

Лукан бичсн Сән Зәңг 15

¹Алв цуглулдг болн килнцтә кесг әмтн Исусиг соңсхар ирцхәв.

²Паршмуд болн закана багшнр уурлад келцхәв: — Тер килнцтә әмтиг тосад, теднлә хот ууҗана.

³Тиигхлә Исус хәрүднь иим үлгүр өгв:

⁴— Үлгүрлхд, таднас кен чигн зун хөөтә болтха, тер зун хөөнәс негнь төөрәд геедрсн болтха. Йирн йисн хөөһән кеер үлдәчкәд, геедрсн хөөһән олтлан хәәҗ йовхит эсий?

⁵Тер хөөһән олҗ авад, байрлад, ээм деерән үүрәд,

⁶герүрн ирчкәд, үүрмүдиг болн өөрән бәәсн әмтиг дуудад иигҗ келхит: «Нанла хамдан байрлтн! Би геедрсн хөөһән олҗ авув!»

⁷Чик седклтә күн Бурхнас гемән сурх нанд керг уга, гиҗ ухална. Болв теңгрт чик седклтә йирн йисн күүнә төлә биш, зуг килнцтә җирһлән үлдәсн негхн күүнә төлә ик байр болх, — гиҗ келв.

⁸— Кемр күүкд күн арвн үнтә цаһан мөңгтә бәәһәд, негинь геехлә, тер мөңгән эс олтл шам шатаһад, мөңгән сәәнәр хәәһәд, герән сәвүрдхий?

⁹Зуг мөңгән олҗ авхларн, үүрмүдиг, хам хоша бәәсн күүкд улсиг тер дуудад, «Нанла хамдан байрлтн! Би геесн мөңгән олҗ авв» гиҗ келх.

¹⁰Тиим кевәр Бурхна элчнр килнцтә җирһлән үлдәсн негхн күүнә төлә чигн байрлцхах гиҗ Би таднд келҗәнәв, — гив.

¹¹Исус цааранднь келв: — Нег күн хойр көвүтә бәәҗ.

¹²Отхн көвүнь эцкдән ирәд: «Аав минь! Өнчин авнав, хүвм нанд өгхнтн?» — гинә. Тегәд эцкнь өнчән хуваһад, хойр көвүндән өгчкв.

¹³Цөөкн өдрин дару отхн көвүн өнчән авад ик хол орн-нутгур йовв. Тендән тер аля җирһләр бәәһәд, цуг мөңгән тоолвр угаһар эдләд чиләв.

¹⁴Зуг терүнә мөңгнь чилснә хөөн тер һазрт ик харһнлт болв. Көвүн дегд икәр түрв.

¹⁵Тер нутгин нег күүнүр көдлмш сурхар ирнә. Тернь эврәннь һазрт һахас хәрүлх көдлмш өгв.

¹⁶Көвүн һахад өгсн хотас чигн идхәр седв. Зуг нег чигн күн терүнд нег чигн юм өгдго бәәҗ.

¹⁷Серл орад тер иигҗ келв: «Мини эцкин герт кедү зарцнр бәәнә, цуһар дала хотта, би болхла энд харһнад үкчәнәв.

¹⁸Хәрәд эцкдән келнәв: Аав минь! Би Теңгрин болн тана өмн ик килнц һарһв.

¹⁹Тана көвүн гиҗ нерәдгдх нанд зөв уга, зуг намаг ода эврәннь зарц гиҗ тоолтн».

²⁰Цааранднь тер босад, эврәннь эцк талан йовв. Эцкнь терүг ик холас таняд, көвүндән санань зовад, гертәсн гүүҗ һарад, көвүһән күзүдәд теврҗ үмсв.

²¹Көвүн: «Аав минь! Би Теңгрин болн тана өмн ик килнц һарһв. Тана көвүн гиҗ нерәдгдх нанд зөв уга», — гив.

²²Эцкнь болхла зарцнртан: «Шулуһар йовад, хамгин сәәхн хувц авч ирәд, мини көвүндм өмсктн, Һарин хурһнднь үнтә билцг зүүһәд, көлднь буршмгинь өгтн.

²³Нег сән тарһн туһл авч ирәд алтн, хотан ууһад байр кехмн.

²⁴Мини көвүм әмд уга билә, ода тер шинәс әмдрв! Геедрҗ одсн билә, болв ода олдв!» — гиҗ келв. Дәкәд тедн ик байр кецхәв.

²⁵Ууһн көвүнь тер цагт кеер бәәҗ. Герүрн өөрдҗ ирәд, әмтнә биилсн, шуугсн ду, байрин айс соңсв.

²⁶Көвүн нег зарциг дуудад, гер дотр юн болҗахинь сурв.

²⁷«Чини дүүчн хәрҗ ирв» гиҗ тер хәрү өгв. «Көвүнь эрүл-менд ирснд эцкчн тарһн гидг туһл алв» — гив.

²⁸Ууһн көвүнь уурлад, герүрн орхар седсн уга. Тиигхлә эцкнь һаза һарад терүг: «Ор», гиҗ дуудв.

²⁹Зуг көвүнь: «Цуг эн җилмүдин туршт би мухла кевтәһәр энд көдлдг биләв, тана келсәр оньдин бәәдг биләв. Та болхла, намаг үүрмүдләһән байрлтха гиҗ, мини төлә ямана ишк чигн алсн угат.

³⁰Зуг эн көвүнтн аля күүкд улсла цуг тана мөңг эдләд чиләһәд, хәрү гер талан ирхлә, та терүнә төлә тарһн туһл алвт!» гиҗ келв. «

³¹Көвүн минь, Чи нанла оньдин бәәнәч, нанд бәәсн юмн чини.

³²Зуг ода бидн байрлх зөвтәвидн, тер юңгад гихлә, чини дүүчн үкәд әмдрв, геедрәд олдв!» — гиҗ эцкнь келв.