Read kalabari Лукан бичсн Сән Зәңг 20 Bible Online

Лукан бичсн Сән Зәңг 20 - kalabari bible

Лукан бичсн Сән Зәңг 20

¹Нег өдр Исус сүмин һаза Сән Зәңг цәәлһәд әмтиг сурһв. Терүн тал ах гелңгүд болн ном цәәлһәчнр әмтнә ахлачнрла ирәд өөрдв.

²— Кенә йосар Чи тиигҗ кеҗәхмч? Кен Чамд тиим йос өглә? — гиҗ тедн сурцхав.

³Исус хәрүднь: — Би бас таднас нег юмна тускар сурхар седләв. Нанд келтн.

⁴Йохана кирсллһн теңгрәсв эс гиҗ күүнәсв? — гив.

⁵Тедн нег-негнтәһән селвлцҗ күүндцхәв: — Кемр бидн теңгрәс гихлә, Тер: «Юңгад терүнд эс итквт?» гиҗ сурх.

⁶Кемр күүнәс гихлә, әмтн мадниг чолуһар шивәд алх, яһад гихлә, тедн Йоханыг әәлдәч гиҗ санҗана.

⁷— Энүг альдас ирсинь бидн медхшвидн, — гиҗ тедн аштнь келв.

⁸Тиигхлә Исус: — Би бас таднд кенә йосар энүг кәҗәхән келхшв, — гив.

⁹Цааранднь Исус әмтнд үлгүрләд иигҗ келв: — Нег күн уста үзм тәрҗ. Уста үзмин тәрәчнрт терүгән нәәмәдлҗ өгәд, бийнь талдан һазр тал йовҗ одсмн. Кесгтән ирлго тендән бәәсмн.

¹⁰Темс цуглулх цагнь ирхлә, эзн хүвм авчк гиһәд уста үзмин тәрәчнр тал эврәннь зарцан илгәв. Тәрәчнр болхла зарцинь үктлнь цокад, хоосар хәрү йовулчкв.

¹¹Тер дәкәд нег зарцан илгәҗ. Эн зарциг чигн тәрәчнр цокад, дегд икәр зоваһад хоосар йовулчкв.

¹²Тер һурвдгч зарцан илгәв. Тедн терүг чигн цусн һартлнь цокад, уста үзм тәрсн һазрас һарһад хайчкв.

¹³Тиигхлә эзнь: «Ода яахмб? Эңкр көвүһән илгәсүв, энүг тедн соңсхмн болвза» гиһәд йовулв.

¹⁴Уста үзмин тәрәчнр көвүһинь үзәд: «Эн өнчән эзлх күн. Энүг алхла, өнч мана болх» гиҗ санчкад,

¹⁵тедн терүг уста үзм тәрсн һазрасн кеерәгшән һарһад алцхав. Уста үзмин эзнь тер тәрәчнриг яахмб?

¹⁶Тер ирәд тәрәчнриг алад, уста үзмиг талдан әмтнд өгчкх. Энүг соңссн әмтн: — Тиим юмн бичә болг! — гиҗ хәәкрлдцхәв.

¹⁷Исус теднүр ширтҗ хәләһәд: — Тосхачнрин һолсн чолун герин өнцгин һол чолун болв, гисн Бурхна үгмүдин чинрнь ямарамб?

¹⁸Тер чолун деер унсн күн цокгдх, зуг күүнә толһа деер тер чолун унхла дарад алчкх.

¹⁹Тер дарунь ном цәәлһәчнр болн ах гелңгүд Исусиг бәрҗ авхар седв. Зуг әмтнәс әәцхәв. Тедн эн үлгүр бийсиннь тускар келсинь медв.

²⁰Ном цәәлһәчнр болн ах гелңгүд арднь орҗ Исусиг шинҗлҗ хәләһәд, зәрм улсиг илгәв. Тер улс худлахар үннч болсн болад, зуг үнәртнь Исусин үгинь соңсад, йосиг бурушаҗах үгмүд олхар һардачин йоснд яһҗ бәрүлхм гиҗ ухалв.

²¹Тегәд тер улс Исусас сурцхав: — Багш, Таниг үнәр келҗәхинь болн сурһҗахинь мадн меднәвидн. Та әмтиг йилһлго Бурхна хаалһин тускар чикәр зааҗ дасхнат.

