Read kalabari Лукан бичсн Сән Зәңг 18 Bible Online

Лукан бичсн Сән Зәңг 18 - kalabari bible

Лукан бичсн Сән Зәңг 18

¹Төрүц цөкрлт уга оньдин зальврх кергтәһинь сурһульчнр медтхә гиһәд, Исус үлгүрләд келв:

²— Нег балһснд Бурхнас әәдго, әмтиг тевчдго зарһч бәәсмн.

³Тенд бас нег белвсн күүкд күн бәәсмн. Тер кесг дәкҗ зарһчд одад, оньдин «Намаг өшәтнәсм харстн!» гиһәд ээрәд сурдг бәәҗ.

⁴Кесгтән зарһч тер күүкд күүг харсхар седсн уга. Зуг аш сүүлднь тер: «Би Бурхнас әәдн угав, әмтиг тевчдн угав,

⁵зуг эн белвсн күүкд күн нанд амр өгчәхш, би энүг харснав эс гиҗ эн эврәннь эрлһәрн намаг зовах», — гиһәд ухалсмн.

⁶Деед Эзн: — Му зарһч ю келсинь тадн соңсвт?

⁷Тер учрар Бурхн шүүҗ авсн әмтиг харсхмн бишви? Тедн өдр-сө уга Терүг дуудна. Бурхн тедниг күләлһәд бәәхмб?

⁸Бурхн тедниг шулуһар харсх, гиҗ Би таднд келҗәнәв. Зуг Би, Күмни Көвүн, ирх цагтан эн орчлң деер иткл олҗ чадхий? — гиҗ сурв.

⁹Бийән чик седклтә күүнд тоолдг болн әмтиг дорацулхдан дурта улст Исус үлгүрләд иигҗ келв:

¹⁰— Хойр күн һол сүмд зальврхар ирсмн бәәҗ. Негнь парш, наадкнь — алв цуглулдг күн.

¹¹Парш босад, бийиннь тускар иигҗ зальврад келв: «Бурхн минь, деермчнрлә, хар саната, аля-азд әмтнлә болн эн алв цуглулдг күүнлә әдл эс болсндан би Танд икәр ханҗанав.

¹²Би долан хонгт хойр дәкҗ мацг бәрдв. Цуг хулдҗ авсн юмнас арвна нег хүвинь Танд өргдв».

¹³Паршас тедүкнд алв цуглулдг күн зогсҗ. Тер теңгр тал хәләхәсн әәһәд, өрчән цокад: «Бурхн минь, килнцтә му намаг хәәрлит!» гиҗ келв.

¹⁴Парш биш, эн килнцтә күн килнцәсн сулдҗ герүрн йовв гиҗ би таднд келҗәнәв. Юңгад гихлә, кен чигн бийән деегшлхлә, дорацх, кен чигн бийән дорацулхла деегшлх.

¹⁵Әмтн Исусиг әдс өгтхә гиһәд бичкн күүкдән Терүн тал авч ирдг бәәсмн. Сурһульчнр цуг энүг үзәд, эк-эцкнринь хөрҗәсмн.

¹⁶Зуг Исус күүкдиг Бий талан дуудад: — Күүкд Нанур иртхә. Бичә эдниг хөртн. Юңгад гихлә, бичкдүдлә әдл улс Бурхна орн-нутгт орх.

¹⁷Би таднд үнәр келҗәнәв: кен чигн күн Бурхна ориг эн бичкн күүкдлә әдл седклдән эс авхла, тер төрүц терүнд орҗ чадшго, — гиҗ келв.

¹⁸Нег ахлач күн Исусас: — Буйнта Багш минь! Мөңк җирһл эдлхин төлә ю кех зөвтәв? — гиҗ сурв.

¹⁹— Чи юңгад Намаг буйнта гиҗ нерәдвч? — гиҗ Исус сурв, — Һанцхн Бурхн буйнталм.

