Read kalabari Лукан бичсн Сән Зәңг 2 Bible Online

Лукан бичсн Сән Зәңг 2 - kalabari bible

Лукан бичсн Сән Зәңг 2

¹Тер цагт Август хан Рим орн-нутгин үлмәд бәәсн һазрин әмтнә то бичҗ авхин туск зәрлг һарһв.

²Сирий нутгт [2] Күринь хан нойлҗах цагт әмтнә то бичҗ авлһна түрүнь болҗ эклв.

³Тегәд чигн нерән бичүлхин төлә күн болһн эврәннь төрсн балһснур йовв.

⁴Йосип бас Һалилья һазрас Назаретас һарад, Йудья гидг һазрур Давид хан төрсн Бетлехем хотнур йовв, юңгад гихлә, тер Давидин тохмин күн бәәсмн.

⁵Йосип Мирьям гидг келсн күүктәһән нерән бичүлхин төлә йовсмн. Тер күүкн күнд бәәсмн.

⁶Бетлехемд ирхлә, Мирьямин гиигрх цагнь ирв.

⁷Тер эврәннь ууһн көвүһән һарһад өлгәдәд, малд өвс өгдг отльгт кевтүлв. Яһад гихлә, гиичлүрин герт теднд орм күртсн уга.

⁸Теднә бәәсн һазрин өөр хөөчнр бәәсмн. Тедн кеер бәәһәд, сөөднь хөөдән манад бәәцхәҗ.

⁹Генткн теднә өмн Деед Эзнә элч үзгдәд, Деед Эзнә туурмҗин герл теднд асв. Тедн дегд икәр сүрдцхәв.

¹⁰Зуг Деед Эзнә элч: — Бичә әәтн. Би таднд болн эн нарт делкәд бәәсн әмтнд байрта зәңг авч ирв!

¹¹Эндр Давид хаана төрскн хотнд Бурхна илгәсн Аврач Деед Эзн төрв!

¹²Терүнә темдгнь эн: өлгәгдсн нилхиг тадн малд өвс өгдг отльгт кевтсинь олҗ авхит, — гиҗ келв.

¹³Генткн Деед Эзнә элчин өөр теңгрин церг бууҗ ирв. Тедн Бурхиг магтад дуулцхав:

¹⁴— Теңгрт Бурхн тууртха! Сән тааларн бәәдг улс һазр деер амулң менд бәәтхә!

¹⁵Бурхна элчнр хөөчнриг үлдәһәд, хәрү теңгр тал нисҗ һарв. — Бетлехемүр йовхмн, Деед Эзнә зәңглсәр юн учрсинь хәләхмн! — гиҗ хөөчнр келцхәв.

¹⁶Тедн адһҗ йовад, Мирьямиг, Йосипиг болн малд өвс өгдг отльгт кевтсн теднә үринь үзцхәв.

¹⁷Нилх көвүг үзчкәд, хөөчнр энүнә тускар Бурхна элчәс соңссан келҗ өгцхәв.

¹⁸Хөөчнрин келсн үгиг соңссн әмтн алң болад бәәцхәв.

¹⁹Мирьям цуг энүг тодлад, зүркндән хадһлад бәәв.

²⁰Хөөчнр учрсн юмиг үзсн, соңссн төләдән Бурхиг туурулҗ магтад, хәрү йовцхав. Бурхна элчин келсәр цугнь учрв.

²¹Нәәмн өдр давсна хөөн көвүнд керчлһ кех цаг ирхлә, Терүнд Исус гидг нер өгв. Көвүг төрәд уга бәәтлнь эн нериг Бурхна элч Түүнд өгч.

²²Теднә әрүсллһнә йослл күцәх цаг ирхлә, Мирьям Йосип хойр нилх көвүһән Деед Эзнд үзүлхәр Ерусалимд авч ирцхәв.

²³Юңгад гихлә, Деед Эзнә Заканд иигҗ бичәтә: «Ууһн көвүн болһн Бурхнд нерәдгдх зөвтә».

²⁴Дәкәд болхла, Деед Эзнә Закана зәрлгәр «хойр бүдүн көглҗрһәр эс гиҗ көглҗрһнә хойр һууҗмлар» Бурхнд тәкл тәкх зөвтә бәәсмн.

²⁵Тер цагт Ерусалимд Шимон гидг нертә нег күн бәәдг бәәҗ. Эн Израилин аврлһна цагинь күләдг чик седклтә болн буйнч күн бәәҗ. Эн Әрүн Сәкүстә күн бәәҗ.

²⁶— Деед Эзнә Христосиг эс үзтлән чи насан баршгоч, — гиҗ Шимонд Әрүн Сәкүсн медүлҗ келсмн.

