Read kalabari Лукан бичсн Сән Зәңг 17 Bible Online

Лукан бичсн Сән Зәңг 17 - kalabari bible

Лукан бичсн Сән Зәңг 17

¹Исус эврәннь сурһульчнртан: — Килнцд уңһах йовдл эркн биш учрх, зуг тиим йовдлыг кесн күн басл муулян эдлх.

²Кен чигн эн бичкдүдәс негинь килнцд уңһахла, тер күүнә күзүнднь теермин чолу бооһад, теңгст хайснь деер болх.

³Тегәд чигн бийән саглҗ йовтн! Кемр чини ахчн килнц кехлә, терүнд илднь кел. Кемр тер килнцтә җирһлән үлдәхлә, килнцинь тәв.

⁴Кемр тер чини өмнәс өдрт дола дәкҗ килнц кеһәд, дола дәкҗ чам тал хәрү ирәд бурутав гихлә, геминь тәв, — гив.

⁵Нег дәкҗ апостолмуд Деед Эзнәс: — Мана итклиг икдүлтн! — гиҗ эрҗ сурв.

⁶Исус иим хәрү өгв: — Кемр тана иткл горчсин экнлә әдл болхла, тадн эн инҗр моднд: «Бәәсн ормасн уңгарн суһлгдад, теңгсин уснд орҗ урһ» гиҗ келхлә, тер тадниг соңсх билә.

⁷Үлгүрлхд, танад һазр хаһлдг, эс гиҗ хө хәрүлдг зарц күн бәәнә. Түүг кеерәс ирхлә, тадн: «Ор, су, хотан у», гиҗ келхийт?

⁸Уга, тадн түрүләд: «Асхни хотан нанд белдәд, хувцан соляд, намаг хот ууҗатл, зарцин керг күцә, дәкәд хөөннь эврән хотан уухич», гиҗ келхит.

⁹Тадна зарц заасн юмиг күцәхлә, тадн терүнд ханҗанав, гиҗ келхийт?

¹⁰Тегәд тадн чигн бәәсн даалһвран күцәһәд: «Бидн зөв уга зарцнрвидн, зуг бидн даалһвран күцәввидн», гиҗ келтн.

¹¹Ерусалимур йовҗ йовад, Исус зууран Шамарья болн Һалилья хоорндк меҗәһәр йовсмн.

¹²Нег хотнд одхлань, Түүнд арсна хальдврта гемтә арвн күн харһв. Тедн хаалһин ца зогсад:

¹³— Исус Багш, мадниг хәәрлит! — гиҗ чаңһур хәәкрцхәв.

¹⁴Исус тедниг үзәд: — Йовад гелңгүдт бийән үзүлтн, — гив. Тедн йовн-йовҗ, зууран эдгв.

¹⁵Теднә негнь бийән эдгсинь үзәд, хәрү ирәд, Бурхнд магтал өргв.

¹⁶Тер Исусин көлднь унад, Терүнд ханлтан өргв. Гемтә күн Шамарьян келн-күн бәәсмн.

¹⁷Исус терүнәс: — Арвн күн эдгсн биший? Наадк йиснь яһсмб? — гиҗ сурв.

¹⁸— Юңгад һанцхн эн хәр күн Бурхиг магтхин төлә хәрү ирсмб? — гив.

¹⁹Дәкәд терүнд: — Босад йов, чини иткл чамаг аврв, — гив.

²⁰Паршмуд Исусас: — Бурхна йосн кезә ирхмб? — гиҗ сурв. Тер иим хәрү өгв: — Бурхна йосн кезә ирхинь тадн нүдәрн үзҗ чадшгот, — гив.

²¹— «Хәлә, тер энд» эс гиҗ «тер тенд», гиҗ кен чигн келҗ чадшго, юңгад гихлә, Бурхна йосн тадна дотртн, — гив.

²²Цааранднь Тер эврәннь сурһульчнртан иигҗ келв: — Цагнь ирхлә, тадн Намаг, Күмни Көвүг, негхн өдр чигн үзхәр седхит, зуг үзҗ чадшгот.

²³Әмтн таднд келх: «Тер энд» эс гиҗ «Тер тенд», зуг тадн ардаснь бичә гүүтн, бичә йовтн.

²⁴Ямаран кевәр һал цәкллһн теңгрин нег захас талдан зах күртл цәс гиҗ гилвкҗ үзгднә, тиим кевәр Би, Күмни Көвүн, ирх өдртән үзгдхв.

²⁵Зуг тер өдр күртл Би кесг зовлң эдлхв, эн үйин әмтн Нанас урвх.

²⁶Ноах бәәсн цагла ямаран юмн учрла, тиим юмн Күмни Көвүнә өдрмүдт учрх.

²⁷Ноахиг керм дотр орн ортл әмтн хотан уулдад, мордлдад, гер авлдад бәәдг билә. Цааранднь усна аюл болад, цуг тедниг уга кев.

²⁸Тиим берк юмн Лот бәәсн цагт бас учрла. Әмтн хотан уулдад, хулдад авад, мод суулһад, гер тосхад бәәдг бәәсмн.

²⁹Зуг Содом балһсиг Лот үлдәсн өдр теңгрәс һал күкр хойрин хур орад, цуг әмтиг уга кев.

³⁰Күмни Көвүн ирхлә, әмтн бас тиигҗ бәәх.

³¹Тер өдр герин орад суусн цагт кен чигн күн эврәннь хувц-хунран авхар доргшан бичә буутн. Кеер бәәсн күн юм авхар хәрү бичә иртн.

³²Лотын авалиг санҗ тодлтн!

³³Эврәннь әмән харсхар седснь әмән геехмн, әмән гееснь терүгән харсҗ аврх.

³⁴Би таднд келҗәнәв: тер сө унтсн хойр күүнәс негнь авгдх, негнь үлдх.

³⁵[35-36] Буудя цоксн хойр күүкд күүнәс негнь авгдх, наадкнь үлдх, — гив.

³⁷— Деед Эзн, альд эн учрх? — гиҗ тедн сурв. Исус хәрүднь: — Үксн цогц кевтсн һазрт гекс шовуд цуглрх, — гив.