²⁰«Күүнә гергтә дерән бичә негдүл», «кү бичә ал», «хулха бичә ке», «күүнә тускар худлар бичә герчл», «эк эцк хойран күндл» гидг зааврмуд чи меднчи?

²¹— Цуг эн зааврмудыг би бичкнәсн авн күцәнәв, — гиҗ тер хәрү өгв.

²²Энүг соңсад Исус келв: — Зуг негхн юм чамд кех кергтә. Цуг бәәсн зөөрән хулдад, мөңгинь угатя әмтнд түгәһәд өгчк, тиигхлә теңгрт байн зөөртә болхич. Дарунь Нан тал ирәд, Намаг дахад йов.

²³Ахлач цуг энүг соңсчкад гейүрв, тер юңгад гихлә, тер ик байн бәәҗ.

²⁴Исус терүг гейүрсинь үзәд: — Байн күүнд Бурхна орн-нутгт күрхд дегд берк!

²⁵Байн күн Бурхна орн-нутгт орхас темән зүүнә сүвәр орхнь амр, — гив.

²⁶Энүг соңссн әмтн: — Тиигхлә кен аврҗ чадхмб? — гиҗ сурцхав.

²⁷Исус: — Кенд чигн бийән аврх арһ уга, зуг Бурхн байн әмтиг чигн аврх арһта, — гиҗ хәрү өгв.

²⁸Тиигхлә Пётр Терүнд: — Хәләтн! Бидн ода бәәсн юман үлдәһәд Тана ардас даххвидн! — гив.

²⁹— Би таднд үнәр келҗәнәв, кемр кен чигн герән, авалян, ахнран, эк-эцкән эс гиҗ күүкдән Теңгрин йосна төлә үлдәсн болхла,

³⁰тер эн орчлңд кесг холван ик олз олх. Цагнь ирхлә, мөңк җирһл эдлх, — гиҗ Исус хәрүднь келв.

³¹Исус арвн хойр сурһульчнран әмтнәс хооран дуудад: — Бидн ода Ерусалим балһснур йовхвидн, болв тенд әәлдәчнр Мини тускар, Күмни Көвүнә тускар бичснь цугнь учрх.

³²Би буру номта әмтнә һарт орхв, Намаг наад бәрәд, му келәд, чирәдм нульмх.

³³Тедн Намаг дегд икәр цокҗ зовах, аш сүүлднь әмнәсм хаһцулх. Зуг һурвдгч өдртнь Би әмдрхв, — гив.

³⁴Сурһульчнр Исусин келсн үгмүдәс негинь чигн медҗ чадсн уга. Тер юңгад гихлә, Исусин келсн үгмүдин чинр-утхнь теднәс далд бәәсмн.

³⁵Исус Ерихо хотнур өөрдҗ йовла. Хаалһин өөр нег сохр күн һууль һууһад сууҗ.

³⁶Тер олн әмтн өөрдҗ йовхинь соңсад, юн болҗана гиҗ әмтнәс сурв.

³⁷— Назарет хотна күн Исус аашна, — гиҗ терүнд өөрк әмтн келцхәв.

³⁸Тиигхлә сохр күн хәәкрв: — Давидин көвүн Исус! Буйн болтха бийм хәәрлит!

³⁹Ик өмн йовсн әмтн: — Бичә хәәкр! — гиҗ сохр күүг хөрцхәв. Зуг тер улм чаңһур хәәкрв: — Давидин көвүн, бийм хәәрлит!

⁴⁰Исус зогсад: — Тер күүг нааран авч иртн, — гив. Сохр күн өөрдхләнь, Исус терүнәс сурв:

⁴¹— Чамд Нанас юн кергтә? — Деед Эзн минь, нүдндм хара орулит, — гиҗ тер күн келв.

⁴²— Нүдәрн үздг бол! Чини иткл чамаг аврв! — гиҗ Исус хәрүднь келв.

⁴³Тер дарунь сохр күн юм үздг болв. Бурхиг туурулад, Исусин ардаснь тер дахв. Олн әмтн энүг үзәд байрлад, Бурхиг магтв.