²⁷[27-28] Әрүн Сәкүсәр сүрәлксн Шимон сүмд ирв. Нилх көвүнә төлә Закана йосллыг күцәхәр эк-эцкнь Терүг сүмд авч ирхлә, Шимон Исусиг һар деерән авад, Бурхнд ханлтан өргәд:

²⁸

²⁹— Деед Эзн! Ода Эврәннь үгәрн Тана зарциг тәвәд йовулҗанат.

³⁰[30-31] Юңгад гихлә, цуг күмн әмтнд белдсн Тана илгәсн Аврачиг мини нүдм үзв.

³¹

³²Энтн — буру номта улст гегән герл болх. Эврәннь Израиль келн-әмтән туурулх! — гив.

³³Эк эцк хойрнь Шимониг теднә көвүнә тускар келҗәхинь соңсад, өврәд бәәцхәв.

³⁴Дәкәд Шимон теднд әдс өгәд, нилх көвүнә экднь Мирьямд келв: — Эн кевтсн көвүнәс көлтә Израилин улсас кесгнь буурх, кесгнь деегшән өөдлх. Энтн Бурхна темдг болх. Энүнә өмн кесгнь босад седклиннь нуувчн санаһан илдкҗ секх.

³⁵Чини седклиг бас үлдәр шааһад салһх, — гив.

³⁶Тер сүмд Пенүлин һарсн күүкн Ашер тохмин Хана гидг әәлдәч күүкд күн бәәсмн. Тер зөвәр наста эмгн бәәҗ. Эн эврәннь залутаһан долан җилдән гер-бүл болҗ бәәсмн.

³⁷Болв хөөннь тер белвсн болад үлдв. Хана найн дөрв күртлән белвсн бәәҗ. Тер сүмәс төрүц һардго бәәсмн, өдр сө уга мацг бәрәд, Бурхнд зальврдг бәәсмн.

³⁸Тер цагт Хана бас тедн тал өөрдәд, Бурхнд ханлт өргәд, Ерусалимин сулдхвриг күләҗәсн күн болһнд нилх көвүнә тускар келҗ өгв.

³⁹Мирьям Йосип хойр Деед Эзнә закаһар кергән күцәсн хөөн Һалилья гидг һазрт бәәсн эврәннь Назарет гидг хотнур хәрҗ ирцхәв.

⁴⁰Нилх көвүн өсәд босад, батрад, цецн уханд орад, Бурхна онц хәәрлтә көвүн болҗ йовсмн.

⁴¹Җил болһн Песах гидг байрин өдрлә Исусин эк эцк хойр Ерусалим балһснур ирдг бәәсмн.

⁴²Исусиг арвн хойр наснд күрхлә, тедн саак кевәрн тер байрт йовцхав.

⁴³[43-44] Байрин өдр чилснә хөөн эк-эцкнь хәрәд йовцхав, Исус Ерусалимд үлдв. Йосип Мирьям хойр түүг медлго, көвүһән теднлә йовсн әмтнлә йовҗ йовх гиҗ санв. Тиигәд тедн өдрин дуусн йовад, дәкәд көвүһән элгн-садн дунд болн таньдг улс заагт хәәцхәв.

⁴⁴

⁴⁵Көвүһән олҗ чадлго, хәрү Ерусалимд ирәд, тенд Терүг хәәцхәв.

⁴⁶Һурвн өдр болад тедн Исусиг сүмд суусинь олҗ авч. Тер болхла закана багшнрт сурвр өгәд, тедниг соңсад сууҗ.

⁴⁷Исусиг соңссн әмтн Терүнә гүн медрлинь үзәд, яһҗ Тер әмтнә сурврмудтнь хәрү өгчәхинь соңсад, алң болцхав.

⁴⁸Эк-эцкнь көвүһән тенд үзчкәд, йир өврцхәв. — Көвүм минь, яһад чи мадниг зоваһад, тиим йовдл һарһвч? Бидн чини эцктә хамдан чамаг хән гиҗ басл зовад бәәввидн, — гиҗ экнь сурв.

⁴⁹— Тадн Намаг яһад хәәсмт? Намаг эврәннь Эцкин керг-үүлд орлцх зөвтәһинь та меддго болвзат? — гиҗ Исус сурв.

⁵⁰Эк-эцкнь көвүнә келсн үгинь медҗ чадлго бәәцхәв.

⁵¹Исус эктә-эцктәһән хамдан һарад йовв. Назаретд ирәд, Тер эк эцкиннь үгинь соңсад бәәв. Цуг учрсн йовдлыг экнь зүркндән тодлҗ авв.

⁵²Исус өсәд босад, цаг ирвәс цецн ухата болад бәәв. Цаг ирвәс әмтн болн Бурхн Бийнь Исуст хәәртә болв.