Read kalabari Лукан бичсн Сән Зәңг 19 Bible Online

Лукан бичсн Сән Зәңг 19 - kalabari bible

Лукан бичсн Сән Зәңг 19

¹Исус Ерихо хотнур орад ирҗ йовла.

²Тенд алв цуглулдг улсин ахлач болҗ көдлдг Закха гидг байн күн бәәсмн.

³Закха Исусиг ямаран дүрстәһинь үзхәр седҗ, зуг маштг нурһта төләдән олна заагт Терүг үзҗ чадсн уга.

⁴Тегәд тер әмтнә өмн һарад, Исусиг үзхәр инҗр модн деер һархар давшв. Яһад гихлә, Исус тер хаалһар йовх йоста бәәҗ.

⁵Исус тер ормур өөрдҗ ирәд: — Закха, шулуһар модн деерәс бу. Эндр Би чини герт гиичлх йостав, — гив.

⁶Закха моднасн дарунь бууһад, ик байртаһар Исусиг гер талан авч ирәд тоов.

⁷Энүг үзсн әмтн дурго болад: — Энтн килнцтә күүнә герүр йовв! — гиҗ келцхәв.

⁸Закха Исусин өмн босҗ келв: — Деед Эзн минь! Би ода эврәннь зөөрән хуваһад, өрәлинь хулдад, мөңгинь һуульһнч әмтнд түгәҗ өгнәв, кемр күүнәс үлү мөңг авсн болхла, би терүнд дөрвн холван икәр немҗ өгхв, — гив.

⁹Исус хәрүднь иигҗ келв: — Эндр өдр эн герт чигн Бурхна аврлт ирв, тер юңгад гихлә, эн күн бас Абрахамин уңг-тохмин йосн үрн!

¹⁰Күмни Көвүн төөрсн әмтиг олад харсҗ аврхин төлә ирв, — гив.

¹¹Энүг соңссн улст Исус дәкәд нег үлгүр келҗ өгв. Тер Ерусалимас хол биш бәәсн учрас әмтн Бурхна йосн дарунь ирхиг күләҗәсмн.

¹²Тер учрар Исус үлгүрләд келв: — Нег эрк шилтә күн хаана цол авад хәрү ирхин төлә ик хол һазрур йовхар бийән белдҗәҗ.

¹³Йовхиннь өмн тер эврәннь арвн зарцан дуудад, теднд арвн алтн мөңг өгв. «Намаг иртл эн мөңгиг кергәр олзлтн», гиҗ тер келв.

¹⁴Зуг тер нутгин алвтн терүнд дурго болдг бәәсмн. Тер күүг йовсна хөөннь тедн элчнрәр дамҗҗ: «Эн күүһәр бидн ха кехәр седҗәхшвидн», — гисн үгмүд келүлҗ.

¹⁵Тер күн хаана цол авсна хөөн хәрҗ ирәд, эврәннь зарцнран дуудад, даалһҗ өгсн мөңгәрнь ямаран олз кесинь некҗ сурв.

¹⁶Түрүңк зарц ирәд: «Тана зергәс, тана нег алтн мөңгнтн арвн холван ик олз өгв!» гив.

¹⁷«Сән! Чи сән зарц, чи бичкн юмнд итклтә болвч, ода йовад арвн балһсна һардач бол» гив.

¹⁸Хойрдгч зарцнь ирәд: «Тана зергәс, тана нег алтн мөңгн тавн холван ик олз өгв» гив.

¹⁹Эзнь: «Чи тавн балһсна һардач бол» гив.

²⁰Сүүлднь һурвдгч зарц ирәд: «Тана зергәс, эн тана алтн мөңгиг би эн кенчрт ораһад хадһллав.

²¹Яһад гихлә, би танас әәһәд бәәләв. Та дегд шүрүн күнт. Та эс тәвсн ормасн авдг, эс тәрсн һазриг хаддг күнт» гив.

²²Тиигхлә эзн: «Ямаран хар саната зарцвч! Би чамд чини үгәрчн келнәв. Намаг ямаран шүрүтәһинь чи медвч, намаг эс тәвсн ормасн авдг, эс тәрсн һазриг хаддгинь чи сәәнәр медҗ аввч!

²³Зуг яһад чи мини алтн мөңгиг өгйәһәр күүнд эс өгвч? Тиигәд би олз авх биләв», — гив.