²²Бидн Римин хаанд алв өгх йостай аль угай?

²³Исус теднә хар санаг медәд келв:

²⁴— Нанд мөңгән үзүлтн. Кенә дүр энүнд зурата, кенә нерн энд бичәтә?

²⁵— Римин хаана, — гиҗ тедн хәрү өгцхәв. Исус келв: — Тегәд чигн хаана юмиг хаанд өгтн, болв Бурхна юмиг Бурхнд өгтн.

²⁶Исусин өгсн хәрүднь өврәд, тер улс келсн үгднь хаҗһр, буру юм олҗ чадлго тагчг бәәцхәв.

²⁷Исус тал зәрм цадукмуд өөрдцхәв. Тедн үксн күн әмдршго гиҗ иткдг бәәҗ. Цадукмуд Терүнәс сурцхав:

²⁸— Багш, Моше маднд иигҗ бичлә, кемр гер-бүлтә ах өңгрхлә, болв терүнә авальнь үрн уга үлдхлә, уңг-тохман тасрулшгоһар тер өңгрсн күүнә дүнь белвсн гергинь авх зөвтә бәәсмн.

²⁹Тиигәд ах-дү долан бәәҗ. Түрүңк ахнь гер авад үрн уга өңгрҗ одв, авалян үрн уга үлдәҗ.

³⁰Хөөннь тер белвсн күүкд күүг дарук дүнь авч, тернь бас өңгрҗ.

³¹Һурвдгч дүнь бас тер күүкд кү авч, тиигәд наадк ах-дү бас терүг авч, болв цуһар ах-дү долан күн үр үлдәлго өңгрҗ.

³²Аш сүүлднь, тер күүкд күн өңгрв.

³³Ода болхла кемр тедн цуһар әмдрхлә, тер күүкд күн альк ахиннь гергн болхмб? Яһад гихлә, тер долан ах-дүүһин гергн бәәҗ.

³⁴Исус теднә хәрүднь иигҗ келв: — Эн нарт делкәд әмтн гер авна, мордна.

³⁵Зуг Бурхнас үкәд әмдрх зөв авсн улс иргчдән гер авлго, күүнд одлго бәәх.

³⁶Бурхна элчнрлә әдл үкл угаһар тедн бәәх. Тедн Бурхна үрдүд, тер юңгад гихлә, тедн үкәд әмдрцхәв.

³⁷Үксн күн әмдрдг гисн үнәр болх. Шачасн бутын тускар Моше келхлә, тер Бурхиг «Абрахамин Бурхн, Ицхакин болн Яковин Бурхн» гиҗ нерәдв.

³⁸Бурхн үксн әмтнә Бурхн биш. Тер әмд әмтнә Бурхн, Терүнә чирәд тедн әмд!

³⁹— Багш! Та йир сән хәрү өгвт! — гиҗ ном цәәлһәчнрин зәрмнь келцхәв.

⁴⁰Энүнә хөөн дәкҗ күн терүнд сурвр өгх сана зүүсн уга.

⁴¹Цааранднь Исус сурв: — Христосиг Давидин тохмин үлдл гиҗ юңгад әмтн келдв?

⁴²[42-43] Псалмудын дегтрт Давид эврән келсн биләлм: «Деед Эзн мини Деед Эзнд келсмн: Чини өшәтниг диилҗ көлдчнь эс хайтл Мини барун Бий тал су».

⁴³

⁴⁴Кемр Давид Терүг «Деед Эзн» гиҗ нерәдхлә, яһҗ Тер бийиннь тохмин күн болҗ һархмб?

⁴⁵Олн әмтн оньган өгәд, Исусиг соңссн цагт Тер эврәннь сурһульчнртан иигҗ келв:

⁴⁶— Ном цәәлһәчнрәс бийән саглҗ йовтн. Тедн ут хувцан өмсчкәд йовхла, әмтн талвң болһнд теднлә мендлхлә, тедн таасгдна. Хурлд эс гиҗ нәәрт деегшән һарад суухдан дурта.

⁴⁷Тедн белвсн күүкд улсин зөөринь меклҗ авад, әмтнә нүднд үзүләд Бурхнд уданар мөргцхәнә. Тер улс ик догшн цааҗла харһх.