²⁴Дәкәд өөрнь зогссн әмтнд: «Энүнәс алтн мөңгинь авад, арвн алтн мөңг ору авсн зарцд өгтн» гиҗ закв.

²⁵«Тана зергәс, тертн арвн мөңгтә бәәнәлм», гиҗ әмтн келцхәв.

²⁶Би таднд иигҗ келҗәнәв: бәәснднь — улм немгдх, угаһаснь — үлдсн юмнь чигн булаҗ авгдх.

²⁷Мини өшәтниг, намаг хан болһшгоһар зөрлцдг әмтиг нааран авч ирәд, мини чирәдм әмнәснь хаһцултн! — гиҗ эзн закв.

²⁸Исус цуг энүг келснә хөөн цааран Ерусалим балһсн тал йовв.

²⁹Олив уулын ташуд бәәсн Бетпәг болн Бетәнья хотнур өөрдҗ йовад, Тер түрүләд хойр сурһульчнран илгәҗ келв:

³⁰— Эн хотнд орхларн, тадн нег архлата эмнг баахн элҗг үзхит. Боодһаһинь тәәләд, элҗгиг нааран көтлҗ авч иртн.

³¹Кемр әмтн: «Ю хәәҗ тадн энүг тәәлҗәхмт?» гиҗ сурхла, тадн: «Энтн Деед Эзнд кергтә болҗана» гиҗ келтн.

³²Сурһульчнр йовад Исусин келсн юм лавта бәәсинь үзв.

³³Тедн элҗгниг сулдхад деесинь тәәлхлә, эзнь теднәс: — Тадн ю хәәҗ эн баахн элҗгиг сулдхад, деесинь тәәлҗәхмт? — гиҗ сурв.

³⁴— Энтн Деед Эзнд кергтә болҗана, — гиҗ тедн хәрүднь келцхәв.

³⁵Сурһульчнр баахн элҗгиг дахулҗ авч ирәд, эврәннь деерк хувцан деернь хайҗ делгәд, Исусиг суулһв.

³⁶Исусиг йовсн цагт әмтн хаалһднь деерк хувцан делгцхәв.

³⁷Тедн Олив уулас бууҗ йовх хаалһур өөрдхлә, Бурхиг өвәрц йовдлмудыг үзүлсн төләд цуг сурһульчнр байртаһар магтад хәәкрцхәв:

³⁸— Деед Эзнә нерн деерәс ирсн хан әдстә! Теңгрт амулң болтха! Бурхн тууртха!

³⁹Олн әмтнә заагт бәәсн зәрм паршмуд Исуст келцхәв: — Багш! Сурһульчнран хөрхнтн! — гив.

⁴⁰— Би таднд келҗәнәв, кемр тедн тагчг болҗ одхла, чолуд хәәкрлдх! — гиҗ Тер хәрүцәд келв.

⁴¹Тедниг Ерусалимур өөрдҗ йовсн цагт балһсиг үзәд, Исус һашудад уульв:

⁴²— О, Ерусалим! Кемр чи эндр өдрт эвинь олхин төлә юн кергтәһинь медсн болхла! Зуг цуг эн чини нүднәс далд!

⁴³Тиим өдрмүд ирх, чини хортн һазр малтад, зесг [6] кеһәд, чамаг бүслҗ, энд-тендәсчн шахх.

⁴⁴Тедн чамаг ул күртлчн күүчәд хольврулх, тедн чини эрс һатц бәәсн улсиг чигн өршәңгү угаһар алх. Чолун деер нег чигн чолу үлдәшго, тер юңгад гихлә, Бурхн чамаг аврхар кезә ирсинь чи медсн угач.

⁴⁵Цааранднь Исус һол сүмд орад, тенд һаза бәәсн хулдачнриг тараһад көөв.

⁴⁶Исус: — Бурхна Бичгт бичәтә: «Мини гер — зальврлһна гер болх», тадн болхла, энүгәр деермчнрин бәәр кеҗит, — гив.

⁴⁷Исус өдр болһн сүмд әмтиг сурһдг бәәсмн, зуг ах гелңгүд, ном цәәлһәчнр, әмтнә һардачнр болхла, Терүг әмнәснь яһҗ хаһцулхинь ухалцхав.

⁴⁸Зуг тедн энүг яһҗ күцәхән медлго бәәв, юңгад гихлә, олн улс нег чигн үг алдлго Исусиг соңсдг бәәсмн.